୩୦ ଅକ୍ଟୋବର ୨୦୨୪ (ଓଡ଼ିଶା ତାଜା ନ୍ୟୁଜ୍ ) ବାଙ୍କୀ :-> ଜୀବିତ ମହିଳାଙ୍କୁ ମୃତ ଦର୍ଶାଇ ରେସନକାର୍ଡରୁ ନାମ କାଟି ଦେଇଥିବା ବାଙ୍କୀ ବ୍ଲକ ବିଡିଓଙ୍କ ନିକଟରେ ଲିଖିତ ଅଭିଯୋଗ କରିଛନ୍ତି ସଂପୃକ୍ତ ମହିଳା । ବାଙ୍କୀ ବ୍ଲକ ଅନ୍ତର୍ଗତ ସୁବର୍ଣ୍ଣପୁର ଗ୍ରାମର ରମେଶ ଖଟୁଆଙ୍କ ପତ୍ନୀ ଅଶାନ୍ତି ଖଟୁଆ (୫୫) ବର୍ଷଙ୍କ ନାମ ରାସନକାର୍ଡରୁ ଗତ ଫେବୃୟାରୀ ମାସରେ କଟି ଯାଇଥିଲେ ମଧ୍ୟ ଅଶାନ୍ତି ଜାଣି ନଥିଲେ । କୌଣସି ସୂତ୍ରରୁ ଖବର ପାଇ ଘଟଣା ସଂପର୍କରେ ଅଶାନ୍ତି ସୁବର୍ଣ୍ଣପୁର ସେବାସମବାୟ ସମିତିରେ ପଚାରିବାରୁ ତାଙ୍କ ନାମ କଟିଯାଇଥିବା ସେ ଜାଣିଲେ ।
ଏ ସଂପର୍କରେ ବାଙ୍କୀ ଯୋଗାଣ ବିଭାଗରେ ଅଶାନ୍ତି ପଚାରିବାରୁ ଜାଣିଲେ ଯେ ସୁବର୍ଣ୍ଣପୁର ସେବାସମବାୟ ସମିତି ପକ୍ଷରୁ ମୃତ ବୋଲି ଦର୍ଶାଇ ତୁମ ନାମ କାଟିବାକୁ ଲିଖିତ ଭାବେ ଦେବା ପରେ କଟାଯାଇଛି । ରାସନକାର୍ଡ ଧାରୀ ଅଶାନ୍ତି ରାଉତ ଜୀବିତ ଥିବା ବେଳେ ଅଶାନ୍ତି ରାଉତଙ୍କୁ କାଗଚପତ୍ରରେ କିପରି ମୃତ ଘୋଷଣା କରାଯାଇଥିଲା ତାହା ଆଶ୍ଚର୍ଯ୍ୟଜନକ ବିଷୟ ହୋଇପଡିଛି ।
ଏଭଳି ଘଟଣାର ତଦନ୍ତ କରାଯାଇ ଏଥିରେ ସଂପୃକ୍ତ ଥିବା ବ୍ୟକ୍ତିଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବାକୁ ଅଶାନ୍ତି ବାଙ୍କୀ ବ୍ଲକ ବିଡିଓ ଅଂଶୁମାନ ଦାସଙ୍କ ନିକଟରେ ଲିଖିତ ଅଭିଯୋଗ କରିଛନ୍ତି । ବିଡିଓ ଶ୍ରୀ ଦାସ ଏହି ଘଟଣାରେ ଆଶ୍ଚର୍ଯ୍ୟ ହେବା ସହିତ ଘଟଣାର ତଦନ୍ତ ନିମନ୍ତେ ବାଙ୍କୀ ସାଧାରଣ ବଣ୍ଟନ ବିଭାଗ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି । ଏହି ଘଟଣାରେ ତଦନ୍ତ କରାଯାଇ ସେବା ସମବୟ ସମିତିର ସଂପୃକ୍ତ କର୍ମଚାରୀଙ୍କ ଉପରେ ଦୃଢ଼ କାର୍ଯ୍ୟାନୁଷ୍ଠାନ ନିମନ୍ତେ ଦାବି କରାଯାଇଛି ।
