ମୁଖ୍ୟ ଅତିଥି ଗୁଜୁରାଟର ମୁଖ୍ୟମନ୍ତ୍ରୀ ଭୁପେନ୍ଦ୍ର ଭାଇ ପଟେଲ ସକାଳ ୯.୧୫ମିନିଟ ରେ ପାରମ୍ପରିକ ଢଙ୍ଗରେ ଛେରା ପହଁରା କାର୍ଯ୍ୟ ସମ୍ପନ୍ନ କରିଥିଲେ। ଶ୍ରୀ ପଟେଲଙ୍କୁ ଏହି ପବିତ୍ର କାର୍ଯ୍ୟରେ ସମ୍ମାନୀତ ଅତିଥି ରାଜ୍ୟର ମନ୍ତ୍ରୀ ରାଘବଜୀଭାଇ ହଂସରାଜଭାଇ ପଟେଲ ଏବଂ ରାଜ୍ୟସଭା ସଦସ୍ୟ ନରହରି ଅମିନ ପ୍ରମୁଖ ସହଯୋଗ କରିଥିଲେ। ଏହାପରେ ସାଢେ ୯ଟା ବେଳେ ମନ୍ଦିର ସାମ୍ନା ସ୍ଥିତ ବଡଦାଣ୍ଡରେ ରଥଟଣା କାର୍ଯ୍ୟ ଆରମ୍ଭ ହୋଇଥିଲା ।ପ୍ରାୟ ୨୦ହଜାର ଭକ୍ତଙ୍କର ସମାଗମରେ ରାଥାରୁଢ଼ ଚତୁର୍ଦ୍ଧା ମୂର୍ତ୍ତିଙ୍କୁ ନଗର ପରିକ୍ରମାରେ ନିଆଯାଇଥିଲା। ରଙ୍ଗାରଙ୍ଗ ରଥଟିକୁ ଅଡାଲଜଠାରୁ ୩ କିଲୋମିଟର ଦୂରରେ ଥିବା ମା’ ଅନ୍ନପୂର୍ଣ୍ଣା ଙ୍କର ମନ୍ଦିର ନିକଟକୁ ନିଆଯାଇ ମଧ୍ୟାହ୍ନ ସୁଦ୍ଧା ପୁଣି ମୁଖ୍ୟ ମନ୍ଦିରର ବେଢାକୁ ଫେରାଇ ଅଣାଯାଇଥିଲା। ଏହାପରେ ଠାକୁରମାନଙ୍କୁ ମନ୍ଦିର ର ତଳ ତାଲାରେ ଥିବା କମ୍ୟୁନିଟିହଲ ପରିସରରେ ବନିଥିବା ମାଉସୀ ମା ଘରକୁ ନିଆଯାଇ ସେଠାରେଥିବା ସିଂହାସନରେ ବିରାଜମାନ କରାଯାଇଥିଲା। ଆସନ୍ତା ନିଳାଦ୍ରୀ ବିଜେ ପର୍ଯ୍ୟନ୍ତ ଦିଅଁମାନେ ଏହିଠାରେ ସର୍ବସାଧାରଣଙ୍କୁ ଦର୍ଶନ ଦେବେ ବୋଲି ମନ୍ଦିର ସୁତ୍ରରୁ ଜଣାଯାଇଛି। ଏଠାରେ ପ୍ରତ୍ୟେକ ଦିନ ଭକ୍ତମାନେ ଭଗବାନଙ୍କୁ ପୂଜାର୍ଚ୍ଚନା କରିବାର ସୁଯୋଗ ପାଇବେ I ରଥଯାତ୍ରାର ଆୟୋଜନ କରିବାରେ ବିଶ୍ୱ ବ୍ରାହ୍ମଣ ସଂଗଠନର ସଭାପତି ଶଶୀକାନ୍ତ ତିୱାରୀ, ମହାସଚିବ ଦୀପକ ଯୋଶୀ ଏବଂ ମା’ ଅନ୍ନପୂର୍ଣ୍ଣା ଟ୍ରଷ୍ଟର ପରିଚଳନା କମିଟି ବ୍ୟାପକମାତ୍ରାରେ ସହାୟତା ଯୋଗାଇ ଦେଇଥିଲେ।
