୧୭ ନଭେମ୍ବର ୨୦୨୪ ( ଓଡ଼ିଶା ତାଜା ନ୍ୟୁଜ୍ ) ବାଙ୍କୀ :-> ଡମପଡ଼ା ବ୍ଲକ ଅନ୍ତର୍ଗତ ରଗଡି ଗ୍ରାମର ଗୁଣ୍ଡିଚା ପଡିଆ ଠାରେ ୫ଦିନ ଧରି ଚାଲିଥିବା ଶ୍ରୀଶ୍ରୀ କାର୍ତ୍ତିକେଶ୍ୱର ମହୋତ୍ସବ ଉଦ୍ଯାପିତ ହୋଇଯାଇଛି । ଏହି ଉପଲକ୍ଷେ ଆୟୋଜିତ ଏକ ସଭାରେ ବାଙ୍କୀର ପ୍ରାକ୍ତନ ବିଧାୟକ ପ୍ରଭାତ କୁମାର ତ୍ରିପାଠୀ ମୁଖ୍ୟଅତିଥି ଭାବେ ଯୋଗଦେଇ ଗ୍ରାମର କଳା, ସାହିତ୍ୟ ଓ ସଂସ୍କୃତି ସହିତ ପୂଜ୍ୟପୂଜାର ମହାନ୍ ପରମ୍ପରାକୁ ଏହି ମହୋତ୍ସବ ଅକ୍ଷୂର୍ଣ୍ଣ ରଖିଥିବା ତାଙ୍କ ବକ୍ତବ୍ୟରେ କହିଥିଲେ ।
ମୁଖ୍ୟବକ୍ତା ଭାବେ ଡମପଡ଼ା ବ୍ଲକ ଅଧ୍ୟକ୍ଷ ପ୍ରଣବ କିଶୋର ପଟେଲ , ସମ୍ମାନୀୟ ଅତିଥି ଭାବେ ବାଙ୍କୀ କେନ୍ଦ୍ର ସମବାୟ ବ୍ୟାଙ୍କ ସଭାପତି ସୁବାସ ଚନ୍ଦ୍ର ପାଢୀ, ଏନ୍.ଏ.ସି କାଉନସିଲର ସନାତନ ବେହେରା , ସମାଜସେବୀ ଅନୁପବଥୁଆଲ୍ ଯୋଗଦେଇ ମହୋତ୍ସବ ମାଧ୍ୟମରେ ଗ୍ରାମର ହଜିଯାଇଥିବା ପ୍ରତିଭାମାନଙ୍କୁ ଏହି ମଞ୍ଚ ମାଧ୍ୟମରେ ଲୋକଲୋଚନକୁ ଆଣିବା ପାଇଁ ଯେଉଁ ପ୍ରୟାସ ଜାରି ରହିଛି ତାହାର ପ୍ରଶଂସା କରିଥିଲେ ।
ଏହି କାର୍ଯ୍ୟକ୍ରମରେ କମିଟିର ସଭାପତି ତଥା ପଞ୍ଚାୟତ ସରପଞ୍ଚ ବିଜୟଲକ୍ଷ୍ମୀ ମହାନ୍ତି ସଭାପତିତ୍ୱ କରିଥିବା ବେଳେ ସୂର୍ଯ୍ୟନାରାୟଣ ରାଉତ ଅତିଥି ପରିଚୟ ପ୍ରଦାନ କରିଥିଲେ । କମିଟିର ସଂପାଦକ କ୍ଷୀରୋଦ କୁମାର ପଟ୍ଟନାୟକ ସଂପାଦକୀୟ ବିବରଣୀ ପାଠ କରିଥିଲେ । ବିଭିନ୍ନ ପ୍ରତିଯୋଗିତା ଏବଂ ପରୀକ୍ଷାରେ ସେର୍ବୋଚ୍ଚ ନମ୍ବର ରଖିଥିବା ଛାତ୍ରଛାତ୍ରୀମାନଙ୍କୁ ମୁଖ୍ୟଅତିଥି ଶ୍ରୀ ତ୍ରିପାଠୀ ମାନପତ୍ର ସହ ଉପଢ଼ୌକନ ଦେଇ ପୁରସ୍କୃତ କରିଥିଲେ । ଶେଷରେ ରଗଡି ପଂଚାୟତର ସମିତି ସଭ୍ୟ ତଥା ଆଇନଜୀବୀ ଭାଗୀରଥି ପାଣି ଧନ୍ୟବାଦ ଅର୍ପଣ କରିଥିଲେ ।
