୩୦ ନଭେମ୍ବର ୨୦୨୪ (ଓଡ଼ିଶା ତାଜା ନ୍ୟୁଜ୍ ) ଭାପୁର :-> ନୟାଗଡ ଜିଲ୍ଲା ଫତେଗଡ ଥାନା ଅଂଚଳରେ ଚୋରା ନିଶା କାରବାର ଦିନକୁ ଦିନ ବୃଦ୍ଧି ପାଉଥିବାବେଳେ ଅବକାରୀ ବିଭାଗ ପକ୍ଷରୁ ୨୪ ଲିଟର ଦେଶି ମଦ ଜବତ କରିବା ସହିତ ଦୁଇ ଅଭିଯୁକ୍ତଙ୍କୁ କୋର୍ଟ ଚାଲାଣ କରିଛି । ଅବକାରୀ ବିଭାଗ ସୂତ୍ରରୁ ପ୍ରକାଶ, ବିଶେଷ ସୂତ୍ରରୁ ଖବରପାଇ ବିଭାଗୀୟ ଥାନା ଉପ ନିରୀକ୍ଷକ ଦୀପକ କୁମାର ଜେନାଙ୍କ ନେତୃତ୍ୱରେ ୪ ଜଣିଆ ଏକ ଟିମ୍ ଶୁକ୍ରବାର ରାତିରେ ଫତେଗଡ ଥାନା ଅନ୍ତର୍ଗତ ବଡସହରା ଗ୍ରାମରେ ଚଢାଉ କରି ୧୧ ଲିଟର ଦେଶି ମଦ ଜବତ କରିବା ସହିତ ନବ ପରିଡ଼ା(୪୫) କୁ ଗିରଫ କରିଥିଲେ ।
ପୁନଃଶ୍ଚ, ନିମାଣୀ ପଞ୍ଚାୟତ ବାଦଭୁଇଁ ଗ୍ରାମରେ ଚଢ଼ାଉ କରି ୧୩ ଲିଟର ଦେଶି ମଦ ଜବତ କରିବା ସହିତ ଅଭିଯୁକ୍ତ ବାଲିଆ ବେହେରାଙ୍କ ପୁଅ ପ୍ରକାଶ ବେହେରା (୨୭) ଙ୍କୁ ଗିରଫ କରିଥିଲେ । ଅବକାରୀ ବିଭାଗ ପକ୍ଷରୁ ଶନିବାର ଦିନ ଉଭୟ ଅଭିଯୁକ୍ତଙ୍କ ନାମରେ ମାମଲା ରୁଜୁ କରିବା ସହିତ ପ୍ରକାଶ ବେହେରା ଏବଂ ନବ ବେହେରାଙ୍କୁ କୋର୍ଟ ଚାଲାଣ କରାଯାଇଛି । ମାତ୍ର ସେଠାରେ ସେମାନଙ୍କର ଜାମିନ ନାମଞ୍ଜୁର ହେବାରୁ ଜେଲ ହାଜତକୁ ପଠାଇ ଦିଆଯାଇଛି । ଉକ୍ତ ଚଢାଉ ସମୟରେ ଅବକାରୀ ବିଭାଗର କର୍ମଚାରୀ ଲକ୍ଷ୍ମୀଧର ବେହେରା, ପ୍ରତ୍ୟୁଷ ରଞ୍ଜନ ଦେହୁରୀ, ମୀତାରାଣୀ ନାୟକ ପ୍ରମୁଖ ସାମିଲ ହୋଇଥିଲେ । ଅଭିଯୁକ୍ତ ପ୍ରକାଶ ବେହେରାଙ୍କ ନାମରେ ଏକାଧିକ ମାମଲା ରହିଥିବା ଅବକାରୀ ବିଭାଗ ଥାନା ଉପ ନିରୀକ୍ଷକ ଶ୍ରୀ ଜେନାଙ୍କଠାରୁ ପ୍ରକାଶ ।
