୧୮ଡିସେମ୍ବର ୨୦୨୪ (ଓଡ଼ିଶା ତାଜା ନ୍ୟୁଜ୍ ) ଭୁବନେଶ୍ୱର :-> ଓଡ଼ିଶାର ପାଣିକୋଇଲିସ୍ଥିତ ଟ୍ରମା କେୟାରର ଡିଜାଇନ୍ ଏବଂ ବରଗଡ଼ ଜିଲ୍ଲା ମୁଖ୍ୟ ଚିକିତ୍ସାଳୟ (ଡିଏଚଏଚ୍)ରେ କର୍କଟ ଚିକିତ୍ସା କେନ୍ଦ୍ରର ଅସାଧାରଣ ଡିଜାଇନ୍ ପାଇଁ ଓଡ଼ିଶାର ସ୍ଥପତି ତାରା ପ୍ରସାଦ ଧଳଙ୍କୁ ‘ହେଲଥକେୟାର ଆର୍କିଟେକ୍ଟ ଅଫ ଦି ଇୟର ୨୦୨୪’ ପୁରସ୍କାରରେ ସମ୍ମାନିତ କରାଯାଇଛି । ସାଉଥ୍ ଏସିଆ ପ୍ୟାସିଫିକ୍ ହେଲଥକେୟାର ସମିଟ୍ ଆଣ୍ଡ ବିଜନେସ୍ ଆୱାର୍ଡ୨୦୨୪ ଅବସରରେ ‘ବ୍ରାଣ୍ଡସକାଉନସିଲ ରେଟିଂସ୍’ର ସମ୍ମାନନୀୟ ଜୁରି ସଦସ୍ୟମାନେ ଶ୍ରୀ ଧଳକୁ ଏହି ସମ୍ମାନ ପ୍ରଦାନ କରିଛନ୍ତି । ସ୍ୱାସ୍ଥ୍ୟସେବା କ୍ଷେତ୍ର ପ୍ରତି ତାଙ୍କ ଉଲ୍ଲେଖନୀୟ ଅବଦାନ ଗତ ତା-୧୨-୧୨-୨୦୨୪ ରିଖ ନୂଆଦିଲ୍ଲୀସ୍ଥିତ ଭାରତ ଅନ୍ତର୍ଜାତୀୟ କେନ୍ଦ୍ରଠାରେ ଶ୍ରୀଯୁକ୍ତ ଧଳଙ୍କୁ ପୁରସ୍କୃତ କରାଯାଇଛି ।
ଯାଜପୁର ପାଣିକୋଇଲିଠାରେ ୧୬ ନମ୍ବର ଜାତୀୟ ରାଜପଥ କଡ଼ରେ ୭.୦୭ ଏକର ଜାଗାରେ ଥିବା ଟ୍ରମା କେୟାର ଅଭିନବ ଡିଜାଇନ୍ ଓ ଇଞ୍ଜିନିୟରିଂ ଉତ୍କର୍ଷତାର ପ୍ରମାଣ । ଓଡ଼ିଶାର ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ଏହି ଅତ୍ୟାଧୁନିକ (ଜି+୫) ହସ୍ପିଟାଲ ବ୍ଲକ୍ କାର୍ଯ୍ୟକ୍ଷମ ହୋଇଥିଲା । ରାଜ୍ୟର ଦ୍ୱିତୀୟ ସରକାରୀ ନିର୍ମିତ ସ୍ୱାସ୍ଥ୍ୟକେନ୍ଦ୍ରକୁ ଏଭଳି ଜାତୀୟ ମାନ୍ୟତା ପ୍ରଦାନ କରାଯାଇଛି । ପ୍ରାୟ ୨,୧୦,୦୦୦ ବର୍ଗଫୁଟ ପରିମିତ ଏହି କୋଠାରେ ଜାତୀୟ ଓ ଅନ୍ତର୍ଜାତୀୟ ମାର୍ଗଦର୍ଶିକା ଅନୁଯାୟୀ ଅତ୍ୟାଧୁନିକ ସ୍ଥାପତ୍ୟ ଡିଜାଇନ୍ ଅନ୍ତର୍ଭୁକ୍ତ । ଜାତୀୟ ରାଜପଥ ସ୍ତରଠାରୁ ୨୦ ଫୁଟ ତଳକୁ ଥିବା ଏହି ସ୍ଥାନରେ ୨୫ ଫୁଟ ଚଉଡ଼ା ପକ୍କା ରାସ୍ତା, ପଥଚାରୀ ପଥ, ପର୍ଯ୍ୟଟକ ଓ ଆମ୍ବୁଲାନ୍ସ ପାଇଁ ପୃଥକ ପାର୍କିଂ ଅଂଚଳ ଏବଂ ଜରୁରୀକାଳୀନ ସେବା, ଆଇପିଡି ସୁବିଧା ଏବଂ ସେବା ଯୋଗାଣ ଭଳି ନିର୍ଦ୍ଦିଷ୍ଟ କାର୍ଯ୍ୟ ପାଇଁ ଏକାଧିକ ପ୍ରବେଶ ପଥ ରହିଛି ।
