୧୦ ଜାନୁଆରୀ ୨୦୨୫ (ଓଡ଼ିଶା ତାଜା ନ୍ୟୁଜ୍ ) ବୋଲଗଡ଼ :-> ସରକାର ଗୋସମ୍ପଦ ଚାଲାଣ ନିଷେଧର ସଚେତନତା ଓ ଏହାକୁ ରୋକିବାକୁ ଚରମ ଦଣ୍ଡ ବ୍ୟବସ୍ଥାର ନାରା ଦେଉଥିବା ବେଳେ ଗୋ-ସମ୍ପଦ ଚୋରା ଚାଲାଣକାରୀ ଏହାକୁ ତିଳେମାତ୍ର ଭ୍ରୁକ୍ଷେପ ନକରି ଦିନକୁ ଦିନ ଅଧିକରୁ ଅଧିକତର ପଶୁସମ୍ପଦ ଚାଲାଣ କରୁଥିବାର ଦୃଷ୍ଟିକୁ ଆସୁଛି । ଏହି ପରିପ୍ରେକ୍ଷୀରେ ଆଜି ଖୋର୍ଦ୍ଧା ଜିଲ୍ଲା ପୋଲିସ ପକ୍ଷରୁ ଏକ ଗୋ-ସମ୍ପଦ ଚାଲାଣ ଗାଡିକୁ ଜବତ କରା ଯାଇଅଛି ।
ଘଟଣାକ୍ରମେ ନଂ-RJ51 GA3624 ବିଶିଷ୍ଟ ଏକ ରାଜସ୍ଥାନ କଣ୍ଟେନର ଗାଡିରେ ୨୮ଗୋଟି ଗୋ-ସମ୍ପଦକୁ ନେଇ ହାଇଦ୍ରାବାଦରୁ କଳିକତାକୁ ଚାଲାଣ କରା ଯାଉଥିଲା । କୌଣସି ସୂତ୍ରରୁ ଖୋର୍ଦ୍ଧା ଶାଖା ବଜରଙ୍ଗୀ ଦଳର ବରିଷ୍ଠ ସଦସ୍ୟ ସୌମ୍ୟ ରଞ୍ଜନ ସ୍ୱାଇଁ ଖବର ପାଇ ଜିଲ୍ଲା ପୋଲିସର ସହାୟତା ଲୋଡିଥିଲେ । ତେବେ ଜିଲ୍ଲା ପୋଲିସର ନିର୍ଦେଶକ୍ରମେ ଓଡିଶା ରାଜ୍ୟ ଅର୍ମେଡ଼ ପୋଲିସ ସହାୟତାରେ ସମ୍ପୃକ୍ତ ଗୋ ଚାଲାଣ ଜବତ ଗାଡିକୁ ବୋଲଗଡ଼ ବ୍ରହ୍ମପୁରା ଗୋଶାଳାରେ ଭର୍ତ୍ତି କରିବା ନିମନ୍ତେ ନିର୍ଦେଶ ଦିଆଯିବା ସହ ଗାଡି ଚାଳକ ସମେତ ୩ଜଣ ଚାଲାଣକାରୀଙ୍କୁ ଗିରଫ କରା ଯାଇଅଛି ।
ଗୋସମ୍ପଦ ଚାଲାଣ ଗାଡି ବୋଲଗଡ଼ରେ ପହଂଚିବା କ୍ଷଣି ବୋଲଗଡ଼ ଶାଖା ବଜରଙ୍ଗୀ ଦଳ ପକ୍ଷରୁ ବରିଷ୍ଠ ସଦସ୍ୟ ମୁକେଶ ସାମନ୍ତରାୟ,ଇତେଶ ବେହେରା,ତରୁଣ ସାହୁ ଓ ଅମ୍ଳାନ ଜ୍ୟୋତି ସାହୁଙ୍କ ବଳିଷ୍ଠ ଉଦ୍ୟମ ତଥା ତତ୍ୱବଧାନରେ କଣ୍ଟେନରୁ ଗୋମାତାମାନଙ୍କୁ ଉଦ୍ଧାର କରାଯାଇ ବ୍ରହ୍ମପୁରାସ୍ଥିତ ଗୋଶାଳାରେ ସୁରକ୍ଷା ନିମନ୍ତେ ଭର୍ତ୍ତି କରାଯାଇଥିଲା।ତେବେ ଅବାଧ ଗୋ-ଚାଲାଣକାରୀଙ୍କ ଏତାଦୃଶ ଅମାନୁଷିକ କାର୍ଯ୍ୟକୁ ସ୍ଥାନୀୟ ବଜାରଙ୍ଗୀଦଳ ପକ୍ଷରୁ ଦୃଢ଼ ନିନ୍ଦା କରାଯିବା ସହ ବୁଦ୍ଧିଜୀବୀ ତଥା ଗୋପ୍ରେମୀମାନେ ଦୁଃଖ ଓ କ୍ଷୋଭ ପ୍ରକାଶ କରିଛନ୍ତି ।
