୨୩ ଜାନୁଆରୀ ୨୦୨୫ (ଓଡ଼ିଶା ତାଜା ନ୍ୟୁଜ୍) ବାଲୁଗାଁ :- ବାଲୁଗାଁ ଅବକାରୀ ବିଭାଗ ଏବଂ ଖୋର୍ଦ୍ଧା ମୋବାଇଲ ସ୍କ୍ୱାର୍ଡ ଗୁରୁବାର ୧୬ ନଂ ଜାତୀୟ ରାଜପଥର ନାଚୁଣୀ ଓଭର ବ୍ରିଜ ଏବଂ ଖୋର୍ଦ୍ଧା ମେଡିକାଲ ଛକ ନିକଟରୁ ଦୁଇଟି କାର ଯୋଗେ ଚୋରା ଚାଲାଣ ହେଉଥିବା ୬୮ ଗଞ୍ଜେଇ ଜବତ କରିବା ସହ ସମ୍ପୃକ୍ତ ୪ ଜଣ ବ୍ୟବସାୟୀଙ୍କୁ ଗିରଫ କରିଛନ୍ତି l ସେମାନେ ହେଲେ କନ୍ଧମାଳ ଅଞ୍ଚଳର ସୁଶାନ୍ତ ବିନ୍ଧାଣି (୪୦), ରଂଜିତ ଭୋଇ (୨୪), ସଚ୍ଚିଦାନନ୍ଦ ନାଗ ( ୩୦) ଏବଂ ଆଶୁତୋଷ ମହାକୁଢ଼ ( ୨୦) l
ଖବର ନେବାରେ ଜଣାଯାଇଛି, ଖୋର୍ଦ୍ଧା ଅବକାରୀ ଅଧିକ୍ଷକ ସୁମତି ତ୍ରିପାଠୀଙ୍କ ନିର୍ଦେଶକ୍ରମେ ଟାଙ୍ଗୀ ରେଞ୍ଜ ନିରୀକ୍ଷକ ରାଧାକାନ୍ତ ଭୋଇଙ୍କ ତତ୍ୱାବଧାନରେ ବାଲୁଗାଁ ଅବକାରୀ ଅଧିକାରୀ ସୁଜିତ କୁମାର ମୁଦୁଲି ସଦଳେବେଳେ ଗୁରୁବାର ବାଲୁଗାଁ ଠାରୁ ନାଚୁଣୀ ମଧ୍ୟରେ ରାଜପଥରେ ପେଟ୍ରୋଲିଂ କରୁଥଲେ l ମଧ୍ୟାହ୍ନ ପ୍ରାୟ ସାଢେ ୧୨ ସମୟରେ ନାଚୁଣୀ ଓଭର ବ୍ରିଜ ଠାରେ ଅବକାରୀ ଟିମକୁ ଦେଖି ଓଡି ୦୨ ବି ଏଫ ୩୬୮୬ ନମ୍ବର ବିଶିଷ୍ଟ ନାଲି ରଙ୍ଗର ଏକ କିଆ ସେଲଟସ କାର ଡ୍ରାଇଭର ଏବଂ ବସିଥିବା ଅନ୍ୟ ଜଣେ ଯୁବକ ଗାଡି ରଖି ଦୌଡ଼ିଥିଲେ l ଅବକାରୀ ଟିମ ଗୋଡ଼ାଇ ସେମାନଙ୍କୁ କାବୁ କରିବାରେ ସଫଳ ହୋଇଥିଲେ l
କାରକୁ ତାଲାସିବାରେ ମଝି ସିଟ ତଳୁ ୪୫ କେଜି ଓଜନର ଦୁଇ ବସ୍ତା ଗଞ୍ଜେଇ ମିଳିଥିଲା l ସମ୍ପୃକ୍ତ ଡ୍ରାଇଭରକୁ ପଚରାଉଚରା କରାଯିବାରେ ଆଉ ଏକ କାରରେ ଗଞ୍ଜେଇ ଚାଲାଣ ନେଇ ସୂଚନା ମିଳିଥିଲା l ସଙ୍ଗେ ସଙ୍ଗେ ଖବର ପାଇ ଅବକାରୀ ମୋବାଇଲ ସ୍କ୍ୱାର୍ଡ ଖୋର୍ଦ୍ଧା ମେଡିକାଲ ଛକ ନିକଟରୁ ଓ ଡ଼ି ୦୨ସି ବି ୦୨୬୬ ନମ୍ବର ଏକ ଧଳା ରଙ୍ଗର ସ୍ବିଫ୍ଟ ଡିଜାୟାର କାରକୁ ଅଟକାଇ ଅନୁରୂପ ଭାବେ ୨୩ କେଜି ଗଞ୍ଜେଇ ଜବତ କରିବା ସହ ଦୁଇ ଜଣଙ୍କୁ ଗିରଫ କରିଥିଲେ l
ସେମାନଙ୍କ ଠାରୁ ଦୁଇଟି କାର ସମେତ ମୋଟ ୬୮ କେଜି ଗଞ୍ଜେଇ ଏବଂ ୫ଟି ମୋବାଇଲ ଫୋନ ଜବତ କରାଯାଇଛି l ବାଲୁଗାଁ ଅବକାରୀ ବିଭାଗ କେଶ ନଂ ୨୩୧ /୨୫ ଏବଂ ମୋବାଇଲ ସ୍କ୍ୱାର୍ଡ କେଶ ନଂ ୨୨୫/୨୫ ରେ ଦୁଇଟି ମାମଲା ରୁଜୁ କରି ୪ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଛି l ଏହି ଚଢ଼ାଉରେ ମୋବାଇଲ ସ୍କ୍ୱାର୍ଡ ଉପ ନିରୀକ୍ଷକ ସୁଜିତ ନାଗ, ଜିତେନ୍ଦ୍ର ହେମ୍ରମ, ବାଲୁଗାଁ ଅବକାରୀ ବିଭାଗ ଏ ଏସ ଆଇ ସଞ୍ଜୟ ସୁବୁଦ୍ଧି, ଆଶିଷ ପ୍ରଧାନ, ତୁଷାରକାନ୍ତ ଚମ୍ପତ୍ତି, ଚିନ୍ମୟୀ ଦାସ ଏବଂ କାଳୁ ପ୍ରଧାନ ସାମିଲ ହୋଇଥିଲେ l
