୦୫ ଅକ୍ଟୋବର ୨୦୨୪ (ଓଡ଼ିଶା ତାଜା ନ୍ୟୁଜ୍ ) ଫୁଲବାଣୀ, ଫିରିଙ୍ଗିଆ :-> ଗୋଛାପଡ଼ା ଥାନା ବାଲନ୍ଦାପଡ଼ା ଫାଣ୍ଡି ଲୁଇସିଂ ପଚାଂୟତର ଡାଙ୍ଗାଣାମୁ ଠାରେ ଯୁବକଙ୍କ ମୃତଦେହ ଉଦ୍ଧାର ଘଟଣାର ତଦନ୍ତ ଦାୟିତ୍ବ କ୍ରାଇମବ୍ରାଚକୁ ହସ୍ତାନ୍ତର କରିଛନ୍ତି ରାଜ୍ୟ ସରକାର । ଡିଏସପି ରଜତ କୁମାର ରାୟଙ୍କ ନେତୃତ୍ୱରେ କ୍ରାଇମ ବ୍ରାଂଚର ତିନି ଜଣିଆ ଟିମ ଆଜି ଗୋଚ୍ଛାପଡାରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି। ଅପରପକ୍ଷରେ ଦକ୍ଷାଣାଚଂଳ ଆଇ.ଜି ସାର୍ଥକ ଷଡ଼ଙ୍ଗୀ ଫୁଲବାଣୀରେ ପହଂଚି ଏସପି ଙ୍କ ସହ ଆଲୋଚନା କରିବା ସହ ଘଟଣା ଉପରେ ଅନୁଧ୍ୟାନ କରିଛନ୍ତି । ତଦନ୍ତକାରୀ ଅଧିକାରୀ ଶ୍ରୀ ରାୟ ଗୋଛାପଡା ଥାନାରେ ଅତିରିକ୍ତ ଆରକ୍ଷୀ ଅଧିକ୍ଷକ ବଳଭଦ୍ର ଦୀପ ଓ ଏସଡିପିଓ ସୁପ୍ରସନ୍ନ ମଲ୍ଲିକଙ୍କ ସହ ଆଲୋଚନା କରିବା ସହ ଜବତ ହୋଇ ଥାନାରେ ଥିବା ମୃତ ଜ୍ୟେଷ୍ଠ ବଣ୍ଡକିଙ୍କ ବାଇକକୁ ନିରିକ୍ଷଣ କରିଛନ୍ତି । ପରେ ଘଟଣାସ୍ଥଳକୁ ଯାଇ କେଉଁ ପରିସ୍ଥିତିରେ ତାଙ୍କର ମୃତ୍ୟୁ ହୋଇଥିଲା ସେନେଇ ଅନୁଧ୍ୟାନ କରିଥିଲେ । ଏକ ସାଇଂଟଫିକ ଟିମ, ସାଇବର କ୍ରାଇମ ଟିମ୍ ଓ ସ୍ପେଶଲ୍ ସ୍କ୍ୱାର୍ଡର ଏକ ଟିମ ମଧ୍ୟ୍ୟ ଘଟଣା ସ୍ଥଳକୁ ଯାଇ ଅନୁସନ୍ଧାନ କରିଥିବା କହିଛନ୍ତି କ୍ରାଇମ ବ୍ରାଂଚ ଡିଏସପି ଶ୍ରୀ ରାୟ ।
ଏପଟେ ସ୍ଥାନୀୟ ଲୋକେ ଅଭିଯୁକ୍ତ ପୁଲିସ କର୍ମଚାରୀ ମାନଙ୍କୁ ଗିରଫ କରିବା ସହ ମୃତକଙ୍କ ପରିବାର ଲୋକଙ୍କୁ କ୍ଷତିପୂରଣ ଦାବୀରେ ଆଜି ଥାନା ଘେରାଉ କରିବା ନିଷ୍ପତ୍ତି ନେଇଥିଲେ। ଏହାକୁ ନଜରରେ ରଖି ଗୋଚ୍ଛାପଡାରେ ଏକ ପ୍ଲାଟୁନ ପୁଲିସ ମୂତୟନ ସହିତ ବ୍ୟାପକ ସୁରକ୍ଷା ବ୍ୟବସ୍ଥା କରାଯାଇଥିଲା। ଗତ ବର୍ଷ ଫିରିଙ୍ଗିଆ ଥାନାପୋଡି ଘଟଣା ଦୃଷ୍ଟିରୁ ଜିଲ୍ଲା ପୁଲିସ ପକ୍ଷରୁ ସମସ୍ତ ପ୍ରକାର ସତର୍କତା ଗ୍ରହଣ କରାଯାଇଥିଲା। କିନ୍ତୁ ତଦନ୍ତ ଦାୟିତ୍ବ କ୍ରାଇମବ୍ରାଞ୍ଚକୁ ହସ୍ତାନ୍ତର କରାଯାଇଥିବା ସୂଚନା ମିଳିବା ପରେ ଥାନା ଘେରାଉ କାର୍ଯ୍ୟକ୍ରମ ସ୍ଥଗିତ କରିଥିଲେ । ଆଜି ସକାଳୁ ଗୋଛାପଡା କୁଇସମାଜ ସେବା ସମିତିର କାର୍ଯ୍ୟାଳୟ ଠାରେ ଏକ ପ୍ରତିବାଦ ସଭା ଅନୁଷ୍ଠିତ ହୋଇଥିଲା ।
