୧୩ ସେପ୍ଟେମ୍ବର ୨୦୨୩ (ଓଡ଼ିଶା ତାଜା ନ୍ୟୁଜ ) କଳାହାଣ୍ଡି :-> ସ୍ଥାନୀୟ ଜିଲ୍ଲା ଯୋଜନା ଓ ସମନ୍ବୟ କାର୍ଯ୍ୟ।ଳୟର ସଭାଗୃହରେ ଭାରତ ସରକାରଙ୍କ ଧାରଣୀୟ ବିକାଶ ଲକ୍ଷ୍ୟ ୨୦୩୦ ଅନ୍ତର୍ଗତ ସମସ୍ତଙ୍କୁ ସ୍ବାସ୍ଥ୍ୟସେବା ଏବଂ ଏଥିପାଇଁ ଜନ ସଚେତନତା ଉପଲକ୍ଷେ “ଆୟୁଷ୍ମାନ ଭବ” ର ଶୁଭ ଉନ୍ମୋଚନ ହୋଇଯାଇଛି । ଏହି ଉପଲକ୍ଷେ ଜାତୀୟ ସ୍ତରରେ ଭର୍ଚୁଆଲ ମୋଡରେ ମହାମହିମ ରାଷ୍ଟ୍ରପତି ଶ୍ରୀମତୀ ଦ୍ରୌପଦୀ ମୁର୍ମୁ ଏହାର ଶୁଭ ଉନ୍ମୋଚନ କରିଛନ୍ତି ଏବଂ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀ ଡଃ ମନସୁଖ ମାଣ୍ଡଭିୟ ଦେଶକୁ ଏହାର କାର୍ଯ୍ୟ ଦକ୍ଷତା ଓ ଲକ୍ଷ୍ୟ ଉପରେ କହିଥିଲେ । ଏହି ଅବସରରେ କଳାହାଣ୍ଡି ସାଂସଦ ଶ୍ରୀ ବସନ୍ତ ପଣ୍ଡା ମୁଖ୍ୟ ଅତିଥି ରୂପେ ଏବଂ ସମ୍ମାନିତ ଅତିଥି ରୂପେ ଜିଲ୍ଲାପରିଷଦ ଅଧ୍ୟକ୍ଷ ଶ୍ରୀ ପୁଷ୍ପେନ୍ଦ୍ର କୁମାର ସିଂହଦେଓ , ଅତିରିକ୍ତ ଜିଲ୍ଲାପାଳ ଶ୍ରୀ ତନ୍ମୟ କୁମାର ଦରୱାନ , ସି.ଡି.ଏମ. ଓ ପି.ଏଚ.ଓ ଡଃ ନିହାରେନ୍ଦ୍ର ପଣ୍ଡା , ଡି.ପି.ଏଚ.ଓ ଡଃ ରାଜେଶ ସାହୁ , ବରିଷ୍ଠ ଆଇନଜୀବୀ ଶ୍ରୀ ଜଗନ୍ନାଥ ମୁଣ୍ଡ ପ୍ରମୁଖ ଯୋଗ ଦେଇଥିଲେ ।
ବୈଠକ ପ୍ରାରମ୍ଭରେ ସି.ଡି.ଏମ.ଓ ଡଃ ନିହାରେନ୍ଦ୍ର ପଣ୍ଡା ସମସ୍ତଙ୍କୁ ସ୍ଵାଗତ କରି ଏହି ଯୋଜନାର ଉଦ୍ଦେଶ୍ୟ , ଜିଲ୍ଲା ଓ ବ୍ଲକ ସ୍ତରରେ କାର୍ଯ୍ୟକାରିତା ଓ ଲକ୍ଷ୍ୟ ଉପରେ ସମ୍ୟକ ଧାରଣା ଦେଇଥିଲେ । ସୂଚନା ଅନୁସାରେ ୧୭ ସେପ୍ଟେମ୍ବର ରୁ ଅକ୍ଟୋବର ୨ ପର୍ଯ୍ୟନ୍ତ ସେବା ପଖୱାଡା ଅନ୍ତର୍ଗତ ସାପ୍ତାହିକ ସ୍ବାସ୍ଥ୍ୟ ମେଳା ସ୍ବାସ୍ଥ୍ୟକେନ୍ଦ୍ରମାନଙ୍କରେ ଆରମ୍ଭ ହେବ ଏବଂ ଏହା ବିଭିନ୍ନ ସ୍ବାସ୍ଥ୍ୟସେବା ଓ ଉପକାରିତା ଉପରେ ଜନ ଜାଗରଣ ସୃଷ୍ଟି କରିବ । ପ୍ରଥମ ସପ୍ତାହରେ ଅଣ ସଙ୍କ୍ରାମକ ରୋଗ ଯଥା ଉଚ୍ଚ ରକ୍ତଚାପ , ମଧୁମେୟ , କର୍କଟ ; ଦ୍ଵିତୀୟ ସପ୍ତାହରେ ସଂକ୍ରାମକ ରୋଗ ଡେଙ୍ଗୁ , ମ୍ୟାଲେରିଆ , ଯକ୍ଷ୍ମା ଇତ୍ୟାଦି; ତୃତୀୟ ସପ୍ତାହରେ ଶିଶୁ ସ୍ୱାସ୍ଥ୍ୟ , ପ୍ରଜନନ , ପୁଷ୍ଟିପୋଷଣ ଏବଂ ଚତୁର୍ଥ ସପ୍ତାହରେ ମାନସିକ ରୋଗ, ସିକେଲ ସେଲ ରୋଗ, ଚକ୍ଷୁ ଚିକିତ୍ସା ଉପରେ ଗୁରୁତ୍ଵ ଦିଆଯିବ ।
