ପ୍ରଥମେ ମା ସୁଭଦ୍ରାଙ୍କ ଦର୍ପଦଳନ ରଥ ଦକ୍ଷିଣ ମୋଡ କରାଯାଇ ନାକଚଣା ଦ୍ବାର ସମ୍ମୁଖକୁ ଅଣାଯାଇଥିଲା । ପରେ ବଡଠାକୁର ଶ୍ରୀବଳଭଦ୍ରଙ୍କ ତାଳଧ୍ବଜ ରଥ ଦକ୍ଷିଣ ମୋଡ କରାଯାଇ ନାକଚଣା ଦ୍ବାର ସମ୍ମୁଖରେ ଲଗାଯାଇଥିଲା । ଶନିବାର ପୂର୍ବାହ୍ନରେ ଶ୍ରୀଜଗନ୍ନାଥଙ୍କ ନନ୍ଦିଘୋଷ ରଥ ଦକ୍ଷିଣ ମୋଡ କରାଯାଇ ନାକଚଣା ଦ୍ବାର ସମ୍ମୁଖରେ ଲଗାଯାଇଛି । ଏବେ ତିନିରଥ ନାକଚଣା ଦ୍ବାର ସମ୍ମୁଖରେ ବାହୁଡାଯାତ୍ରା ପାଇଁ ପ୍ରସ୍ତୁତ ହୋଇ ରହିଛି ।
ଆସନ୍ତାକାଲି ରବିବାର ପବିତ୍ର ମହାନବମୀରେ ସଂଧ୍ଯା ଦର୍ଶନ ଅନୁଷ୍ଠିତ ହେବ । ସୋମବାର ୧୫ ତାରିଖ ଦିନ ପବିତ୍ର ବାହୁଡାଯାତ୍ରା । ମହାପ୍ରଭୁ ବଡଦାଣ୍ଡରେ ବାହୁଡାଯାତ୍ରା କରିବା ସହ ଶ୍ରୀମନ୍ଦିର ସିଂହଦ୍ଵାରରେ ତିନିରଥ ଲାଗିବ । ଶ୍ରୀଗୁଣ୍ଡିଚା ଦିନ ୪୨ଚକ ବଡଦାଣ୍ଡରେ ଗଡିଥିବା ବେଳେ ବାହୁଡାରେ ୪୨ଚକ ଶ୍ରୀମନ୍ଦିରକୁ ଗଡିବ । ଏହି ୮୪ ଚକର ରଥଯାତ୍ରା ଚର୍ମ ଚକ୍ଷୁରେ ଭକ୍ତ ଦର୍ଶନ କଲେ ୮୪ ଜନ୍ମରୁ ମୁକ୍ତି ମିଳିଥାଏ ବୋଲି ବିଶ୍ଵାସ ରହିଛି ।
