୨୪ ସେପ୍ଟେମ୍ବର,୨୦୨୪ (ଓଡ଼ିଶା ତାଜା ନ୍ୟୁଜ୍ ) ବାରିପଦା :-> ସ୍ଥାନୀୟ ସ୍ଵତନ୍ତ୍ର ଦୃଷ୍ଟିହୀନ ଓ ବଧିର ବିଦ୍ୟାଳୟ, ଲକ୍ଷ୍ମୀପୋଷିର ସମ୍ମିଳନୀ କକ୍ଷରେ ଜିଲ୍ଲା ସ୍ତରୀୟ ଆନ୍ତର୍ଜାତିକ ଶ୍ରବଣବାଧିତ ଦିବସ ପାଳିତ ହୋଇଯାଇଅଛି। ଏହି କାର୍ଯ୍ୟକ୍ରମଟି ଅଗ୍ରଣୀ ସେଚ୍ଛାସେବୀ ଅନୁଷ୍ଠାନ ସାଧନା, ସମଗ୍ର ଶିକ୍ଷା ଓ ଜିଲ୍ଲା ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତିକରଣ ବିଭାଗର ମିଳିତ ସହଯୋଗରେ ଅନୁଷ୍ଠିତ ହୋଇଯାଇଅଛି । ପିଲା, ଅଭିଭାବକ ଓ ସ୍ଵତନ୍ତ୍ର ବିଦ୍ୟାଳୟର କର୍ମଚାରୀମାନଙ୍କୁ ନେଇ ଏକ ସଚେତନତା ରାଲି ବିଦ୍ୟାଳୟ ଠାରୁ ବାହାରି କେନ୍ଦ୍ରୀୟ ବିଦ୍ୟାଳୟ ପର୍ଯ୍ୟନ୍ତ ପରିକ୍ରମା କରିଥିଲେ । ଅତିରିକ୍ତ ଜିଲ୍ଲାପାଳ ଶ୍ରୀ ନେତ୍ରାନନ୍ଦ ମଲ୍ଲୀକ ମୁଖ୍ୟ ଅତିଥିଭାବେ ଯୋଗଦେଇଥିଲେ । ଅନ୍ୟତମ ସମ୍ମାନିତ ଅତିଥିଭାବେ ଜିଲ୍ଲା ସାମାଜିକ ସୁରକ୍ଷା ଅଧିକାରୀ ଶ୍ରୀ ନାରାୟଣ ଚନ୍ଦ୍ର ବେହେରା, ଜିଲ୍ଲା ଶିକ୍ଷା ଅଧିକାରୀ ତଥା ଜିଲ୍ଲା ପ୍ରକଳ୍ପ ସଂଯୋଜକ ଶ୍ରୀ ପୂର୍ଣ୍ଣିଚନ୍ଦ୍ର ସେଠୀ, ଡେଫ ଚାଇଲ୍ଡ ୱାର୍ଲଡୱାଇଡ (DCW) ର ରାଜ୍ୟ ସଂଯୋଜକ ଶ୍ରୀ ସଂଗ୍ରାମ କେଶରୀ ତ୍ରିପାଠୀ,
ସାଧନାର ନିର୍ଦେଶକ ଶ୍ରୀ ରଂଜିତ କୁମାର ମହାପାତ୍ର, ସମଗ୍ର ଶିକ୍ଷା ମୟୁରଭଞ୍ଜର ଜିଲ୍ଲା ସମ୍ମନ୍ଵିତ ଶିକ୍ଷା ସଂଯୋଜକ ଶ୍ରୀ ନିରଞ୍ଜନ ନାୟକ ଆଦି ଯୋଗଦେଇଥିଲେ । ସମସ୍ତ ଅତିଥିବୃନ୍ଦ ଶ୍ରବଣ ଓ ବାକ ବାଧିତମାନଙ୍କ ଉଦେଶ୍ୟରେ ସାଂକେତିକ ଭାଷା ଏକ ଭାଷାଗତ ଅଧିକାର ହେବା ଉଚିତ ବୋଲି ଗୁରୁତ୍ୱ ଆରୋପ କରିଥିଲେ । ଏହାଛଡା ସେମାନଙ୍କ ପାଇଁ ଉଦିଷ୍ଟ ଆଇନରେ ଥିବା ଅଧିକାର ସମ୍ପର୍କରେ ଆଲୋକ ପାତ କରି କହିଥିଲେଯେ ତାଙ୍କୁ ଦୟା ନକରି ତାଙ୍କର ଅଧିକାର ସେମାନଙ୍କ ପାଖରେ ପହଞ୍ଚାଇବା ଉଚିତ । ଉକ୍ତ ଦିବସର ଆଭିମୁଖ୍ୟ ବିଷୟରେ କହିଥିଲେ ଯେ ସାଙ୍କେତିକ ଭାଷାର ଅଧିକାର ପାଇଁ ଦାବି , ଅନ୍ତର୍ନିବେଶି ଶିକ୍ଷା ଓ ଶ୍ରୁତିବାଧିତ ଲୋକଙ୍କ ସଂସ୍କୃତିର ପ୍ରସାର ଏହି ଦିବସର ମୁଖ୍ୟ ଲକ୍ଷ୍ୟ ।
