ଗ୍ୟାସ ସିଲିଣ୍ଡର ବିସ୍ଫୋରଣ ତହସିଲ କିରାନି ଗୁରୁତର
୦୪ ଜୁଲାଇ ,୨୦୨୪ (ଓଡ଼ିଶା ତାଜା ନ୍ୟୁଜ୍ ) ଭାପୁର :-> ନୟାଗଡ ଜିଲ୍ଲା ଭାପୁର ତହସିଲ କାର୍ଯ୍ୟାଳୟର ଜଣେ ବରିଷ୍ଠ କିରାଣୀଙ୍କ ସରକାରୀ ବାସଭବନରେ ବୁଧବାର ବିଳମ୍ବିତ ରାତିରେ ବିଦ୍ୟୁତ୍ ସର୍ଟ ସର୍କିଟରୁ ଅଗ୍ନିକାଣ୍ଡ ଘଟି ନିଆଁ ଚାରିଆଡେ ବ୍ୟାପି ଯିବାରୁ ଘରେ ଥିବା ଗ୍ୟାସ ସିଲିଣ୍ଡରରେ ନିଆଁ ଲାଗି ବିସ୍ଫୋରଣ ଘଟିଥିଲା l ଅସବାପତ୍ର ଓ କାଗଜାତ ପୋଡି ପାଉଁଶ ହୋଇଯିବା ସହ ବରିଷ୍ଠ କିରାଣୀ କୈଳାସ ଚନ୍ଦ୍ର ଦାସଙ୍କ ଦେହରେ ନିଆଁ ପଡି ଗୁରୁତର ଆହତ ହୋଇଛନ୍ତି l ଘଟଣାରୁ ପ୍ରକାଶ ଭାପୁର ତହସିଲ କାର୍ଯ୍ୟାଳୟର ବରିଷ୍ଠ କିରାଣୀ କୈଳାସ ଚନ୍ଦ୍ର ଦାସ ନିଜ ପରିବାର ସହ ସରକାରୀ କ୍ୱଟରରେ ରୁହନ୍ତି ।
ମାତ୍ର ବୁଧବାର ବିଳମ୍ବିତ ରାତି ପ୍ରାୟ ୩ଘଟିକା ସମୟରେ ବିଦ୍ୟୁତ୍ ସର୍ଟ ସର୍କିଟ ଯୋଗୁଁ ପ୍ରଥମେ ଟେବୁଲ ପଙ୍ଖାରେ ଅଗ୍ନିକାଣ୍ଡ ଘଟି ଘରର ଅସବାପତ୍ରରେ ନିଆଁ ଲାଗିଯାଇଥିଲା । ତାଙ୍କ ବଡ ଝିଅ ଓ ମାଆ ଘର ଭିତରେ ନିଆଁ ଲାଗିଥିବା ଜାଣି ପାରି ପୁଅ କୈଳାସକୁ ଡାକ ପକାଇଥିଲେ । କୈଳାସ ସଙ୍ଗେ ସଙ୍ଗେ ନିଜର ଦୁଇ ଝିଅ, ମାଆ, ସ୍ତ୍ରୀ ଓ ୩ମାସର ଛୋଟ ପୁଅକୁ ଧରି ବାରିପଟ କବାଟ ଖୋଲି ବାହାରକୁ ଚାଲି ଆସିଥିଲେ । ତା ‘ ପରେ ସେ ଅଗ୍ନିଶମ ବାହିନୀକୁ ଖବର ଦେବା ସହ ରୋଷେଇ ଘରୁ ଗୋଟିଏ ଗ୍ୟାସ ସିଲିଣ୍ଡରକୁ ପଦାକୁ ଆଣିବାରେ ସକ୍ଷମ ହୋଇଥିଲେ । ପୁନଶ୍ଚ ଘରେ ଥିବା ଆଉ ଗୋଟିଏ ଗ୍ୟାସ ଭର୍ତି ସିଲିଣ୍ଡରକୁ ବାହରକୁ ଆଣିବାକୁ ଚେଷ୍ଟା କରିଥିଲେ ମଧ୍ୟ ତାଙ୍କ ଶରୀରରେ ନିଆଁ ଝୁଲ ପଡି ଗୁରୁତର ହୋଇପଡ଼ିବା ଫଳରେ ଉକ୍ତ ଗ୍ୟାସ ସିଲିଣ୍ଡରକୁ ବାହାରକୁ ଆଣିବାରେ ସକ୍ଷମ ହୋଇ ପାରି ନଥିଲେ ।
ଫଳରେ ଉକ୍ତ ଗ୍ୟାସ ସିଲିଣ୍ଡର ନିଆଁ ସଂସ୍ପର୍ଶରେ ଆସି ବିସ୍ଫୋରଣ ଘଟିଥିଲା । ବିସ୍ଫୋରଣ ଏତେ ତୀବ୍ର ଥିଲା ଯେ ଘରର କାନ୍ଥ ଭୁଷୁଡି ପଡିବା ସହ ଛାତ ଉଡି ଯାଇଥିଲା । ଭାପୁର ଅଗ୍ନିଶମ ବାହିନୀ ଘଟଣା ସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲେ ମଧ୍ୟ ଘରର ଆସବାପତ୍ର, ଅଫିସର ସମସ୍ତ କାଗଜ ପତ୍ର ପୋଡି ପାଉଁଶ ହୋଇଯାଇଥିଲା । ଅଗ୍ନିଶମ ବାହିନୀ ଗୁରୁତର କୈଳାସଙ୍କୁ ଭାପୁର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିବା ବେଳେ ତାଙ୍କ ମାଆ ଓ ସ୍ତ୍ରୀ ନିଆଁ ସଂସ୍ପର୍ଶରେ ଆସି ସାମାନ୍ୟ ଆହାତ ହୋଇଥିଲେ ମଧ୍ୟ ଦୁଇ ଝିଅ ଓ ଛୋଟ ପୁଅ ଅଳ୍ପକେ ବର୍ତ୍ତି ଯାଇଛନ୍ତି । ଏନେଇ ତହସିଲ ପ୍ରଶାସନ ପକ୍ଷରୁ ଉଦବେଗ ପ୍ରକାଶ ପାଇବା ସହ କୈଳାସଙ୍କର ଆଶୁ ଆରୋଗ୍ୟ କାମନା କରିଛନ୍ତି । ଏନେଇ ସ୍ଥାନୀୟ ଅଞ୍ଚଳରେ ଦୁଃଖର ଛାୟା ଖେଳିଯାଇଥିବା ବେଳେ କୈଳାସଙ୍କ ପରିବାରକୁ ରାଜ୍ୟ ସରକାରଙ୍କ ପକ୍ଷରୁ କ୍ଷତିପୂରଣ ଯୋଗାଇଦେବାକୁ ସାଧାରଣରେ ଦାବି ହେଉଛି l
