୨୩ ସେପ୍ଟେମ୍ବର,୨୦୨୪ (ଓଡ଼ିଶା ତାଜା ନ୍ୟୁଜ୍ ) ବୋଲଗଡ଼ :-> ବୋଲଗଡ଼ ନନ୍ଦିଘୋଷ ଭବନଠାରେ ଓଡିଶା ସାହିତ୍ୟ ଏକାଡେମୀ ଭୁବନେଶ୍ୱର ଓ ବୋଲଗଡ଼ସ୍ଥିତ ବଳଦ୍ୱର୍ଗ ଓଡ଼ିଆ ଭାଷା ସାହିତ୍ୟ ସଂସ୍କୃତି ଗବେଷଣା ପରିଷଦର ମିଳିତ ଆନୁକୂଲ୍ୟରେ ରବିବାର ଦିନ ବୋଲଗଡ଼ସ୍ଥିତ ନନ୍ଦିଘୋଷ ଭବନ ପରିସରରେ ଓଡ଼ିଆ ଭାଷା, ସାହିତ୍ୟ ଓ ସଂସୃତିର ସୁରକ୍ଷା ଆଲୋଚନା ଚକ୍ର ଓ କବିତା ପାଠୋତ୍ସବ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଅଛି ! ବଳଦ୍ୱର୍ଗ ଓଡ଼ିଆ ଭାଷା ସାହିତ୍ୟ ସଂସ୍କୃତି ଗବେଷଣା ପରିଷଦର ସଭାପତି ଗୋପୀନାଥ ଖାଡ଼ଙ୍ଗା କାର୍ଯ୍ୟକ୍ରମରେ ପୌରହିତ୍ୟ କରିଥିଲେ।
ଏହି କାର୍ଯ୍ୟକ୍ରମରେ ମୁଖ୍ୟଅତିଥିଭାବେ ସ୍ଥାନୀୟ ବିଧାୟକ ପ୍ରଦୀପ କୁମାର ସାହୁ, ମୁଖ୍ୟବକ୍ତା ଅଧ୍ୟାପକ ଡ଼କ୍ଟର ବୈରାଗୀ ଚରଣ ପଟ୍ଟନାୟକ ଓ ସମ୍ମାନିତ ଅତିଥି ଭାବରେ ବର୍ଷିଆନ କବି ଜହିରୁଦ୍ଦିନ ଖାଁ ପ୍ରମୁଖ ଯୋଗଦେଇ କାର୍ଯ୍ୟକ୍ରମକୁ ଉଦଘାଟନ କରିଥିଲେ । ପ୍ରାରମ୍ଭରେ ଅବିନାଶ ସୁବୁଦ୍ଧି ଭକ୍ତି ସଂଗୀତ ପରିବେଷଣ କରିଥିଲେ। କବି ପ୍ରଫୁଲ୍ଲ କୁମାର ମହାପାତ୍ର ଅତିଥି ପରିଚୟ ପ୍ରଦାନ କରିଥିଲେ। ସମ୍ପାଦକ ରଘୁନାଥ ଦଳବେହେରା ସମ୍ପାଦକୀୟ ବିବରଣୀ ଉପସ୍ଥାପନ କରିଥିଲେ। ପ୍ରଫୁଲ୍ଲ କୁମାର ପାଇକରାୟ ସ୍ୱରଚିତ ସ୍ୱାଗତ ଗୀତିକା ପଠା କରିଥିଲେ।
କବି ରମେଶ ଚନ୍ଦ୍ର ସାହୁ ଓ ସଂଯୋଜକ ଶ୍ରୀକାନ୍ତ କୁମାର ନାୟକ କବିତା ସଂଯୋଜନା କରିଥିଲେ। ବିଧାୟକ ଶ୍ରୀ ସାହୁ ମା’, ମାଟି, ମାତୃଭାଷାକୁ ଭଲ ପାଇବାକୁ ଆହ୍ୱାନ ଦେଇଥିଲେ! ମୁଖ୍ୟବକ୍ତା ଅଧ୍ୟାପକ ଡ଼କ୍ଟର ବୈରାଗୀ ଚରଣ ପଟ୍ଟନାୟକ ମୁଖ୍ୟବକ୍ତା ଓଡ଼ିଆ ସାହିତ୍ୟ ସଂସ୍କୃତିର ସୁରକ୍ଷା ପାଇଁ କବି ଓ ଲେଖକମାନଙ୍କର ରଚନାରୁ ଉଦାହରଣ ରଖିଥିଲେ। ସମ୍ମାନିତ ଅତିଥି ବର୍ଷିଆନ କବି ଜହିରୁଦ୍ଦିନ ଖାଁ ମଧ୍ୟଯୁ୍ଗୀୟ ଓଡ଼ିଆ କାବ୍ୟରେ ଆମ ସଂସ୍କୃତି କିଭଳି ପ୍ରତିଫଳନ ବିଷୟରେ ଆଲୋଚନା କରିଥିଲେ।
ପ୍ରାରମ୍ଭରେ କବି ଭକ୍ତବଲ୍ଲଭ ପଟ୍ଟନାୟକ, ରବୀନ୍ଦ୍ର କୁମାର ନାୟକ, ଦିବ୍ୟଲୋଚନ ଭରିମଲ, ସନ୍ତୋଷ କୁମାର ସାହୁ, ପ୍ରଭାତ କୁମାର ଜେନା, ସେବତୀ ପରିଡା, ବସନ୍ତ ମଞ୍ଜରୀ ପରମଗୁରୁ, ସରୋଜିନୀ ଦେବୀ ପ୍ରମୁଖ କବିତା ପାଠ କରିଥିଲେ। ଗତ ମାଟ୍ରିକ ପରୀକ୍ଷାରେ ମାତୃଭାଷାରେ ଶତାନବେ ପ୍ରତିଶତ ନମ୍ବର ରଖି କୃତିତ୍ୱ ଅର୍ଜନ କରଥିବା ପୂଜା ପରିଡା, କବି ରମେଶ ଚନ୍ଦ୍ର ସାହୁ, ସଂଯୋଜକ ଶ୍ରୀକାନ୍ତ ନାୟକ, ବର୍ଷିଆନ କବି ବ୍ରଜକିଶୋର ସାମନ୍ତରାୟ, ଶିକ୍ଷକ ମନମୋହନ କହଲସିଂହକୁ ମାନପତ୍ର ଓ ଉପାୟନ ଦେଇ ସମ୍ବର୍ଦ୍ଧିତ କରାଯାଇଥିଲା। ପରିଶେଷରେ ସଦସ୍ୟ ମନୋଜ କୁମାର ଗୁମାନସିଂହ ସମସ୍ତଙ୍କର ନିରୋଗ ଜୀବନ କାମନା କରି ଧନ୍ୟବାଦ ଦେଇଥିଲେ।
