ବିଜେଡି ଜାତୀୟ ମୁଖପାତ୍ର ଡ. ସସ୍ମିତ୍ ପାତ୍ର ଏକ ସାମ୍ବାଦିକ ସମ୍ମିଳନୀରେ କଟାକ୍ଷ କରିଥିଲେ । ୮୦ ଆସନ ପାଇଁ ବି ପ୍ରାର୍ଥୀ ନାହାନ୍ତି ।
୩୧ ମାର୍ଚ୍ଚ ୨୦୨୪ (ଓଡ଼ିଆ ତାଜ଼ା ନ୍ୟୁଜ) ଭୁବନେଶ୍ୱର :-> ବିଜେପିକୁ ଆକ୍ରମଣ ଜାରି ରଖିଛି ବିଜେଡି । ୧୪୭ ବିଧାନସଭା ଆସନରେ ଲଢ଼ିବାକୁ ବିଜେପି ପ୍ରାର୍ଥୀ ପାଉନି । ସେଥିପାଇଁ ଏ ଯାଏଁ ଜଣେ ପ୍ରାର୍ଥୀଙ୍କ ନାମ ବି ଘୋଷଣା କରିପାରିନି । ଏହା ହିଁ ବାସ୍ତବିକ ସତ୍ୟ ବୋଲି ଗତକାଲି ବିଜେଡି ଜାତୀୟ ମୁଖପାତ୍ର ଡ. ସସ୍ମିତ୍ ପାତ୍ର ଏକ ସାମ୍ବାଦିକ ସମ୍ମିଳନୀରେ କଟାକ୍ଷ କରିଥିଲେ ।
ଦଳର ମୁଖପାତ୍ର ସ୍ୱୟମ୍ ପ୍ରକାଶ ମହାପାତ୍ର ସାମ୍ବାଦିକ ସମ୍ମିଳନୀ କରି କହିଛନ୍ତି, ଓଡ଼ିଶା ବିଜେପି ପାଖରେ ୧୪୭ ବିଧାନସଭା ନିର୍ବାଚନମଣ୍ଡଳୀ ପାଇଁ ପ୍ରାର୍ଥୀ ଛାଡ଼ନ୍ତୁ, ୮୦ ଆସନ ପାଇଁ ବି ପ୍ରାର୍ଥୀ ନାହାନ୍ତି । ଯାହା ବିଜେପି ପାଇଁ ମୁଣ୍ଡବିନ୍ଧାର କାରଣ ହୋଇଛି । ସେଥିପାଇଁ ଦଳ ପ୍ରାର୍ଥୀ ତାଲିକା ଘୋଷଣା କରିପାରୁନାହିଁ । ଓଡ଼ିଶା ବିଜେପିର ସ୍ଥିତି ଏମିତି ହୋଇଛି ଯେ ସେମାନେ ଯାହାକୁ ଯେଉଁଠୁ ପାରୁଛନ୍ତି ଦଳରେ ସାମିଲ କରାଉଛନ୍ତି । ଯେନତେନ ପ୍ରକାରେ ୧୪୭ ଆସନ ପାଇଁ ତାଲିକା ପୂରଣ କରିବା ଚକ୍କରରେ ଥିବା ଭଳି ସ୍ପଷ୍ଟ ଜଣାପଡୁଛି ।
ଦଳରୁ ବିତାଡ଼ିତ ଓ ଜନବିରୋଧୀ ନେତାଙ୍କ ସହ ଅପରାଧିକ କାର୍ୟ୍ୟରେ ଲିପ୍ତ ଥିବା ନେତାମାନେ ଏବେ ଓଡ଼ିଶା ବିଜେପି ପାଇଁ ଆଶା ଓ ଭରସା ହୋଇଛନ୍ତି । ବନ୍ୟାରେ ଭାସି ଯାଉଥିବା ବେଳେ କୁଟାଖିଅକୁ ଆଶ୍ରା କଲା ଭଳି ବିଜେପିର ଅବସ୍ଥା ହୋଇଛି । ଏହା ଦେଖି ସାଢ଼େ ଚାରି କୋଟି ଓଡ଼ିଶାବାସୀ, ଓଡ଼ିଶା ବିଜେପି ଉପରେ ହସିବା ଆରମ୍ଭ କଲେଣି ବୋଲି ବିଜେଡି ମୁଖପାତ୍ର କହିଛନ୍ତି ।
ପଦ୍ମ ଧରିଲେ ଅନୁଭବ ବିଜେଡଇରୁ ଇସ୍ତଫା ଦେଇଥିବା କେନ୍ଦ୍ରାପଡ଼ା ସାଂସଦ ଅନୁଭବ ମହାନ୍ତି ଆଜି ବିଜେପିରେ ଯୋଗ ଦେଇଛନ୍ତି । ନୂଆଦିଲ୍ଲୀସ୍ଥିତ ବିଜେପି ମୁଖ୍ୟ କାର୍ୟ୍ୟାଳୟରେ ସେ ପଦ୍ମ ଧରିଛନ୍ତି । ଦେଶର ବିକାଶ ପାଇଁ ପ୍ରତ୍ୟେକ ଯୁବକ ବିଜେପି ପରିବାରରେ ସାମିଲ ହେବା ଦରକାର ବୋଲି ସେ କହିଛନ୍ତି । ଶଙ୍ଖ ଛାଡ଼ିଲେ ସନ୍ଧ୍ୟାବତୀ ବିଜେଡିରୁ ଇସ୍ତଫା ଦେଇଛନ୍ତି ପିପିଲି ଆଶାୟୀ ପ୍ରାର୍ଥୀ ତଥା ରାଜ୍ୟ ଶିଶୁ ଅଧିକାର ସୁରକ୍ଷା ଆୟୋଗର ପୂର୍ବତନ ଅଧ୍ୟକ୍ଷା ସନ୍ଧ୍ୟାବତୀ ପ୍ରଧାନ । ସେ ତାଙ୍କ ଇସ୍ତଫାପତ୍ର ଦଳର ସଭାପତି ନବୀନ ପଟ୍ଟନାୟକଙ୍କ ପାଖକୁ ପଠାଇ ଦେଇଛନ୍ତି ।