ଅଭିନବ ଡିଜାଇନ୍ ବୈଶିଷ୍ଟ୍ୟ :
ଟ୍ରମା କେୟାର ସୁବିଧାରେ ଟି-ଆକୃତିର ଲେଆଉଟ୍ ରହିଛି ଏବଂ ଆଧୁନିକ ଭିତିଭୂମିକୁ ସମନ୍ୱିତ କରାଯାଇଛି । ସେଥିରେ କେନ୍ଦ୍ରୀୟ ଭାବରେ ବାତାନୁକୂଳିତ ସ୍ଥାନ, ଏକ ବିସ୍ତୃତ ମେଡିକାଲ ଗ୍ୟାସ୍ ପାଇପଲାଇନ୍ ବ୍ୟବସ୍ଥା, ବର୍ଷା ଜଳ ସଂରକ୍ଷଣ ଏବଂ ଏକ ଦକ୍ଷ ସ୍ୱେରେଜ୍ ଏବଂ ବର୍ଜ୍ୟବସ୍ତୁ ବିଶୋଧନ ବ୍ୟବସ୍ଥା ରହିଛି । ଏହାର ଚିନ୍ତାଶୀଳ ଡିଜାଇନ୍ ଉଭୟ କାର୍ଯ୍ୟକାରିତା ଏବଂ ରୋଗୀ ଆରାମକୁ ପ୍ରାଥମିକତା ଦେଇଛି ।
ପ୍ରମୁଖ ସୁବିଧାଗୁଡ଼ିକ ମଧ୍ୟରେ ରହିଛି:
– ୟୁଟିଲିଟି ଲିଫ୍ଟ ସୁବିଧା ଥିବା ୫ଟି ଅଗ୍ନି ନିଷ୍କାସନ ସିଡି ଏବଂ ଏକ ଡାର୍ଟି ଷ୍ଟେୟାରକେସ
– ୨୬ ଯାତ୍ରୀ ବିଶିଷ୍ଟ ୪ଟି ହସ୍ପିଟାଲ ଲିଫ୍ଟ ଓ ରାମ୍ପ ବ୍ୟବସ୍ଥା
– କର୍ମଚାରୀ, ରୋଗୀ, ପରିଦର୍ଶକ ଏବଂ ଭିନ୍ନକ୍ଷମବ୍ୟକ୍ତିଙ୍କ ପାଇଁ ପୃଥକ ଶୌଚାଳୟ
କାର୍ଯ୍ୟକ୍ଷମ ମୁଖ୍ୟାଂଶ :
ଏହି ଡାକ୍ତରଖାନାର ପାଂଚଟି ମହଲାରେ ୨୦୦ ଶଯ୍ୟା ରହିଛି । ପ୍ରତ୍ୟେକ ସ୍ତର ନିର୍ଦ୍ଦିଷ୍ଟ ଡାକ୍ତରୀ କାର୍ଯ୍ୟ ପାଇଁ ରଣନୀତିକ ଭାବରେ ଡିଜାଇନ୍ କରାଯାଇଛି :
– ତଳ ମହଲା: ଷ୍ଟିଲ୍ଟ ପାର୍କିଂ, କେନ୍ଦ୍ରୀୟ ରୋଷେଇ ଘର, ଖାଦ୍ୟ ବିଭାଗ ଏବଂ ରକ୍ଷଣାବେକ୍ଷଣ ସୁବିଧା
– ପ୍ରଥମ ମହଲା: ଟ୍ରାଏଜ୍, ଟ୍ରମା ଆଇସିୟୁ, ରେବିଜ୍ ଏବଂ ବର୍ଣ୍ଣ ଜରୁରୀକାଳୀନ ଯତ୍ନ ସମେତ ଜରୁରୀକାଳୀନ ସେବା ଏବଂ ସିଟି, ଏମଆରଆଇ ଏବଂ ଏକ୍ସ-ରେ ପାଇଁ ଡାଇଗ୍ନୋଷ୍ଟିକ୍ ଶାଖା
