ଶ୍ରୀକ୍ଷେତ୍ର ମୋଦୀମୟ :ଘଣ୍ଟ ଧ୍ୱନି ରେ କମ୍ପିଲା ବଡଦାଣ୍ଡ

୨୦ ମେ , ୨୦୨୪ (ଓଡ଼ିଶା ତାଜା ନ୍ୟୁଜ୍ ) ପୁରୀ :-> ମେ ୨୦ ତାରିଖ ସୋମବାର ସକାଳୁ ସକାଳୁ ଗେରୁଆମୟ ଜନସମୁଦ୍ର ପାଲଟିଥିଲା ଶ୍ରୀକ୍ଷେତ୍ର । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପୂର୍ବାହ୍ନ ପ୍ରାୟ ୭ଟା ସମୟରେ ହେଲିକପ୍ଟରରେ ତାଳବଣିଆ ହେଲିପ୍ଯାଡ଼୍ ଠାରେ ପହଞ୍ଚିଥିଲେ । ହେଲିପ୍ଯାଡରୁ ସୁରକ୍ଷା ବଳୟ ମଧ୍ୟରେ ପେଣ୍ଠକଟା , ସିଟିରୋଡ ସୁବାଷବୋଷ ଛକ ଭିଆଇପି ରୋଡ, ମେଡିକାଲ ଛକ କାରଗେଡ ମଧ୍ଯରେ ବଡଦାଣ୍ଡ ଦେଇ ଶ୍ରୀମନ୍ଦିର ସିଂହଦ୍ଵାର ଠାରେ ପହଞ୍ଚିଥିଲେ ।ପ୍ରଧାନମନ୍ତ୍ରୀ ମୋଦୀଙ୍କୁ ପୁରୀ ଲୋକସଭା ପ୍ରାର୍ଥୀ ଡାକ୍ତର ସମ୍ବିତ ପାତ୍ର, ପୁରୀ ବିଧାୟକ ପ୍ରାର୍ଥୀ ଜୟନ୍ତ କୁମାର ଷଡଙ୍ଗୀ ବରିଷ୍ଠ ସେବାୟତ ମଧୁସୂଦନ ସିଂହାରୀ ,ଭବାନି ଦାସମହାପାତ୍ର , ରବି ନାରାୟଣ ଦାସ ପ୍ରମୁଖ ଉପସ୍ଥିତ ରହି ସ୍ବାଗତ କରିବା ସହ ପୁଷ୍ପଗୁଚ୍ଛ ପ୍ରଦାନ କରିଥିଲେ । ସେବାୟତ ମଧୁସୂଦନ ସିଂହାରୀ ମହାପ୍ରଭୁଙ୍କ ଖଣ୍ଡୁଆ ପାଟ ଶ୍ରୀ ମୋଦୀଙ୍କୁ ପ୍ରଦାନ କରିଥିଲେ ।ପ୍ରଧାନମନ୍ତ୍ରୀ ମୋଦୀ ସେବାୟତ ମାନଙ୍କ ସହ ଶ୍ରୀମନ୍ଦିରରେ ଶ୍ରୀଜୀଉଙ୍କ ଦର୍ଶନ କରିବା ସହ ପୂଜାର୍ଚ୍ଚନା କରି ଫେରିବା ପରେ ସିଂହଦ୍ଵାର ଠାରେ ଜନସମୁଦ୍ରକୁ ପ୍ରଣାମ କରିବା ସହ ହାତ ହଲାଇ ଲୋକଙ୍କୁ ଉତ୍ସାହିତ କରିଥିଲେ । ପରେ ମରଚିକୋଟ ଛକରୁ ଡାକ୍ତରଖାନା ଛକ ପର୍ଯ୍ୟନ୍ତ ରୋଡ ସୋ କରି ଉପସ୍ଥିତ ଲକ୍ଷ ଲକ୍ଷ ଲୋକଙ୍କୁ ଅଭିବାଦନ କରିଥିଲେ । ବଡଦାଣ୍ଡର ବ୍ଯାରିକେଡର ଉଭୟ ପାର୍ଶ୍ଵରେ ଅପେକ୍ଷାରତ ଲୋକଙ୍କୁ ଅଭିବାଦନ ଜଣାଇଥିଲେ ।