ଏହି ମେଳାରେ ମେଡିକାଲ କଲେଜରେ ବିଭିନ୍ନ ରୋଗର ବିଶେଷଜ୍ଞ ତଥା ଡାକ୍ତରଙ୍କ ଦ୍ବାରା ରୋଗର ଚିହ୍ନଟ , ନିଦାନ ଓ ଚିକିତ୍ସାର ବ୍ୟବସ୍ଥା କରାଯାଇଛି । ସେଭଳି ଆସନ୍ତା ଅକ୍ଟୋବର ୨ ତାରିଖରେ ପ୍ରତ୍ୟେକ ଗ୍ରାମରେ ଓ ସହର ଅଞ୍ଚଳରେ ୱାର୍ଡ ମାନଙ୍କରେ ସଭା କରାଯାଇ ବିଭିନ୍ନ ସ୍ୱାସ୍ଥ୍ୟ ଯୋଜନା , ଆୟୁଷ୍ମାନ କାର୍ଡ , ଆଭା ଆଇଡି , ସିକିଲ ସେଲ ରୋଗ , ଟୀକାକରଣ , ଯକ୍ଷ୍ମା ରୋଗ ଚିହ୍ନଟର ବ୍ୟବସ୍ଥା କରାଯିବ । ଏହି ସେବା ପଖୱାଡା କାର୍ଯ୍ୟକ୍ରମ ମଧ୍ୟରେ ସମସ୍ତ ସଦର ଡାକ୍ତରଖାନା , ପି.ଏଚ.ସି , ସି.ଏଚ.ସି ମାନଙ୍କରେ ସ୍ବଚ୍ଛ ଅଭିଯାନ , ଅଙ୍ଗଦାନ ଶପଥ କାର୍ଯ୍ଯକ୍ରମ ଏବଂ ରକ୍ତଦାନ କାର୍ଯ୍ୟକ୍ରମ କରାଯିବ । ସାଂସଦ ଶ୍ରୀ ପଣ୍ଡା ନିଜ ବକ୍ତବ୍ୟରେ ‘ସର୍ବେ ସନ୍ତୁ ନିରାମୟ’ ବାଣୀ ଉଚ୍ଚାରଣ କରି ଏହି ମହାନ କାର୍ଯ୍ୟକ୍ରମରେ ସମସ୍ତଙ୍କ ସହଭାଗିତା ସହ କେନ୍ଦ୍ର ଦ୍ଵାରା ବିଭିନ୍ନ ସ୍ୱାସ୍ଥ୍ୟ ଯୋଜନାର ଅବତାରଣ କରି ଜିଲ୍ଲାରେ ମେଡିକାଲ କଲେଜ , କ୍ରିଟିକାଲ କେୟାର ସେଣ୍ଟର , ଟ୍ରାଉମା କେୟାର ସେଣ୍ଟର , ନୂତନ ସି.ଏଚ.ସି , ପି.ଏଚ.ସି , ଅକ୍କ୍ଶିଜେନ ପ୍ଳାଣ୍ଟ , କ୍ୟାନ୍ସର କେୟାର ହସ୍ପିଟାଲ ତଥା ମିଶନ ଇନ୍ଦ୍ରଧନୁଷ ଉପରେ ତଥ୍ୟ ରଖିଥିଲେ ।
ଜିଲ୍ଲାରେ ଜନଔଷଧି କେନ୍ଦ୍ର ଯଥାଶୀଘ୍ର ବ୍ୟବସ୍ଥା କରି ଗରିବ ଲୋକଙ୍କୁ ଅତି ଅଳ୍ପମୂଲ୍ୟରେ ଔଷଧ ଯୋଗାଇବାର ବ୍ୟବସ୍ଥା କରିବା ପାଇଁ ସି ଡି ଏମ ଓ ଙ୍କୁ କହିଥିଲେ । ଏହି “ଆୟୁଷ୍ମାନ ଭବ” କାର୍ଯ୍ୟକ୍ରମର ଓଡିଆ ଭାଷାରେ ଲିଫଲେଟ କରାଯାଇ ସମସ୍ତ ୱାର୍ଡ ମେମ୍ବର , ସରପଞ୍ଚ , ସମିତି ସଭ୍ଯ , ଜିଲ୍ଲା ପରିଷଦ ସଭ୍ଯଙ୍କୁ ଏବଂ ଲୋକଙ୍କ ମଧ୍ୟରେ ସଚେତନତା ସୃଷ୍ଟି କରିବା ପାଇଁ କହିଥିଲେ । ଜିଲ୍ଲା ପରିଷଦ ଅଧ୍ୟକ୍ଷ ଶ୍ରୀ ପୁଷ୍ପେନ୍ଦ୍ର ସିଂହଦେଓ ନିଜ ବକ୍ତବ୍ୟରେ କେନ୍ଦ୍ର ଓ ରାଜ୍ୟର ସହଯୋଗରେ ସ୍ୱାସ୍ଥ୍ୟ ସମ୍ବନ୍ଧୀୟ ବିଭିନ୍ନ ସ୍କିମର ପ୍ରଶଂସା କରି ଏହା ଯେଭଳି ଦୁର୍ଗମ ପାହାଡ ଅଞ୍ଚଳରେ ବାସ କରୁଥିବା ଜନଜୀବନକୁ ସେବା ପ୍ରଦାନ କରିପାରିବ ତା’ ଉପରେ ଦୁଷ୍ଟି ଦେବାକୁ କହିଥିଲେ । ବରିଷ୍ଠ ଆଇନଜୀବୀ ଶ୍ରୀ ଜଗନ୍ନାଥ ମୁଣ୍ଡ ବର୍ତ୍ତମାନ ସ୍ୱାସ୍ଥ୍ୟ ସେବା ଅତି ଉନ୍ନତମାନର ହେଉଛି ଓ ଏହାର ଉପକାର କିଭଳି ଲୋକ ପାଆନ୍ତୁ ଏବଂ ସୁଯୋଗ ନେବାକୁ ବ୍ୟାପକ ପ୍ରଚାର ପ୍ରସାରର ଆବଶ୍ୟକ କହିବା ସହ “ ଅଙ୍ଗଦାନ କାର୍ଯ୍ୟକ୍ରମ” ରେ ନିଜେ ପ୍ରଥମେ ମରଣୋତ୍ତର ଅଙ୍ଗଦାନ କରିବାକୁ ସଭାରେ ନିଜର ଇଚ୍ଛା ଜାହିର କଲେ ।
ଏହି ଅବସରରେ ସ୍ୱାସ୍ଥ୍ୟ ସେବା କ୍ଷେତ୍ରରେ ଉଲ୍ଲେଖନୀୟ କାର୍ଯ୍ୟ କରିଥିବା ଅନୁଷ୍ଠାନ ଓ ବ୍ୟକ୍ତିବିଶେଷଙ୍କୁ ପୁରସ୍କୃତ କରାଯାଇଥିଲା । ନିକ୍ଷୟ ମିତ୍ର ଭାବେ ବେଦାନ୍ତ ଆଲୁମିନା , ଉତ୍କଳ ଆଲୁମିନା ଏବଂ ସ୍ୱାସ୍ଥ୍ୟ ସ୍ବରାଜ ଅନୁଷ୍ଠାନର ଯକ୍ଷ୍ମାରୋଗୀଙ୍କୁ ସହାୟତା ଦେବା, ଜିଲ୍ଲାରେ ସର୍ବାଧିକ ୩୦ ୟୁନିଟ ରକ୍ତଦାନ କରିଥିବା ଶ୍ରୀ ରାଜେଶ ଗଉଡଙ୍କୁ , ଏନକ୍ଯୁଅସ ଡାକ୍ତରଖାନା ସାର୍ଟିଫିକେଟ ପାଇଥିବା ଦେପୁର ଏବଂ ଦାଦପୁର ସ୍ବାସ୍ଥ୍ୟକେନ୍ଦ୍ରକୁ , ଶ୍ରେଷ୍ଠ ଏନ୍ ସି ଡି ସ୍କ୍ରିନିଂ ବ୍ଲକ୍ ଭାବେ ବୋର୍ଡା ଏବଂ ସିକିଲ ସେଲ୍ ମିଶନ ହିତାଧିକାରୀ ୩ ଜଣଙ୍କୁ ମୁଖ୍ୟ ଅତିଥି ସାର୍ଟିଫିକେଟ ଓ ପୁରସ୍କାର ପ୍ରଦାନ କରିଥିଲେ । ସଭାରେ ସହରର ସଚେତନ ନାଗରିକ , ବିଭାଗୀୟ ଅଧିକାରୀ , ସ୍ୱାସ୍ଥ୍ୟ ବିଭାଗର ଅଧିକାରୀ ଓ କର୍ମଚାରୀ , ବିଭିନ୍ନ ଅନୁଷ୍ଠାନର କର୍ମକର୍ତ୍ତା ଉପସ୍ଥିତ ଥିଲେ । ଶେଷରେ ଡି.ପି.ଏମ ( ଏନ.ଏଚ.ଏମ ) ଅବନୀ ରଞ୍ଜନ ମହାପାତ୍ର ଧନ୍ୟବାଦ ଦେଇଥିଲେ ।