ଶତାଧିକ ଲୋକ ଉପସ୍ଥିତ ରହି ଏହି ଘଟଣାର ନିରପେକ୍ଷ ତଦନ୍ତ ଓ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବୀ କରିଥିଲେ। ପରେ ପୂର୍ବତନ ବିଧାୟକ ଅଙ୍ଗଦ କହଁର, ଲୁଇସିଂ ସରପଞ୍ଚ ସୁଦର୍ଶନ କହଁର, ସଲାଗୁଡା ସରପଞ୍ଚ ରୋହିତ କହଁର ପ୍ରମୂଖଙ୍କ ନେତୃତ୍ୱରେ ଏକ ପ୍ରତିନିଧି ଦଳ ଫୁଲବାଣୀ ଆସି ଜିଲ୍ଲା ପୁଲିସ ମୁଖ୍ୟାଳରେ ଦକ୍ଷିଣାଚଂଳ ଆଇଜି ସାର୍ଥକ ଷଡ଼ଙ୍ଗୀ ଓ ଆରକ୍ଷୀ ଅଧୀକ୍ଷକ ହରିଶ ବି ସି ଙ୍କୁ ଭେଟି ଆଲୋଚନା କରିବା ସହିତ ଦାବୀପତ୍ର ପ୍ରଦାନ କରିଥିଲେ । ଘଟଣାର ଗୁରୁତ୍ୱକୁ ଦେଖି ତଦନ୍ତ କ୍ରାଇମ ବ୍ରାଞ୍ଚକୁ ହସ୍ଥାନ୍ତର କରାଯାଇଛି ଏବଂ ଘଟଣାରେ ଯାହାର ସମ୍ପୃକ୍ତି ଥିବ, ସେମାନଙ୍କ ବିରୋଧରେ କାଯ୍ୟାନୁଷ୍ଟାନ ଗ୍ରହଣ କରାଯିବ ବୋଲି କହିଛନ୍ତି ଆରକ୍ଷୀ ଅଧିକ୍ଷକ। ସୂଚନାଯୋଗ୍ୟ,
ଗତ ଗତ ଛବିଶ ତାରିଖ ଦିନ ବୌଦ୍ଧ ଜିଲ୍ଲାର ଜ୍ୟେଷ୍ଠ ବଣ୍ଡକିଙ୍କ ମୃତଦେହ ଡାଙ୍ଗାଣାମା ନିକଟରୁ ଉଦ୍ଧାର କରାଯାଇଥିଲା। ପରଦିନ ପୁଲିସ ତାଙ୍କୁ ହତ୍ୟା କରିଥିବା ନେଇ ମୃତକଙ୍କ ସ୍ତ୍ରୀ ଗୋଚ୍ଛାପଡା ଥାନାରେ ଏତଲା ଦେଇଥିଲେ। ପୁଲିସ ପକ୍ଷରୁ ତୁରନ୍ତ କାର୍ଯ୍ୟାନୁଷ୍ଠାନ ନିଆଯାଇ ଜଣେ ଏସ ଆଇ ଓ ଜଣେ ହାବିଲଦାରଙ୍କୁ ନିଲମ୍ବିତ କରାଯିବା ସହ ତିନି ଜଣ ହୋମଗାର୍ଡଙ୍କୁ କାର୍ଯ୍ୟରୁ ଅନ୍ତର କରାଯାଇଥିଲା। ଏପଟେ କୌଣସି ପ୍ରକାର ଅଘଟଣକୁ ରୋକିବା ପାଇଁ ଆଜି ଗୋଛାପଡା ଥାନା ପରିସର ପୁଲିସ ଛାଉଁଣୀରେ ପରିଣତ ହୋଇଥିଲା। ଅତିରିକ୍ତ ଆରକ୍ଷୀ ଅଧିକ୍ଷକ, ସଦର ଏସ୍ଡ଼ିପିଓଙ୍କ ସମେତ ଗୋଚ୍ଛାପଡା ଥାନାର ପୂର୍ବତନ ଅଧିକାରୀ ପ୍ରଭାତ କୁମାର ବେହେରା, ଫିରିଙ୍ଗିଆ ଥାନା ଅଧିକାରୀ ଗୋପୀନାଥ ପ୍ରଧାନ, ଗୋଚ୍ଛାପଡା ଥାନା ଅଧିକାରୀ ଚିରଞ୍ଜିବୀ ବେହେରା ପ୍ରମୁଖ ଉପସ୍ଥିତ ରହି ସ୍ଥିତି ଉପରେ ନଜର ରଖିଥିଲେ।
