ସମସ୍ତ ବିଭାଗ ସହିତ ଉପଯୁକ୍ତ ସମନ୍ୱୟ ରକ୍ଷା ପାଇଁ ପରାମର୍ଶ
୨୯ ସେପ୍ଟେମ୍ବର,୨୦୨୪ (ଓଡ଼ିଶା ତାଜା ନ୍ୟୁଜ୍ ) ଭୁବନେଶ୍ୱର :-> ରାଜ୍ୟରେ ଆଇନ ଶୃଙ୍ଖଳା ପରିସ୍ଥିତିର ସୁରକ୍ଷା କ୍ଷେତ୍ରରେ ସମ୍ପୃକ୍ତ ବିଭିନ୍ନ ବିଭାଗ ସହିତ ସୁସମନ୍ୱୟର ଆବଶ୍ୟକତା ରହିଛି । ଏହାର ସଫଳ କାର୍ଯ୍ୟକାରିତା ପାଇଁ ତ୍ରୟ ମାସିକ ବୈଠକ ଆୟୋଜନ କରିବା ଉଚିତ ବୋଲି ଆଜି ସ୍ଥାନୀୟ କନଭେନସନ ହଲରେ ଆୟୋଜିତ ଜିଲ୍ଲାପାଳ ଓ ଆରକ୍ଷୀ ଅଧିକ୍ଷକଙ୍କ ମିଳିତ ସମ୍ମିଳନୀରେ ମତ ପ୍ରକାଶ ପାଇଛି । ଏହି ତ୍ରୟ ମାସିକ ବୈଠକରେ ଜିଲ୍ଲାପାଳ ଏବଂ ଏସପିଙ୍କ ସମେତ ବିଡ଼ିଓ, ତହସିଲଦାର, ଏସଡିପିଓ ଓ ଥାନା ଅଧିକାରୀଙ୍କୁ ସାମିଲ କରାଗଲେ ଅନେକ ସମସ୍ୟାର ସମାଧାନ ହୋଇପାରିବ ଏବଂ ଜିଲ୍ଲାରେ ଆଇନ ଶୃଙ୍ଖଳା ପରିସ୍ଥିତିକୁ ନିୟନ୍ତ୍ରଣ କରିବା ସହଜ ହେବ ବୋଲି ବରିଷ୍ଠ ପୋଲିସ ଅଧିକାରୀଗଣ ବୈଠକରେ ମତବ୍ୟକ୍ତ କରିଥିଲେ ।
ଆଭ୍ୟନ୍ତରୀଣ ସୁରକ୍ଷା, ଶିଳ୍ପ ଓ ଖଣିର ବେଆଇନ ଉତ୍ତୋଳନ, ବିଦେଶୀ ଅନୁପ୍ରବେଶ, ବିଶିଷ୍ଟ ବ୍ୟକ୍ତିଙ୍କ ସୁରକ୍ଷା, ଆନ୍ତଃ-ରାଜ୍ୟ ସୀମା ବିବାଦ, ସାଧାରଣ ଲୋକଙ୍କ ଦୀର୍ଘ ଦିନର ଦାବି, ସଡକ ଦୁର୍ଘଟଣା ଜନିତ ରାସ୍ତା ଅବରୋଧ ଓ ହିଂସା, ବନ୍ୟାପ୍ରାଣୀ-ମନୁଷ୍ୟ ବିବାଦ ଆଦି କ୍ଷେତ୍ରରେ ହଠାତ ଉତ୍ତେଜନା ହେତୁ ଆଇନ ଶୃଙ୍ଖଳା ପରିସ୍ଥିତି ସୃଷ୍ଟି ହେବାର ସମ୍ଭାବନା ଥାଏ । ଏହିଭଳି ଅଘଟଣକୁ ଏଡ଼ାଇବାକୁ ହେଲେ ଉଭୟ ଜିଲ୍ଲାପାଳ ଏବଂ ଆରକ୍ଷୀ ଅଧିକ୍ଷକ ମିଳିତ ଭାବେ କାର୍ଯ୍ୟ କରିବା ଉଚିତ । ଏହି ବୈଠକରେ ଆରକ୍ଷୀ ମହାନିର୍ଦ୍ଦେଶକ ଶ୍ରୀ ଯୋଗେଶ ବାହାଦୂର ଖୁରାନିଆ, ଗୁଇନ୍ଦା ନିର୍ଦ୍ଦେଶକ ସୌମେନ୍ଦ୍ର ପ୍ରିୟଦର୍ଶୀ ପ୍ରମୁଖ ଉପସ୍ଥିତ ଥିଲେ । ଗଞ୍ଜାମ ଜିଲ୍ଲା ଆରକ୍ଷୀ ଅଧିକ୍ଷକ ଜଗମୋହନ ମୀନା ଏବଂ ଅନୁଗୋଳ ଜିଲ୍ଲାପାଳ ଏ.ଏମ. ଅଖତାର ନିଜ ଅଭିଜ୍ଞତା ଉପସ୍ଥାପନ କରିଥିଲେ ।