– ଦ୍ୱିତୀୟ ମହଲା: ମଡ୍ୟୁଲାର ଅପରେସନ ରୁମ୍ ଏବଂ ବର୍ଣ୍ଣ ଇଂଜୁରି ୱାର୍ଡ
-ତୃତୀୟ ମହଲା: ଆଇସିୟୁ ସୁବିଧା, ପ୍ରଶାସନିକ କାର୍ଯ୍ୟାଳୟ, ବ୍ଲଡ ବ୍ୟାଙ୍କ ଏବଂ ଫିଜିଓଥେରାପି ସେବା
-ଚତୁର୍ଥ ଓ ପଞ୍ଚମ ମହଲା: ସାଧାରଣ ୱାର୍ଡ, କେବିନ୍ ଓ ବିଭାଗୀୟ କାର୍ଯ୍ୟାଳୟ
ଓଡ଼ିଶାର ସ୍ୱାସ୍ଥ୍ୟସେବା ଭିତିଭୂମିରେ ମାଇଲଖୁଂଟ: ଅନ୍ୟୂନ ୧୦୧ କୋଟି ଟଙ୍କା ବ୍ୟୟରେ ଏହି ଅତ୍ୟାଧୁନିକ ହସ୍ପିଟାଲ୍ ପୂର୍ତ ବିଭାଗ ଦ୍ୱାରା ନିର୍ମାଣ କାର୍ଯ୍ୟ କରାଯାଇ ଗତ ୩୧-୧୨-୨୦୨୩ ରିଖ ଦିନ କାର୍ଯ୍ୟ ଶେଷ କରାଯାଇଥିଲା । ଏତଦ୍ ବ୍ୟତୀତ ବରଗଡ଼ ଜିଲ୍ଲା ମୁଖ୍ୟ ଚିକିତ୍ସାଳୟ ପରିସରରେ ପୂର୍ବ ବିଭାଗ ଦ୍ୱାରା ନିର୍ମାଣ କରାଯାଇଥିବା ନବନିର୍ମିତ କର୍କଟ ରୋଗ ଚିକିତ୍ସା କେନ୍ଦ୍ରକୁ ମଧ୍ୟ ସମ୍ବର୍ଦ୍ଧିତ କରାଯାଇଥିଲା । ଉଲ୍ଲେଖଯୋଗ୍ୟ, ଏହି ବରଗଡ଼ ସ୍ଥିତ କର୍କଟ ଚିକିତ୍ସାଳୟକୁ ଏହା ଆଗରୁ ଜାତୀୟ ପ୍ରେଟିକ୍ ଆୱାର୍ଡ ମଧ୍ୟ ପ୍ରଦାନ କରାଯାଇଥିଲା ।
ପୂର୍ତ ବିଭାଗ ଦ୍ୱାରା ସମ୍ପୂର୍ଣ୍ଣ କରାଯାଇଥିବା ଏହି ଦୁଇ ସ୍ୱାସ୍ଥ୍ୟ ସେବା ଭିତିଭୂମିକୁ ସର୍ବସାଧାରଣରେ ପ୍ରଶଂସା କରାଯାଇଛି । ଏହି ପୁରସ୍କାର ଓଡ଼ିଶା ପାଇଁ ଏକ ଉଲ୍ଲେଖନୀୟ ଉପଲବ୍ଧି ଯାହା ସ୍ୱାସ୍ଥ୍ୟ ସେବା ଭିତିଭୂମିରେ ଉନ୍ନତି ଆଣିବା ଏବଂ ଅନ୍ତର୍ଭୁକ୍ତୀକରଣ ଓ ସ୍ଥାୟୀ ଡାକ୍ତରଖାନା ଡିଜାଇନରେ ଏକ ନୂତନ ମାନଦଣ୍ଡ ସ୍ଥାପନ କରିବା ପାଇଁ ରାଜ୍ୟର ପ୍ରତିବଦ୍ଧତାକୁ ଦର୍ଶାଉଛି । ତାରା ପ୍ରସାଦ ଧଳଙ୍କ ଅଗ୍ରଣୀ କାର୍ଯ୍ୟ ଓଡ଼ିଶାକୁ ସ୍ୱାସ୍ଥ୍ୟସେବା କ୍ଷେତ୍ରରେ ସ୍ଥାପତ୍ୟ ଉତ୍କର୍ଷତାର ଜାତୀୟ ମାନଚିତ୍ରରେ ସ୍ଥାନିତ କରିଛି ଏବଂ ଏହି କ୍ଷେତ୍ରରେ ଭବିଷ୍ୟତର ନବସୃଜନକୁ ପ୍ରେରଣା ଦେଇଛି ।
