୧୦ ଅକ୍ଟୋବର ୨୦୨୪ (ଓଡ଼ିଶା ତାଜା ନ୍ୟୁଜ୍ ) ବୋଲଗଡ଼ :-> ଖୋର୍ଦ୍ଧା ଜିଲ୍ଲା ବୋଲଗଡ଼ ବ୍ଲକ୍ ଟିକାତାଳସ୍ଥ ଶ୍ରୀରାମକୃଷ୍ଣ ସେବାଶ୍ରମ ଆନୁକୂଲ୍ୟରେ କୋଲକାତାସ୍ଥ ମୋଇନା ସେବା ଫାଉଣ୍ଡେସନ ସହାୟତାରେ ଖଣ୍ଡପଡା ବ୍ଲକ୍ କଣ୍ଟିଲୋ ନିକଟସ୍ଥ ମାରଡ଼ା କେନ୍ଦୁପଲ୍ଲୀ ଗ୍ରାମରେ ପ୍ରତିଷ୍ଠିତ “ମା’ ସାରଦା ସେବାଶ୍ରମ”ରେ ଏକ ପୋଷାକ ବିତରଣ ଶିବିର ଅନୁଷ୍ଠିତ ହୋଇଯାଇଛି ।
ଆଶ୍ରମର ପ୍ରତିଷ୍ଠାତା ସ୍ୱାମୀ ଭାଗବତାନନ୍ଦ ପୁରୀ ମହାରାଜଙ୍କ ଦ୍ୱାରା ୪୩ ଜଣ ଗରିବ ଆଦିବାସୀ ଛାତ୍ରଛାତ୍ରୀଙ୍କୁ ପୋଷାକ ବିତରଣ କରାଯାଇଥିଲା । ଏହି କାର୍ଯ୍ୟକ୍ରମରେ ସୁଶ୍ରୀ ବ୍ରଜଶ୍ରୀ ସାହୁ ଓ ସୌରଭ ଡିଙ୍ଗଲ ସହାୟତା କରିଥିଲେ । ସୁଶ୍ରୀ ସାହୁଙ୍କ ଦ୍ୱାରା ପ୍ରତିଷ୍ଠିତ ମା’ ସାରଦା ସେବାଶ୍ରମରେ “ଶଶୀକଳା-ଧାନୁକା ଜ୍ଞାନମ୍” କାର୍ଯ୍ୟକ୍ରମ ମାଧ୍ୟମରେ ୪୩ଜଣ ଗରିବ ଛାତ୍ରଛାତ୍ରୀଙ୍କୁ ନିୟମିତ ଶିକ୍ଷାଦାନ, ପ୍ରାର୍ଥନା ଓ ନୀତିଶିକ୍ଷା ଦିଆଯାଉଛି ।
ତତ୍ ସହିତ “ଶଶୀକଳା-ଧାନୁକା ଆରୋଗ୍ୟମ୍” ଯୋଜନାରେ ଅଭିଜ୍ଞ ଡାକ୍ତରଙ୍କ ମାଧ୍ୟମରେ ଗ୍ରାମାଞ୍ଚଳ ଲୋକମାନଙ୍କ ପାଇଁ ହୋମିଓପାଥିକ୍ ଚିକିତ୍ସା କରାଯାଉଛି । ଏହି କାର୍ଯ୍ୟକ୍ରମକୁ ଟିକାତାଳ ରାମକୃଷ୍ଣ ସେବାଶ୍ରମର ଉପସଭାପତି ରାଜକିଶୋର ଛୁଆଳସିଂହ, ସହସମ୍ପାଦକ ସର୍ବେଶ୍ୱର ସାହୁ ଓ ସଦସ୍ୟ ନାରାୟଣ ସାହୁ ପରିଚାଳନା କରିଥିଲେ ।