ବିଦ୍ୟାଳୟର ଦୃଷ୍ଟିବାଧିତ ଛାତ୍ରୀମାନେ ସ୍ଵାଗତ ସଂଗୀତ ଗାନ କରିଥିଲେ । ମନୋବିକାଶ ସ୍ଵତନ୍ତ୍ର ବିଦ୍ୟାଳୟର ବଧିର ଛାତ୍ରୀମାନେ ସ୍ଵାଗତ ନୃତ୍ୟ ପରିବେଷଣ କରିଥିଲେ । ଶୂଳିଆପଦା ଓ ବାରିପଦା ବ୍ଲକର ଗୋଷ୍ଠୀ ସମ୍ବଳ ଶିକ୍ଷକ ଶ୍ରୀ ଶ୍ରୀଧର ପ୍ରସାଦ ସାହୁ, ଶ୍ରୀ ପ୍ରଦୀପ କୁମାର ଦଳେଇ, ଶ୍ରୀ ଦିଲୀପ କୁମାର ଦାସ ଓ ଶ୍ରୀମତୀ ରେଖାରାଣୀ ଦାସଙ୍କୁ ସେମାନଙ୍କର ସମ୍ମନ୍ଵିତ ଶିକ୍ଷା କ୍ଷେତ୍ରରେ ଅବଦାନ ପାଇଁ ଏହି ଦିବସରେ ସମ୍ମାନିତ କରାଯାଇଥିଲା । ସାଧାରଣ ବିଦ୍ୟାଳୟରେ ଶିକ୍ଷକତା କରୁଥିବା ଦୁଇଜଣ ଶିକ୍ଷୟତ୍ରି ଶ୍ରୀମତୀ ସୁରମଣି ହେମ୍ବ୍ରମ ଓ ଚିତ୍ରଲେଖା ପାତ୍ରଙ୍କୁ ସେମାନଙ୍କର ଭିନ୍ନକ୍ଷମ ପିଲାମାନଙ୍କ ପ୍ରତିଥିବା ଅବଦାନ ପାଇଁ ପୁରସ୍କୃତ କରାଯାଇଥିଲା । ସେହିପରି ଚାରିଜଣ ଅଭିଭାବକ ଓ ତିନିଜଣ ଆନନ୍ଦଦାୟକ ଶିକ୍ଷା କେନ୍ଦ୍ରର ପରିଚାଳକଙ୍କୁ ସମ୍ମାନିତ କରାଯାଇଥିଲା।
ପିଲାମାନଙ୍କ ମଧ୍ୟରେ ବିଭିନ୍ନ ପ୍ରକାରର ପ୍ରତିଯୋଗୀତା ହୋଇଥିଲା । କୃତି ପ୍ରତିଯୋଗୀ ମାନଙ୍କୁ ଅତିଥିମାନଙ୍କ ଦ୍ଵାରା ପୁରସ୍କୃତ କରାଯାଇଥିଲା । ଚିତ୍ରାଙ୍କନ ପ୍ରତିଯୋଗୀତାରେ ଭାଗ ନେଇଥିବା ଲକ୍ଷ୍ମୀପୋଷି ବିଦ୍ୟାଳୟ, ସାଧନା, ରୋଜ ଓ ମନୋବିକାଶର ପ୍ରତିଯୋଗୀଙ୍କୁ ପୁରସ୍କୃତ କରାଯାଇଥିଲା । ସେହିପରି ମିଳିତ ସଂଗୀତ, ମିଳିତ ନୃତ୍ୟରେ କୃତି ପ୍ରତିଯୋଗୀମାନଙ୍କୁ ମଧ୍ୟ ପୁରସ୍କୃତ କରାଯାଇଥିଲା । ୧୬ ଜଣ ଶ୍ରବଣ ବାଧିତ ପିଲାଙ୍କୁ କାନଯନ୍ତ୍ର ପ୍ରଦାନ କରାଯାଇଥିଲା । ସ୍ଵତନ୍ତ୍ର ବିଦ୍ୟାଳୟର ଶିକ୍ଷକ ଅନିରୁଦ୍ଧ ପାତ୍ର ଅତିଥି ପରିଚୟ ପ୍ରଦାନ କରିଥିବାବେଳେ ଶିକ୍ଷକ ଶ୍ରୀ କୈଲାଶ ଚନ୍ଦ୍ର ଦାସ ଧନ୍ୟବାଦ ଅର୍ପଣ କରଥିଲେ। ପ୍ରଧାନ ଶିକ୍ଷୟତ୍ରୀ ହେମାଙ୍ଗିନୀ ରାଉତ, ସାଧନାର କର୍ମୀ ଶ୍ରୀ ଲାଲୁ ପ୍ରସାଦ ଖଣ୍ଡୁଆଳ, ଶ୍ରୀ ସଞ୍ଜୟ ସି, ଶ୍ରୀମତୀ ସ୍ଵର୍ଣଜିତ ମହାପାତ୍ରଙ୍କ ପ୍ରତ୍ୟକ୍ଷ ତତ୍ଵାବଧାନରେ କାର୍ଯ୍ୟ ପରିଚାଳନା ହୋଇଥିଲା । କାର୍ଯ୍ୟକୁ ସଫଳ ରୂପାୟନ କରିବା ପାଇଁ ସାଧନାର କର୍ମୀ ଓ ସ୍ଵତନ୍ତ୍ର ବିଦ୍ୟାଳୟର ସମସ୍ତ କର୍ମଚାରୀ ବୃନ୍ଦ ସହଯୋଗ କରିଥିଲେ ।
