୨୦ ସେପ୍ଟେମ୍ବର ୨୦୨୩ (ଓଡ଼ିଶା ତାଜା ନ୍ୟୁଜ ) ନୂଆଦିଲ୍ଲୀ :-> ଲୋକସଭାରେ ମହିଳା ସଂରକ୍ଷଣ ବିଧେୟକ ଆଗତ କରିବା ନିମନ୍ତେ କେନ୍ଦ୍ର ସ୍ୱରାଷ୍ଟ୍ର ଓ ସହକାରିତା ମନ୍ତ୍ରୀ ଶ୍ରୀ ଅମିତ ଶାହ ଦେଶର ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କୁ ବିପୁଳ ପ୍ରଶଂସା କରିବା ସହିତ ଆନ୍ତରିକ ଧନ୍ୟବାଦ ଜଣାଇଛନ୍ତି । ସେ କହିଛନ୍ତି ଯେ ମହିଳାମାନଙ୍କୁ ସେମାନଙ୍କ ଅଧିକାର ପ୍ରଦାନ ସହିତ ପ୍ରଧାନମନ୍ତ୍ରୀ ମଧ୍ୟ ସେମାନଙ୍କର ସମ୍ମାନରେ ବୃଦ୍ଧି ଘଟାଇବା ଦିଗରେ କାର୍ଯ୍ୟ କରିଛନ୍ତି । ଫଳସ୍ୱରୂପ ଏହି ବିଧେୟକକୁ ନାରୀ ଶକ୍ତି ବନ୍ଦନ ବିଧେୟକ ଭାବରେ ନାମିତ କରାଯାଇଛି ।
ଶ୍ରୀ ଅମିତ ଶାହ ଜୋର୍ ଦେଇ କହିଛନ୍ତି ଯେ ମୋଦୀ ଜୀ ‘ଯତ୍ର ନାର୍ୟସୁ ପୂଜ୍ୟନ୍ତେ, ରମେନ୍ତ ତତ୍ର ଦେବତା’ ନୀତିକୁ ରୂପାୟନ୍ତ କରି ଭାରତୀୟ ସଂସ୍କୃତିର ମୂଲ୍ୟବୋଧ ଏବଂ ରାଷ୍ଟ୍ରର ଗଣତାନ୍ତ୍ରିକ ବ୍ୟବସ୍ଥାକୁ ଉଚ୍ଚତର ସୋପାନକୁ ନେଇଯାଇଛନ୍ତି । ଏଠାରେ ଉଲ୍ଲେଖଯୋଗ୍ୟ ଯେ ଚଳିତ ମାସ ୧୯ ତାରିଖରେ ନୂତନ ସଂସଦ ଗୃହର ଲୋକସଭା କକ୍ଷରେ ନାରୀ ଶକ୍ତି ବନ୍ଦନ ବିଧେୟକ ଆଗତ କରାଯାଇଛି । ଶ୍ରୀ ଅମିତ ଶାହ ଏହା ଭରସା ଦେଇ କହିଥିଲେ ମୋଦୀ ଜୀ ଏହା ପ୍ରଦର୍ଶିତ କରିଛନ୍ତି ଯେ, ମହିଳା ସଶକ୍ତୀକରଣ ଏନ୍ଡିଏ ସରକାର ପାଇଁ କେବଳ ଏକ ସ୍ଲୋଗାନ ନୁହେଁ, ବରଂ ଏହା ସରକାରଙ୍କର ମଜଭୁତ ନିର୍ଣ୍ଣୟ ଭାବରେ ଛିଡା ହୋଇଛି ।
କୋଟି କୋଟି ଭାରତୀୟଙ୍କ ତରଫରୁ ଏହି ଐତିହାସିକ ମୁହୂର୍ତ୍ତ ନିମନ୍ତେ ସେ ପ୍ରଧାନମନ୍ତ୍ରୀଙ୍କୁ ହାର୍ଦ୍ଦିକ ଅଭିନନ୍ଦନ ଜଣାଇବା ସହିତ ସମସ୍ତ ମା’ ଓ ଭଉଣୀମାନଙ୍କ ତରଫରୁ ତାଙ୍କୁ କୃତଜ୍ଞତା ଜ୍ଞାପନ କରିଛନ୍ତି । ଏହା ଆଇନରେ ପରିଣତ ହେଲେ ମହିଳାମାନେ କେବଳ ସଂରକ୍ଷଣ ଅଧିକ ହାସଲ କରିବେ ନାହିଁ, ତାହାସହିତ ସେମାନେ ଭାରତକୁ ଆତ୍ମନିର୍ଭରଶୀଳତା ଓ ବିକାଶ ଦିଗରେ ଆଗେଇ ନେବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବେ ।
ନିଜର ଭାବନା ସମ୍ପର୍କରେ ଏକ୍ସ (ପୂର୍ବର ଟ୍ୱିଟର)ରେ ପ୍ରକାଶ କରି ଶ୍ରୀ ଅମିତ ଶାହ ଲେଖିଛନ୍ତି ଯେ, ସମଗ୍ର ଭାରତରେ ଜନସାଧାରଣ ନାରୀ ଶକ୍ତି ବନ୍ଦନ ବିଧେୟକକୁ ସଂସଦରେ ଉପସ୍ଥାପନ କରାଯିବା ବିଷୟକୁ ନେଇ ଖୁସି ମନାଉଛନ୍ତି ।
ଏହା ମହିଳା ସଶକ୍ତୀକରଣ ଦିଗରେ ମୋଦୀ ସରକାରଙ୍କ ଉତ୍ସର୍ଗୀକୃତ ଭାବକୁ ପ୍ରଦର୍ଶିତ କରୁଛି । କିନ୍ତୁ ପରିତାପର ବିଷୟ ଯେ, ଏହି ବାସ୍ତବତାକୁ ଗ୍ରହଣ କରିବା ନିମନ୍ତେ ବିରୋଧୀ ଦଳଗୁଡିକ ଅସମର୍ଥ ଥିବା ଲକ୍ଷ୍ୟ କରାଯାଉଛି । ସବୁଠାରୁ ବଡ ଦୁଃଖର କଥା ହେଉଛି ଯେ, କେବଳ ପ୍ରତୀକାତ୍ମକ ବ୍ୟତୀତ କଂଗ୍ରେସ ମହିଳାମାନଙ୍କ ପାଇଁ ସଂରକ୍ଷଣ ଦିଗରେ କଦାପି ବାସ୍ତବ ପ୍ରତିବଦ୍ଧତା ପ୍ରଦର୍ଶନ କରିନାହିଁ । ସେମାନେ ହୁଏତ ଉକ୍ତ ଆଇନକୁ ଅକାମୀ ହେବାକୁ ଛାଡି ଦେଇଛନ୍ତି ଅଥବା ସେମାନଙ୍କର ମିତ୍ର ଦଳଗୁଡିକ ଉକ୍ତ ବିଧେୟକ ଆଗତ କରିବାରେ ପ୍ରତିବନ୍ଧକ ହୋଇଛନ୍ତି । ସେମାନେ ଏହି ବିଷୟରେ ବାହାବା ନେବାକୁ ଯେତେ ଚେଷ୍ଟା କଲେ ମଧ୍ୟ ସେମାନଙ୍କର ଚାଲବାଜି ସର୍ବଦା ଜଳ ଜଳ ହୋଇ ଦେଖାଯାଉଥିବ ।
