୦୨ ଫ୍ରେବୁଆରି ୨୦୨୫ (ଓଡ଼ିଶା ତାଜା ନ୍ୟୁଜ୍ ) ବାଙ୍କୀ :- ବାଙ୍କୀ ଉପଜିଲ୍ଲାପାଳ ଦେବୀ ପ୍ରସାଦ ମହାନ୍ତିଙ୍କ ଅଧ୍ୟକ୍ଷତାରେ ଉପଜିଲ୍ଲାପାଳଙ୍କ ସମ୍ମିଳନୀ କକ୍ଷରେ ଗ୍ରାମବାସୀ , ସ୍ଥାନୀୟ ସରପଂଚ, ଗାଁର ମୁରବୀ ଓ ମୃତ ଛାତ୍ରର ଶୋକସନ୍ତପ୍ତ ପରିବାରଙ୍କ ଉପସ୍ଥିତିରେ ମାଳିବିହାରପୁର ଠାରେ ସ୍କୁଲ ଛାତ୍ର ମୃତ୍ୟୁ ପାଇଁ ଲାଗି ରହିଥିବା ସମସ୍ୟାର ସମାଧାନ ପାଇଁ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଗ୍ରାମବାସୀମାନେ ବାଙ୍କୀ ଉପଜିଲ୍ଲାପାଳଙ୍କୁ ଦେଇଥିବା ଦାବିପତ୍ର ସଂପର୍କରେ ଆଜି ଆଲୋଚନା ହୋଇଥିଲା । ମାଳିବହାରପୁର ଉଚ୍ଚବିଦ୍ୟାଳୟରେ ଦୀର୍ଘ ୧୫ବର୍ଷରୁ ଅଧିକ ଦିନ କାର୍ଯ୍ୟରତ ଶିକ୍ଷକମାନଙ୍କ ବଦଳି ଦାବୀକୁ ଗ୍ରହଣ କରାଯାଇଥିବା ବେଳେ ଦୁର୍ଘଟଣାରେ ଆହତ ଛାତ୍ରଛାତ୍ରୀଙ୍କ ଚିକିତ୍ସାର ଖର୍ଚ୍ଚ ସରକାର ବହନ କରିବା ପାଇଁ ଗ୍ରାମବାସୀମାନେ ନିବେଦନ କରିଥିଲେ । ଏହା ସହିତ ମୃତ ଛାତ୍ରର ପ୍ରତିମୂର୍ତ୍ତି ସ୍ଥାପନ ପାଇଁ ଆଜିର ବୈଠକରେ ବିଚାର କରାଯାଇଥିଲା ।
ଦୁର୍ଘଟଣାରେ ଆହତ ଛାତ୍ରଛାତ୍ରୀଙ୍କୁ ଅଭିଭାବକମାନେ ଚିକିତ୍ସା ପାଇଁ ନେବା ଆଣିବା କରିବାକୁ ଆର୍ଥିକ ସମ୍ବଳର ଅଭାବକୁ ନଜର ରଖି ଆଞ୍ଚଳ ପରିବହନ ଅଧିକାରୀ କଟକଙ୍କୁ ଅନୁରୋଧ କରାଯିବା ସହ ବସ୍ ଆସୋସିଏସନ୍ ସହିତ ଆଲୋଚନା କରି ଆହତ ଛାତ୍ରଛାତ୍ରୀଙ୍କ ପରିବାରବର୍ଗଙ୍କୁ ବସ୍ ପାସ୍ ଯୋଗାଇ ଦେବାକୁ ରାଜ୍ୟ ସରକାରଙ୍କ ଦୃଷ୍ଟି ଗୋଚର କରାଯିବ ବୋଲି ନିଷ୍ପତ୍ତି ଗ୍ରହଣ କରାଯାଇଛି । ଗ୍ରାମବାସୀଙ୍କ ସମସ୍ତ ଦାବୀକୁ ପୁଙ୍ଖାନୁପୁଙ୍ଖ ଭାବେ ଆଲୋଚନା କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ ନିମନ୍ତେ ପ୍ରଶାସନ ପକ୍ଷରୁ ପ୍ରତିଶ୍ରୁତି ମିଳିବା ପରେ ବିଦ୍ୟାଳୟ ଖୋଲାଯିବା ପାଇଁ ସହମତି ପ୍ରକାଶ ପାଇଥିଲା । ଆଜିର ଏହି ବୈଠକରେ ବାଙ୍କୀ ଥାନା ଆଇ.ଆଇ.ସି ଦିଲ୍ଲୀପ କୁମାର ମର୍ଦ୍ଦରାଜ ଭୂୟାଁ, ବାଙ୍କୀ ମଣ୍ଡଳ ଶିକ୍ଷାଧିକାରୀ ସନ୍ତୋଷ କୁମାର ସେଠୀ, ଅତିରିକ୍ତ ତହସିଲଦାର ସ୍ୱର୍ଣ୍ଣମ ପ୍ରିୟଦର୍ଶିନୀଙ୍କ ସମେତ ୭୦ରୁ ଉର୍ଦ୍ଧ୍ୱ ଗ୍ରାମବାସୀ ଉପସ୍ଥିତ ରହି ଆଲୋଚନାରେ ଅଂଶ ଗ୍ରହଣ କରିଥିଲେ ।
