୨୬ ଅଗଷ୍ଟ,୨୦୨୪ (ଓଡ଼ିଶା ତାଜା ନ୍ୟୁଜ୍ ) ପୁରୀ :-> ପବିତ୍ର ଜନ୍ମାଷ୍ଟମୀ ଅବସରରେ ଶିଶୁ କିଶୋର ସାହିତ୍ୟ ଏକାଡେମୀର ଦ୍ଵିତୀୟ ବାର୍ଷିକ ଉତ୍ସବ ସ୍ଥାନୀୟ ସଂସ୍କୃତି ଭବନରେ ଅନୁଷ୍ଠିତ ହୋଇଯାଇଛି | ବିଶିଷ୍ଟ ସାହିତ୍ୟିକ ଦାଶ ବେନହୁରଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ଉତ୍ସଚକୁ ବିଶିଷ୍ଟ ଭାଷାବିତ ପଦ୍ମଶ୍ରୀ ଦେବୀ ପ୍ରସନ୍ନ ପଟ୍ଟନାୟକ ଉଦଘାଟନ କରିଥିଲେ | ଉତ୍ସବରେ ଡକ୍ଟର ପ୍ରସନ୍ନ କୁମାର ସ୍ୱାଇଁ ମୁଖ୍ୟ ଅତିଥି ଏବଂ ଡକ୍ଟର ମନୀନ୍ଦ୍ର ମହାନ୍ତି, ବୀରେନ୍ଦ୍ର ସାମନ୍ତରାୟ ସମ୍ମାନିତ ଅତିଥି ରୂପେ ମଞ୍ଚାସିନ ଥିଲେ | ପ୍ରାରମ୍ଭରେ ସତ୍ୟନାରାୟଣ ମିଶ୍ର ଉପକ୍ରମଣିକା ସହିତ ଅତିଥିମାନଙ୍କୁ ମଞ୍ଚ ଆବାହନ କରିଥିଲେ | ଶିଶୁ ନୃତ୍ୟ ଶିଳ୍ପୀ ଆରଭି ପଟ୍ଟନାୟକଙ୍କ ଦ୍ୱାରା ନୃତ୍ୟ ପରିବେଷଣ କରାଯାଇଥିଲା | ଡକ୍ଟର ହେମନ୍ତ ଛୋଟରାୟ ଅତିଥି ପରିଚୟ ପରେ ସମ୍ପାଦକୀୟ ବିବରଣୀ ପ୍ରଦାନ କରିଥିଲେ ଏକାଡେମୀର ସାଧାରଣ ସମ୍ପାଦକ ବୀରେନ୍ଦ୍ର ମହାନ୍ତି |
ଉତ୍ସବରେ ଧନଞ୍ଜୟ ସ୍ୱାଇଁଙ୍କ କରଣୀ ନୁହେଁ କଲମ ଧର, ହରିହର ଶୁକ୍ଳଙ୍କ ଗପର ମହକ ଗୀତର ମହୁ, ସଂଗ୍ରାମ କେଶରୀ ପୃଷ୍ଟିଙ୍କ ଆରେ ଠେକୁଆ ଆ, ପ୍ରଭାତ ଚନ୍ଦ୍ର ରଥଙ୍କ ଆମ ଜେଜେଙ୍କ ମଜା ଗପପୁସ୍ତକକୁ ଅତିଥି ମାନେ ଉନ୍ମୋଚିତ କରିଥିଲେ | ଉତ୍ସବରେ ଉଦବୋଧନ ଦେଇ ବକ୍ତାମାନେପିଲାମାନଙ୍କ ପାଇଁ ରଚିତ ସାହିତ୍ୟ ଉଭୟ ଆନନ୍ଦ ଓ ଦାୟିତ୍ୱର ସାହିତ୍ୟ ହେବା ଉଚିତ | ଏଭଳି ସାହିତ୍ୟ ରଚନା କରାଯାଉ ଯାହା ଶିଶୁ ମନଲାଖି ହେବା ସହିତ ଉପର ପୀଢ଼ି ପାଇଁ ଉତ୍ତର ଦାୟିତ୍ୱ ବହନ କରୁଥିବ ବୋଲି ଅତିଥିମାନେ ମତ ପୋଷଣ କରିଥିଲେ | ଗାଳ୍ପିକ ପରେଶ କୁମାର ପଟ୍ଟନାୟକ ମଞ୍ଚ ପରିଚାଳନା କରିଥିଲେ | ଏକାଡେମୀର ପ୍ରାତଃ ଅଧିବେଶନ ପ୍ରଭାତ ଚନ୍ଦ୍ର ରଥଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇ ଥିଲା |
କ୍ରିଷ୍ଣା ମହାପାତ୍ର, ଆଶାଲତା ପ୍ରଧାନ, ମନୋରମା ପାତ୍ର, ଧ୍ରୁବ ଚରଣ ଘିବେଲା, ସୁଶ୍ରୀ ସବିତା ଭୋଇ, ବିରଞ୍ଚି ନାରାୟଣ ଦାଶ, ପ୍ରଭାସିନୀ ମିଶ୍ର ଙ୍କ ସଂଯୋଜନାରେ ଶିଶୁ ସାହିତ୍ୟିକ ମାନେ କବିତା ପାଠ କରିଥିଲେ | ଶେଷରେ ଧନ୍ୟବାଦ ଅର୍ପଣ କରିଥିଲେ ଏକାଡେମୀର ଉପସଭାପତି ମହେନ୍ଦ୍ର କୁମାର ମଲ୍ଲିକ | ରମେଶ ଚନ୍ଦ୍ର ଦାଶ, ମିନତୀ ପଟ୍ଟନାୟକ, କବିତା ମିଶ୍ର, ଲକ୍ଷ୍ମୀ ପ୍ରିୟା ଦାଶ ପ୍ରମୁଖ ଉତ୍ସବ ପରିଚାଳନା ରେ ସହଯୋଗ କରିଥିଲେ | ଏହି କାର୍ଯ୍ୟକ୍ରମ ରେ ପୁରୀ.କଟକ. କଳାହାଣ୍ଡି, ବଲାଙ୍ଗୀର, ସୁନ୍ଦରଗଡ଼, ବୌଦ୍ଧ, ଅନୁଗୋଳ, ଢେଙ୍କାନାଳ, କୋରାପୁଟ ଜିଲ୍ଲା ରୁ ଶତାଧିକ ଶିଶୁ ସାହିତ୍ୟିକ ଯୋଗ ଦେଇଥିଲେ |
