୧୧ ଅଗଷ୍ଟ,୨୦୨୪ (ଓଡ଼ିଶା ତାଜା ନ୍ୟୁଜ୍ ) ଚିଲିକା :-> ଓଡ଼ିଶାର ବିଶିଷ୍ଟ ପାଲା ଗାୟକ ଗାୟକ ରତ୍ନ ସ୍ଵର୍ଗତ ଲୋକନାଥ କର ଙ୍କ ର ଶିଷ୍ୟ ଗାୟକ ପ୍ରଦୀପ ନବ କିଶୋର ମହାରଣା ଦୀର୍ଘ ଏକ ବର୍ଷ ହେଲା ଦୂରାରୋଗ୍ୟ ମସ୍ତିଷ୍କ ଆଘାତ ଜନିତ ରୋଗ ର ଶିକାର ହୋଇ ନିଜ ଵଡପଦର ସ୍ଥିତ ବାସଗୃହ ରେ ଘୋର ଶାରିରୀକ କଷ୍ଟ ଓ ବିଷାଦ ମଧ୍ୟରେ କାଳ କଟାଉଛନ୍ତି । ଜଣେ ବିଶିଷ୍ଟ କବି, କଳାକାର ଓ ଆଗଧାଡିର ପାଲା ଗାୟକ ଭାବରେ ସେ ରାଜ୍ୟ ରେ ଏକଦା ପ୍ରସିଦ୍ଧି ଲାଭ କରିଥିଲେ । ନାଚୁଣୀ ଗୋଦାବରୀଶ ହାଇସ୍କୁଲ ରୁ ମାଟ୍ରିକ ପାଶ୍ କଲାପରେ ସେ ଚାକିରୀ ପଛରେ ନ ଗୋଡାଇ ଓଡିଶାର ଲୁପ୍ତପ୍ରାୟ ଲୋକକଳା ପାଲା ର ଆକର୍ଷଣ ରେ ଓଡ଼ିଆ ସାହିତ୍ୟ ର ପ୍ରଚାର ଓ ପ୍ରସାର କଳ୍ପେ ପ୍ରଭୁ ସତ୍ୟପୀର ଙ୍କ ପାଦତଳେ ନିଜକୁ ସମର୍ପିତ କରି ଚାମର ଧରି ଥିଲେ। ଜଣେ ସୁଲେଖକ, କବି ଭାବରେ ସେ ଛାତ୍ର ଜୀବନ ରୁ ପରିଚିତ ଥିଲେ।
ପାଲା ମାଧ୍ୟମରେ ସେ ରାଜ୍ୟ ର ବିଭିନ୍ନ ସ୍ଥାନକୁ ଯାଇ ତାଙ୍କର ସୁଲଳିତ କଣ୍ଠର ଯାଦୁ ରେ ଦର୍ଶକ ମାନଙ୍କୁ ମନ୍ତ୍ରମୁଗ୍ଧ କରି ପାରୁଥିଲେ। ବିଭିନ୍ନ ଆଞ୍ଚଳିକ, ଜିଲ୍ଲା ସ୍ତରୀୟ ଓ ରାଜ୍ୟସ୍ତରୀୟ ବାଦପାଲା ପ୍ରତିଯୋଗିତା ରେ ଅଂଶ ଗ୍ରହଣ କରି ମଧ୍ୟ ସେ ବହୁ ପୁରସ୍କାର, ଆଓ୍ଵାଡ ଲାଭ କରିଛନ୍ତି। ଜଣେ ଉତ୍ତମ ସଙ୍ଗଠକ ଭାବେ ସେ ନିଖିଳ ଉତ୍କଳ ନୀଳାଚଳ ପାଲା ଗାୟକ ପରିଷଦର ମଧ୍ୟ ବହୁ ବର୍ଷ ଧରି କର୍ମକର୍ତ୍ତା ରହି ଆସିଛନ୍ତି। ସରକାରୀ ଉନ୍ନୟନ କାର୍ଯ୍ୟକ୍ରମ ର ଜଣେ ସ୍ଵୀକୃତିପ୍ରାପ୍ତ କଳାକାର ସହ ସେ ବାଣପୁର ବ୍ଲକ କଳା ସଂସ୍କୃତି ସଂଘ ର ମଧ୍ୟ ଉପାଧ୍ୟକ୍ଷ