ଚଳିତ ବର୍ଷ ରଥଯାତ୍ରାର ବିଶେଷ ଆକର୍ଷଣ ଭାବରେ ୬ଟି ଟ୍ରାକ୍ଟର ରେ ପାଖାପାଖି ୧୦୦ ଜଣ ସଦସ୍ୟ ବିଶିଷ୍ଟ ମହିଳା ଭଜନ ମଣ୍ତଳୀ ରଥ ସହିତ ନଗର ପରିକ୍ରମା କରି ସେମାନଙ୍କର ସୁମଧୁର ଭକ୍ତି ସଂଗୀତରେ ଉପସ୍ଥିତ ଶ୍ରଦ୍ଧାଳୁମାନଙ୍କୁ ମନ୍ତ୍ରମୁଗ୍ଧ କରିଥିଲେ । ସୁଦର୍ଶନ ଚକ୍ରକୁ ଧାରଣ କରି ଦ୍ରୋଣ ଆକାଶ ମାର୍ଗରୁ ମହାପ୍ରଭୁଙ୍କର ଆଧ୍ୟାତ୍ମିକତା ଓ ଅଲୌକିକତାର ସୂଚନା ଦେଇ ଦର୍ଶକ ମାନଙ୍କୁ ଅଭିଭୂତ କରି ଦେଇଥିଲା I ମା’ ଅନ୍ନପୂର୍ଣ୍ଣାଙ୍କର ମନ୍ଦିରଠାରେ ଦ୍ବିପହରରେ ଏବଂ ମୁଖ୍ୟ ଜଗନ୍ନାଥ ମନ୍ଦିରରେ ଦିନ ୧୧ଟାରୁ ରାତି ୯ଟା ପର୍ଯ୍ୟନ୍ତ ଆଗନ୍ତୁକ ମାନଙ୍କ ପାଇଁ ନିଶୁଳ୍କ ପ୍ରସାଦ ସେବନର ବନ୍ଦୋବସ୍ତ କରାଯାଇଥିଲା l ମହୋତ୍ସବକୁ ସୂଚାର ରୂପେ ଆୟୋଜନ ଓ ସଫଳଭାବେ ସମାପନ କରିବାରେ ଓଡିଶା ସଙ୍ଘ ଓ ଜେ.ସି. ଏ. ଆର. ସି ର ଅଧ୍ୟକ୍ଷ ଡ଼ଃ ସୁଦୀପ କୁମାର ନନ୍ଦ, ଓଡିଶା ସଙ୍ଘର ସଭାପତି ହରେକୃଷ୍ଣ ଦାଶ ,ଜେ.ସି. ଏ. ଆର. ସିର ସଦସ୍ୟ ସଚିବ ଓ ଓଡିଶା ସଙ୍ଘର ସାଧାରଣ ସମ୍ପାଦକ ଡ଼ଃ ବଦ୍ରି ମହାପାତ୍ର ଏବଂ ମନ୍ଦିର କମିଟିର ଅଧ୍ୟକ୍ଷା ଲୀଳା ଦାଶ ପ୍ରମୁଖ ମୁଖ୍ୟ ଭୂମିକା ଗ୍ରହଣ କରିଥିଲେ।ଏହି ଟିମକୁ ପରିଚାଳନା କମିଟିର ଟ୍ରଷ୍ଟି, ସଦସ୍ୟ ଗଣ ଓ ଓଡ଼ିଶା ସଙ୍ଘର କର୍ମକର୍ତ୍ତା ତଥା ସଦସ୍ୟ ବୃନ୍ଦ ଯଥା ମହେଶ୍ୱର ସାହୁ, ଡ଼ଃ ନିବେଦିତା ସାହୁ, ବାଞ୍ଛାନିଧି ପାଣି,ରବି ପଣ୍ଡା , ଅଶୋକ ସାମଲ, ସତ୍ୟ ମିଶ୍ର, ନାରାୟଣ ସ୍ୱାଇଁ, ଅଜୟ ଦାସ , ମହେନ୍ଦ୍ର ଦାସ , ରାଜେଶ ସାମଲ,ଦିଲ୍ଲୀପ ଜେନା, ରୋହିତ ନାୟକ, ନିଗମାନନ୍ଦ ଦାସ, ଦିଲ୍ଲୀପ ବଳ, ସନ୍ଧ୍ୟା ପଣ୍ଡା ଓ ଗଣେଶ ସାବତ ପ୍ରମୁଖ ସକ୍ରୀୟ ସହଯୋଗ ପ୍ରଦାନ କରିଥିଲେ ।
