୧୨ ଫେବୃଆରୀ ୨୦୨୪ (ଓଡିଶା ତାଜା ନିୟୁଜ) ଭୁବନେଶ୍ୱର :-> ଗତ କାଲି ଭୁବନେଶ୍ୱର ଓ କଟକରେ ଅବସ୍ଥାନ କରୁଥିବା ବୀରନରସିଂହପୁର ଗ୍ରାମର ଗ୍ରାମବାସୀ ମାନଙ୍କର ଦ୍ଵିତୀୟ ବାର୍ଷିକ ମିଳନୋତ୍ସବ ସମାରୋହ ବାଣୀବିହାର ସନ୍ନିକଟ ଶୀତଲ ହୋଟେଲରେ ମୋ ଗାଁ ବୀରନରସିଂହପୁର କମିଟିର ସଭାପତି ଡଃ ଶିତିକଣ୍ଠ ମିଶ୍ରଙ୍କ ସଭାପତିତ୍ୱରେ ଅନୁଷ୍ଠିତ ହୋଇଥିଲା | ଏଥିରେ ଗ୍ରାମର ଶତାଧିକ ସଦସ୍ୟ ଯୋଗଦେଇଥିଲେ | କମିଟିର ଉପଦେଷ୍ଟା ପୂର୍ବତନ ଜିଲ୍ଲାପାଳ କୃଷ୍ଣଚନ୍ଦ୍ର ମହାପାତ୍ର , ଆଇଏଏସ ଉତ୍ସବର ଆଭିମୁଖ୍ୟ ସମ୍ବନ୍ଧରେ ଆଲୋକପାତ କରିଥିଲେ | ସମାରୋହରେ ଭାର୍ଗବୀ ହାଇସ୍କୁଲର ଯଶସ୍ବୀ ଶିକ୍ଷକ ସ୍ବର୍ଗତ ନାରାୟଣ ମହାପାତ୍ରଙ୍କ ରଚିତ ଗୀତି ରାମାୟଣର ଲୋକାର୍ପଣ ଓ ପ୍ରସାରଣ ହୋଇଥିଲା |
ସମସ୍ତେ ନିଜର ପରିଚୟ ପ୍ରଦାନ କଲାବେଳେ ଗ୍ରାମ କଥା ସ୍ମରଣ କରି ଭାବବିହ୍ୱଳ ହୋଇଯାଇଥିଲେ | ଏହି ଅବସରରେ ଦିବଂଗତ ଆତ୍ମା ମାନଙ୍କପାଇଁ ଗୋଟିଏ ମିନିଟ ନିରବ ପ୍ରାର୍ଥନା କରାଯାଇଥିଲା | ଆଜୀବନ ସଂଗୀତ ସାଧନା ପାଇଁ ଗ୍ରାମର ଶ୍ରୀ ପ୍ରଭାକର ରଥଙ୍କୁ ଶ୍ରୀକ୍ଷେତ୍ର ସଂଗୀତ ସଂସ୍କୃତି ସମ୍ମାନରେ ସମ୍ମାନିତ କରାଯାଇଥିଲା | ଏହି ଉତ୍ସବରେ ସମସ୍ତଙ୍କର ଅଗ୍ରଜ ପ୍ରତିମ ରବିନ୍ଦ୍ରନାଥ ମିଶ୍ର ମୁଖ୍ୟ ଅତିଥି , ପୂର୍ବତନ ବିଧାୟକ ଉମାବଲ୍ଲଭ ରଥ ବିଶିଷ୍ଟ ଅତିଥି ଓ ଅଖିଳ ଭାରତ ଆୟୁର୍ବିଜ୍ଞାନ ସଂସ୍ଥା ଭୁବନେଶ୍ୱରର ପୂର୍ବତନ ନିର୍ଦ୍ଦେଶକ ଡଃ ଅଶୋକ କୁମାର ମହାପାତ୍ର ସମ୍ମାନିତ ଅତିଥି ଭାବେ ଯୋଗ ଦେଇ ଉତ୍ତମ ଶିକ୍ଷା , ସ୍ୱାସ୍ଥ୍ୟ ରକ୍ଷା ଉପରେ ଗୁରୁତ୍ୱ ଦେଇ ଚରିତ୍ରବାନ ଓ ପରୋପକାରୀ ହେବାକୁ ପରାମର୍ଶ ଦେଇଥିଲେ |
ପ୍ରତିଭା ପ୍ରଦର୍ଶନ କାର୍ଯ୍ୟକ୍ରମରେ ଅନେକ ସଦସ୍ୟ ଭାଗନେଇ ଶ୍ଳୋକ, ସ୍ବରଚିତ କବିତା ଓ ଓଡିଆ ଭଜନ ବୋଲି ସମସ୍ତଙ୍କୁ ଅଭିଭୂତ କରିଥିଲେ | କାର୍ଯ୍ୟକ୍ରମକୁ ସଫଳ କରିବାରେ ମାନସ କୁମାର ରଥ, ଚନ୍ଦ୍ର ଶେଖର ମିଶ୍ର ଓ ବାଳମୁକୁନ୍ଦ ହୋତା, ନଳିନୀକାନ୍ତ ରଥ , ବ୍ରଜମୋହନ ରଥ , ଦୁର୍ଗାପ୍ରସାଦ ରଥ, ରବିନାରାୟଣ ମିଶ୍ର ଓ କଲ୍ୟାଣ ମିଶ୍ରଙ୍କ ଅବଦାନ ଅନସ୍ବୀକାର୍ଯ୍ୟ | ଉପସଭାପତି ଗିରିଜା ଶଙ୍କର ମିଶ୍ର ଉପସ୍ଥାପକ ଭାବେ କାର୍ଯ୍ୟ ପରିଚାଳନା କରିବା ସହ ଧନ୍ୟବାଦ ଅର୍ପଣ କରିଥିଲେ |
