୧୩ ଫ୍ରେବୁଆରି ୨୦୨୫ (ଓଡ଼ିଶା ତାଜା ନ୍ୟୁଜ୍ ) ହିଞ୍ଜିଳିକାଟୁ :- ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତିକରଣ ଉପବିଭାଗ ହିଞ୍ଜିଳିକାଟୁ ତରଫରୁ ଗୁରୁବାର ବ୍ଲକ ସ୍ତରୀୟ ମହୋତ୍ସବରେ ଲୋକକଳା ପ୍ରଦର୍ଶନ କାର୍ଯ୍ୟକ୍ରମ ଅନୁଷ୍ଠିତ ହୋଇଛି। ଗୋଷ୍ଠୀ ଉନ୍ନୟନ ଅଧିକାରୀ ଦିବ୍ୟଜ୍ୟୋତି ସ୍ମୁତି ରଞ୍ଜନ ଦେଓଙ୍କ ପୌରହିତ୍ୟରେ ବ୍ଲକ କାର୍ଯ୍ୟାଳୟ ପରିସରରେ ଆୟୋଜିତ କାର୍ଯ୍ୟକ୍ରମରେ ବିଧାୟକଙ୍କ ବ୍ଲକ ପ୍ରତିନିଧି ଏ.ସୁଦର୍ଶନ,ପୌର ପରିଷଦ ଅଧ୍ୟକ୍ଷ ସୁବାସ ଚନ୍ଦ୍ର ପୋଲେଇ,ଉପାଧ୍ୟକ୍ଷା ସୁଚିତ୍ରା କୁମାରୀ ପଣ୍ଡା, ପୌର ପରିଷଦ କାର୍ଯ୍ୟ ନିର୍ବାହୀ ଅଧିକାରୀ ଜୁବୁଲି ଚରଣ ବେହେରା,
ଜିଲ୍ଲା ପରିଷଦ ସଭ୍ୟା ବାଇ ଗୀତାଞ୍ଜଳି ଓ ପ୍ରୀତି ସାହୁ ପ୍ରମୁଖ ଯୋଗ ଦେଇ ଶୁଭ ଉଦଘାଟନ କରିଥିଲେ। ଏହି ଅବସରରେ ଓଡ଼ିଶାରେ ବହୁ ପୁରାତନ ଲୋକ କଳା ସଂସ୍କୃତିର ପ୍ରଚାର ଓ ପ୍ରସାର କରିବା କ୍ଷେତ୍ରରେ ପୁର୍ବ ସରକାରଙ୍କ ଅମଳରେ ଉଦ୍ୟମ ଆରମ୍ଭ ହୋଇ ବହୁ ବିଧ ଯୋଜନା ପ୍ରଣୟନ କରଯାଇଛି। ରାଜ୍ୟ ଓ ଜାତୀୟ ସ୍ତରରେ ଲୋକକଳା ସଂସ୍କୃତିକୁ ଉଜ୍ଜୀବିତ ରଖିବା ପାଇଁ ଭିତ୍ତିଭୂମି ବିକାଶ ସହ ସରକାରଙ୍କ ପକ୍ଷରୁ କଳାକାର ମାନଙ୍କୁ ସହାୟତା ପ୍ରଦାନ କରାଯାଉଛି।
ସେ ସମୟରେ ରାଜ୍ୟ ସରକାରଙ୍କ କ୍ରୀଡ଼ା ଓ ସଂସ୍କୃତି ବିଭାଗ ପକ୍ଷରୁ ଗଞ୍ଜାମ ଜିଲ୍ଲାର ନନ୍ଦିକକୁ ଏକମାତ୍ର ଲୋକକଳା ଗ୍ରାମ ଭାବେ ମାନ୍ୟତା ପ୍ରଦାନ କରାଯାଇଛି ବୋଲି ଅତିଥି ମାନେ ଅଭିମତ ପ୍ରକାଶ କରିଥିଲେ। ପରେ ବ୍ଲକ ଲୋକକଳା ସଂଘରେ ସାମିଲ ହୋଇ ଥିବା ୧୮ ଗୋଷ୍ଠୀର ସଦସ୍ୟ ମାନେ ଉଚ୍ଚ କୋଟିର ପାରମ୍ପରିକ ଲୋକକଳାକୁ ପ୍ରଦର୍ଶିତ କରିଥିଲେ।
କାର୍ଯ୍ୟକ୍ରମରେ ବ୍ଲକ ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତିକରଣ ଅଧିକାରୀ ଶୁଭଶ୍ରୀ ବେହେରା ପରିଚାଳନା କରିଥିଲେ। ଅତିଥି ମାନଙ୍କ ମଧ୍ୟରେ ପ୍ରଦୀପ କୁମାର ପଣ୍ଡା, ସରପଞ୍ଚ କାଳିଆ ଦାସ, କୃଷ୍ଣ ଚନ୍ଦ୍ର ଭଉଳ, କାହ୍ନୁ ଚରଣ ରାଉତଙ୍କ ସମେତ ବହୁ ପଞ୍ଚାୟତ ପ୍ରତିନିଧି,ଏମବିକେ, ସିଆରପି ଓ ସ୍ଵଂୟ ସହାୟିକା ଗୋଷ୍ଠୀ ସଦସ୍ୟା ମାନେ ଉପସ୍ଥିତ ଥିଲେ।