ଶକ୍ତି ପ୍ରଦର୍ଶନ କରି ବିଜେପିର ଶକ୍ତି ବଢାଇଥିଲେ । କଡା ସୁରକ୍ଷା ବଳୟ ସହ ବ୍ଯାରିକେଡ ମଝି ରାସ୍ତାକୁ ନୋ ମ୍ଯାନ୍ସ ଲ୍ୟାଣ୍ଡ କରାଯାଇଥିଲା । ବ୍ଯାରିକେଡ ମଝିରେ ବିଭିନ୍ନ ସ୍ଥାନରେ ମଞ୍ଚ ନିର୍ମାଣ କରାଯାଇ ଓଡ଼ିଶାର ପାରମ୍ପାରିକ କଳା ସଂସ୍କୃତି ପ୍ରଦର୍ଶିତ ହେଉଥିଲା । ଓଡିଶୀନୃତ୍ଯ, ଗୋଟିପୁଅ ନୃତ୍ୟ , ଘୋଡାନାଚ, ଘଣ୍ଟ ଘଣ୍ଟୁଆ, ମାଲଖମ୍ବ, ଛଉନୃତ୍ଯରେ କମ୍ପୁଥିଲା ବଡଦାଣ୍ଡ । ମୋଦୀ ନାରା ସହ ମୋଦୀମୟ ପାଲଟିଥିଲା ଶ୍ରୀକ୍ଷେତ୍ର । ମୋଦି ଟୋପି ,ପଦ୍ମଫୁଲ ପତକା,ମୋଦି ଫଟୋଚିତ୍ର ସହ ପାରମ୍ପରିକ ଗେରୁଆ ବସ୍ତ୍ରରେ ମହିଳା ମାନେ ନାଚି ନାଚି ଯାଉଥିଲେ ।ମୋଦୀ ଗୀତ ଜୟ ଜଗନ୍ନାଥ, ଜୟ ଶ୍ରୀରାମ, ଓ ମୋଦୀ ମୋଦୀ ନାରା ଦେଉଥିଲେ ଜନତା । ବହୁ ସମର୍ଥକ କର୍ମୀ ଓ ଜନସାଧାରଣ ମୋଦୀଙ୍କୁ ଦେଖି ବହୁ ଉତ୍ସାହିତ ଓ ଆନନ୍ଦିତ ହେଉଥିବା ଦେଖିବାକୁ ମିଳିଥିଲା । ବଡଦାଣ୍ଡରେ ରୋଡ ସୋ ସମୟରେ ଜନସମୁଦ୍ର ଦେଖି ଭାବମୟ ହୋଇପଡିଥିଲେ ମୋଦୀ । ବଡଦାଣ୍ଡରେ ପୁଷ୍ପ ବୃଷ୍ଟି ହେବା ସହ ମୋଦୀ ପ୍ରେମୀଙ୍କ ଲହର ଖେଳିଯାଇଥିଲା । ଏହାପରେ ମେଡିକାଲଛକରୁ କାରକେଡର ପରିଚାଳନାରେ ହେଲିପ୍ଯାଡ଼୍ ଯାଇ ପ୍ରତ୍ଯାବର୍ତ୍ତନ କରିଥିଲେ । ସୁରକ୍ଷା ପାଇଁ ତିନି ଜଣ ଏସପିଙ୍କ ନେତୃତ୍ବରେ ୮ ଜଣ ଏଏସପି ,୨୨ଜଣ ଡିଏସପି,୪୨ ଜଣ ଇନ୍ସପେକ୍ଟର, ୧୦୯ ଜଣ ଏସଆଇ,ଓ ଏଏସ୍ଆଇ, ୩୪ଜଣ ହାବିଲଦାର, ୨୦୨ଜଣ କନେଷ୍ଟବଳ, ଟ୍ରାଫିକ ହାବିଲଦାର ଓ ଏପିଆର, ୨୫୦ ଜଣ ଗୃହରଖୀ ଏବଂ ୬୩ ପ୍ଲାଟୁନ ପୋଲିସ ଫୋର୍ସ ମୁତୟନ ରହିଥିଲେ । ଜିଲ୍ଲା ପ୍ରଶାସନ ଓ ଶ୍ରୀମନ୍ଦିର ପ୍ରଶାସନର ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ ।