୩୦ ଜାନୁଆରୀ ୨୦୨୪ (ଓଡିଶା ତାଜା ନ୍ୟୁଜ) ବାଲୁଗାଁ :-> ଖୋର୍ଦ୍ଧା ଜିଲ୍ଲା ବାଣପୁର ବ୍ଲକ ଅନ୍ତର୍ଗତ ନନ୍ଦପୁର ପଞ୍ଚାୟତର ଅଲାଇଡ଼ିହ ଗ୍ରାମକୁ ସଂଯୋଗ କରୁଥିବା ମୁଖ୍ୟ ରାସ୍ତାରେ ଦେଖିବାକୁ ମିଳିଛି ଏକ ବିରାଟକାୟ ଗର୍ତ୍ତ | ପଞ୍ଚାୟତର ଅଲାଇଡିହ , କୁମ୍ଭକାରଡ଼ିହ ପ୍ରମୂଖ ଦୁଇଟି ଗ୍ରାମର ପ୍ରାୟ ତିନି ହଜାର ଲୋକ ପ୍ରତ୍ୟହ ଯିବା ଆସିବା କରିବା ପାଇଁ ଏହି ରାସ୍ତା ଉପରେ ନିର୍ଭରଶୀଳ କରିଥାନ୍ତି । ପ୍ରଧାନ ମନ୍ତ୍ରୀ ଗ୍ରାମ୍ୟ ସଡ଼କ ଯୋଜନାରେ ନିର୍ମିତ ଏହି ରାସ୍ତାଟି ହେଉଛି ଗାଁ’ ର ମୁଖ୍ୟ ରାସ୍ତା |
ଏହା ଗ୍ରାମକୁ ସିଧା ୧୬ ନମ୍ବର ଜାତୀୟ ରାଜପଥ କୁ ସଂଯୋଗ କରୁଥିବାରୁ ବାହାର ଲୋକଙ୍କ ଯିବା ଆସିବା ପାଇଁ ମଧ୍ୟ ଏହା ଉପଯୋଗୀ ହୋଇଥାଏ | ସୋମବାର ବିଳମ୍ବିତ ରାତ୍ରିରେ ଏକ ମାଲ ବୋଝେଇ ଗାଡ଼ି ଏହି ରାସ୍ତାରେ ଯାଉଥିବା ବେଳେ ଭାରସାମ୍ୟ ହରାଇ ରାସ୍ତାଟି ଭାଙ୍ଗି ଏକ ବିରାଟକାୟ ଗର୍ତ୍ତ ସୃଷ୍ଟି ହୋଇଥିଲା | ଫଳରେ ଉଭୟ ଗାଁ’ ମୂଖ୍ୟ ରାସ୍ତାରୁ ଏକ ପ୍ରକାର ବିଛିନ୍ନ ହୋଇପଡିବା ସହ ଗ୍ରାମବାସୀ ଓ ଯାତ୍ରୀ ମାନେ ବିଶେଷ ଅସୁବିଧାର ସମ୍ମୁଖିନ ହେଉଛନ୍ତି ।
ଏ ନେଇ ଗ୍ରାମବାସୀଙ୍କ ତରଫରୁ ସ୍ଥାନୀୟ ଜନ ପ୍ରତିନିଧି ଙ୍କୁ ଅବଗତ କରାଇବା ସହ ରାସ୍ତାଟି ତୁରନ୍ତ ମରାମତି କରିବାପାଇଁ ପ୍ରଶାସନିକ ଅଧିକାରୀଙ୍କୁ ଅନୁରୋଧ କରାଯାଇଛି | ରାସ୍ତା ମରାମତି କରିବାପାଇଁ ପ୍ରଶାସନ ଓ ଲୋକ ପ୍ରତିନିଧି ମାନଙ୍କୁ ବାରମ୍ବାର ଜଣାଇବା ପରେ ମଧ୍ୟ ଦୀର୍ଘ ୨୦ ବର୍ଷର ପୁରୁଣା ରାସ୍ତାର ମରାମତି କାମ ହେଉନଥିବାରୁ ଆଜି ଏହିପରି ଦୁର୍ଦ୍ଦଶା ଭୋଗିବାକୁ ପଡୁଛି ବୋଲି ଗ୍ରାମବାସୀ ଅଭିଯୋଗ କରିଛନ୍ତି |
