୩୦ ଜାନୁଆରୀ ୨୦୨୫ (ଓଡ଼ିଶା ତାଜା ନ୍ୟୁଜ୍) ଆର,ଉଦୟଗିରି :- ଗଜପତି ଜିଲ୍ଲା ଅନ୍ତର୍ଗତ ମୋହନା ବ୍ଲକ ଅଡ଼ବା ହାଟପଦା ଠାରେ ଅଡ଼ବାକୁ ନୂତନ ବ୍ଲକ ଗଠନ କରାଯିବାକୁ ନେଇ ଆଞ୍ଚଳିକ ବିକାଶ ପରିଷଦ ଦାବି କରିଛି । ପରିଷଦର ସଭାପତି ପ୍ରକାଶ ନାୟକଙ୍କ ସଭାପତିତ୍ୱରେ ଅନୁଷ୍ଠିତ ପ୍ରସ୍ତୁତି ବୈଠକରେ ଅଡ଼ବା ଜୋନର ୧୫ଟି ପଞ୍ଚାୟତକୁ ନେଇ ନୂତନ ବ୍ଲକ ଗଠନ କରିବାକୁ ଦାବି କରିଛନ୍ତି ଜନପ୍ରତିନିଧି ଓ ଅଞ୍ଚଳବାସୀ । ସରକାର ବଦଳିବା ପରେ ରାଜସ୍ବ ମନ୍ତ୍ରୀ ସୁରେଶ ପୂଜାରୀ ରାଜ୍ୟରେ ନୂତନ ପଞ୍ଚାୟତ ସମିତି ଗଠନ କରିବା ପାଇଁ ସୂଚନା ଦେଇଥିଲେ l ଏହି ପରିପେକ୍ଷୀରେ ରାଜ୍ୟର ବହୁ ପଞ୍ଚାୟତ ବାସିନ୍ଦା ଏବଂ ରାଜନୀତି ଚଳଚଞ୍ଚଳ ହୋଇପଡିଛି l
ବିଜେଡ଼ି ସରକାରଙ୍କ ଶାସନ କାଳ ମଧ୍ୟରେ ଦୁଇଥର ଅଞ୍ଚଳବାସୀ ରାଜସ୍ୱ ମନ୍ତ୍ରୀ ଓ ପଞ୍ଚାୟତିରାଜ ମନ୍ତ୍ରୀଙ୍କୁ ଲିଖିତ ଭାବେ ନୂତନ ଭାବେ ମୋହନା ବ୍ଲକକୁ ଭାଗ କରି ଅନ୍ୟ ଦୁଇଟି ବ୍ଲକ ଗଠନ କରିବା ପାଇଁ ଦାବି ଉପସ୍ଥାପନ କରିଥିଲେ ମଧ୍ୟ କିଛି କାର୍ଯ୍ୟକାରୀ ହୋଇନଥିଲା । ଏବେ ନୂତନ ବ୍ଲକ ଗଠନ ଦାବି ଯୋର ଧରିଛି । ଅଡ଼ବା ଜୋନର ୧୫ଟି ପଞ୍ଚାୟତର ପ୍ରାୟ ୫୦ ହଜାରରୁ ଉର୍ଦ୍ଧ୍ବ ଜନସାଧାରଣ ଶିକ୍ଷା, ସ୍ୱାସ୍ଥ୍ୟ, ଗମନାଗମନ ଓ ବ୍ୟବସାୟ ନିମନ୍ତେ ଅଡ଼ବା ଉପରେ ନିର୍ଭର କରନ୍ତି L ଏଠାରେ ବ୍ଲକ ପ୍ରତିଷ୍ଠା ହେଲେ ଏହି ସବୁ ପଞ୍ଚାୟତ ଗୁଡିକ ନୂତନ ବ୍ଳକ ଠାରୁ ୩୦ ରୁ ୪୦ କିମି ଦୂରତ୍ବରେ ରହି ସରକାରଙ୍କ ସମସ୍ତ ସୁବିଧା ସୁଯୋଗ ପାଇପାରିବେ ।
ଏଣୁ ଏହି ଦାବି ଗୁଡ଼ିକୁ ଉପସ୍ଥାପନ କରିବା ପାଇଁ ଅଡ଼ବା ଜୋନର ୧୫ଟି ପଞ୍ଚାୟତର ନିର୍ବାଚିତ ସରପଞ୍ଚ, ସମିତି ସଭ୍ୟ,ସଭ୍ୟା , ପୂର୍ବତନ ଜନପ୍ରତିନିଧି ଓ ବୁଦ୍ଧିଜିବୀ ମାନଙ୍କ ଉପସ୍ଥିତିରେ ବ୍ଲକ ଗଠନ ନିମନ୍ତେ ବିଭିନ୍ନ ବିଷୟକୁ ନେଇ ଆଲୋଚନା କରାଯାଇଥିଲା । ଏ ସଂପର୍କରେ ଶୀଘ୍ର ରାଜ୍ୟ ଓ କେନ୍ଦ୍ର ସରକାରଙ୍କୁ ଦାବିପତ୍ର ଦେବା ପାଇଁ ସ୍ଥିର କରାଯାଇଛି । ରାଜ୍ୟ ସରକାର ଅଞ୍ଚଳବାସୀଙ୍କ ଦାବିକୁ ସମାଧାନ ନିଶ୍ଚୟ କରିବେ ବୋଲି ଆଶା ରଖିଥିବା କହିଛନ୍ତି ଅଞ୍ଚଳବାସୀ ଓ ବୁଦ୍ଧିଜୀବୀ । ଯଦି ସରକାର ଏହାକୁ ମାନ୍ୟତା ପ୍ରଦାନ ନ କରନ୍ତି ତେବେ ଆନ୍ଦୋଳନକୁ ଜୋରଦାର କରାଯିବ ବୋଲି କହିଛନ୍ତି ଜନପ୍ରତିନିଧି ଓ ଅଞ୍ଚଳବାସୀ । ଏହା ସଙ୍ଗେ ମୋହନା ବ୍ଲକ ଓଡ଼ିଶାର ଦ୍ୱିତୀୟ ବୃହତ୍ତମ ବ୍ଲକ ହୋଇଥିବା ସଙ୍ଗେ ମୋହନା ବ୍ଲକ ବର୍ତ୍ତମାନ ୩୯ ଟି ଗ୍ରାମ ପଞ୍ଚାୟତ କୁ ନେଇ ଗଠିତ । ତେଣୁ ମୋହନା ବ୍ଲକ ର ଚନ୍ଦ୍ରଗିରି ଅଞ୍ଚଳ ର ୧୧ ଟି ଗ୍ରାମ ପଞ୍ଚାୟତ କୁ ନେଇ ଆଉ ଏକ ବ୍ଲକ ଗଠନ ନିମନ୍ତେ ଚନ୍ଦ୍ରଗିରି ଅଞ୍ଚଳ ବାସୀ ରାଜ୍ୟ ସରକାରଙ୍କ ପାଖରେ ଦାବୀ ରଖିଥିବା ଜଣାପଡିଛି ।