ପଦବୀ ରେ ରହି ଆସିଥିଲେ। ଏତଦ୍ ବ୍ୟତୀତ ନାଚୁଣୀ ସ୍ଥିତ ସାହିତ୍ୟ ସଂସ୍କୃତି ଓ ସାମାଜିକ ଅନୁଷ୍ଠାନ ଜାଗ୍ରୃତିକା ର ସଭାପତି ଭାବେ ସେ ଓଡ଼ିଆ ଭାଷା ସାହିତ୍ୟ ର ଉନ୍ନତି କଳ୍ପେ ଅହରହ ଉଦ୍ୟମ ଜାରି ରଖିଥିଲେ।
ମାତ୍ର ଦୁଃଖ ଓ ପରିତାପର ବିଷୟ,ସେ ଗତ ବର୍ଷ ସରକାରୀ କାର୍ଯ୍ୟକ୍ରମ ଭିତ୍ତିକ ଏକ ସଚେତନତା ପ୍ରଚାର ପ୍ରସାର ପାଲା ପରିବେଷଣ କରିବାକୁ ଵାଶପୁରର ମାଳ ଅଞ୍ଚଳକୁ ଯାଇ ହ୍ରୃଦ୍ ଘାତର ଶିକାର ହୋଇ ଭୁବନେଶ୍ୱର ସ୍ଥିତ ହସ୍ପିଟାଲରେ ଭର୍ତ୍ତି ହୋଇଥିଲେ । ସଙ୍କଟ ଜନକ ପରିସ୍ଥିତିରୁ ଜୀବନ ବଞ୍ଚାଇ ପାରିଥିଲେ ମଧ୍ୟ ସବୁଦିନ ପାଇଁ ସେ ଵାକ୍ ଶକ୍ତି ହରାଇ ବସିଛନ୍ତି । ଶାରୀରିକ ଅଙ୍ଗ ପ୍ରତ୍ୟଙ୍ଗ ଠିକ୍ ଭାବେ କାମ କରିପାରୁ ନ ଥିବାରୁ ଦିନକୁ ଦିନ ତାଙ୍କର ସ୍ଵାସ୍ଥ୍ୟ ର ଗୁରୁତର ଅବନତି ଘଟୁଛି । ପରିବାର ସଦସ୍ୟ ଭାବରେ ସ୍ତ୍ରୀ ,ପୁଅ ଓ ବୋହୂ ଙ୍କ ଉପରେ ନିର୍ଭର କରି ଚଳତ୍ ଶକ୍ତି ଓ ଵାକ୍ ଶକ୍ତି ବିହୀନ ହୋଇ ଵଞ୍ଚି ରହିଛନ୍ତି କେବଳ । ଆର୍ଥିକ ସମ୍ବଳ ଭାବେ ମାତ୍ର କେଇ ଟି ମୁଖ୍ୟ ମନ୍ତ୍ରୀ କଳାକାର ସହାୟତା ଭତ୍ତା। ଏହି ପରିପ୍ରେକ୍ଷୀରେ ତାଙ୍କର ଚିକିତ୍ସା ଦାୟିତ୍ଵ ରାଜ୍ୟ ସରକାର ବହନ କରି ଏହି ସ୍ଵନାମଧନ୍ୟ କଳାକାର ଙ୍କୁ ବିପର୍ଯ୍ୟୟ ମୁହଁ ରୁ ବଞ୍ଚାଇବାକୁ ସାଧାରଣ ରେ ଦାବୀ ହେଉଛି ।
