ଡକ୍ଟର ସର୍ବପଲ୍ଲୀ ରାଧାକ୍ରିଷ୍ଣନଙ୍କୁ ଶ୍ରଦ୍ଧାଞ୍ଜଳି ପ୍ରଦାନ
ଶିକ୍ଷା ପ୍ରତି ଉଲ୍ଲେଖନୀୟ ଯୋଗଦାନ ପାଇଁ ୧୩ ଶିକ୍ଷକ ସମ୍ବର୍ଦ୍ଧିତ
୬ ସେପ୍ଟେମ୍ବର ୨୦୨୩ (ଓଡ଼ିଶା ତାଜା ନ୍ୟୁଜ ) ଗୋପାଳପୁର :-> ଟାଟା ଷ୍ଟିଲ୍ ଫାଉଣ୍ଡେସନ (ଟିଏସ୍ଏଫ୍)ର ଗୋପାଳପୁର ୟୁନିଟ୍ ପକ୍ଷରୁ ଭାରତର ଦ୍ୱିତୀୟ ରାଷ୍ଟ୍ରପତି ଡକ୍ଟର ସର୍ବପଲ୍ଲୀ ରାଧାକ୍ରିଷ୍ଣନଙ୍କୁ ଶ୍ରଦ୍ଧାଞ୍ଜଳି ପ୍ରଦାନ କରାଯିବା ସହିତ ୬୧ତମ ଗୁରୁ ଦିବସକୁ ବଡ଼ ଉତ୍ସାହର ସହ ପାଳନ କରାଯାଇଛି । ଶିକ୍ଷା କ୍ଷେତ୍ର ପ୍ରତି ଉଲ୍ଲେଖନୀୟ ଯୋଗଦାନ ଓ ପ୍ରତିବଦ୍ଧତା ପାଇଁ ଏହି ଅଂଚଳର ୧୩ ବିଶିଷ୍ଟ ଶିକ୍ଷକଙ୍କୁ ଫାଉଣ୍ଡେସନ ପକ୍ଷରୁ ସମ୍ବର୍ଦ୍ଧିତ କରାଯାଇଥିଲା । ଯୁବପିଢ଼ି ଓ ସାମଜ ଗଠନରେ କରିବାରେ ଶିକ୍ଷକମାନଙ୍କ ଗୁରୁତ୍ୱପୂର୍ଣ୍ଣ ଭୂମିକାକୁ ସ୍ୱୀକୃତି ପ୍ରଦାନ କରି ଟିଏସଏଫ୍ ପକ୍ଷରୁ ପ୍ରାଥମିକ, ଉଚ୍ଚ ପ୍ରାଥମିକ, ଉଚ୍ଚ ମାଧ୍ୟମିକ ବିଦ୍ୟାଳୟ, ନୃତ୍ୟ ବିଦ୍ୟାଳୟ ଓ ଦକ୍ଷତା ବିକାଶ ଅନୁଷ୍ଠାନ ଭଳି ବିଭିନ୍ନ ବର୍ଗର ଶିକ୍ଷକମାନଙ୍କୁ ସମ୍ବର୍ଦ୍ଧିତ କରାଯାଇଥିଲା ।
ଏହି ଅବସରରେ ବ୍ରହ୍ମପୁର ମୁନିସପାଲିଟି କର୍ପୋରେସନ (ବିଇଏମ୍ସି)ର ମେୟର ସଂଘମିତ୍ରା ଦଳେଇ ଅତିଥି ଭାବେ ଯୋଗ ଦେଇ ଟିଏସ୍ଏଫ୍ର ଏହି କାର୍ଯ୍ୟକ୍ରମକୁ ପ୍ରଶଂସା କରିବା ସହିତ କହିଛନ୍ତି ଯେ, “ଶିକ୍ଷକ/ ଶିକ୍ଷୟିତ୍ରୀମାନେ ହେଉଛନ୍ତି ଆମ ସମାଜର ଅଜଣା ନାୟକ ଏବଂ ସେମାନଙ୍କ ଉଦ୍ୟମକୁ ସ୍ୱୀକୃତି ପ୍ରଦାନ କରିବା ଲାଗି ଟାଟା ଷ୍ଟିଲ୍ ଫାଉଣ୍ଡେସନ ଭଳି ସଂସ୍ଥା ଆଗେଇ ଆସିବା ଦେଖି ଖୁସି ଲାଗୁଛି । ଶିକ୍ଷା ହେଉଛି ପ୍ରଗତିର ମୁଳଦୁଆ ଏବଂ ଏହି ଶିକ୍ଷକମାନେ ହେଉଛନ୍ତି ସେହି ପ୍ରଗତିର ବିନ୍ଧାଣୀ ।’’
ଯୁବପିଢ଼ିଙ୍କୁ ସମୃଦ୍ଧ କରିବା ଏବଂ ଶିକ୍ଷାର ଏକ ସଂସ୍କୃତିକୁ ସୁଦୃଢ଼ କରିବାରେ ଶିକ୍ଷକମାନଙ୍କ ଉଲ୍ଲେଖନୀୟ ସହଯୋଗିତାକୁ ସ୍ୱୀକୃତି ପ୍ରଦାନ କରିବା ପାଇଁ ଟିଏସ୍ଏଫ୍ର ଉଦ୍ୟମକୁ କାର୍ଯ୍ୟକ୍ରମରେ ଯୋଗ ଦେଇ ଗଞ୍ଜାମ ଜିଲ୍ଲା ପରିଷଦର ମୁଖ୍ୟ ଉନ୍ନୟନ ଅଧିକାରୀ ତଥା କାର୍ଯ୍ୟନିର୍ବାହୀ ଅଧିକାରୀ ଆଇଏଏସ୍ କିର୍ତୀ ଭାସନ ପ୍ରଶଂସା କରିଛନ୍ତି । ଦେଶର ଭବିଷ୍ୟତକୁ ଯେଉଁମାନେ ଗଠନ କରୁଛନ୍ତି ସେମାନଙ୍କୁ ନିୟମିତ ପ୍ରତ୍ସୋହନ କରିବାର ଆବଶ୍ୟକତା ଉପରେ ସେ ଗୁରୁତ୍ୱାରୋପ କରିଥିଲେ ।
ସମ୍ବର୍ଦ୍ଧିତ ବିଶିଷ୍ଟ ଶିକ୍ଷକମାନେ ହେଉଛନ୍ତି ନୀଳକଣ୍ଠେଶ୍ୱର ବିଦ୍ୟାପୀଠ, ଟଙ୍ଗନାପାଲ୍ଲୀର ସହକାରୀ ଶିକ୍ଷୟିତ୍ରୀ ଆର୍ ଜମୁନା ରେଡ୍ଡି, କାଲୀପଲ୍ଲୀ ସରକାରୀ ୟୁପି ସ୍କୁଲର ସହକାରୀ ଶିକ୍ଷକ କୃଷ୍ଣଚନ୍ଦ୍ର ଦାସ, ରାମପଲ୍ଲୀ ସରକାରୀ ୟୁପି ସ୍କୁଲର ସହକାରୀ ଶିକ୍ଷକ ରୀନା ରାଣୀ ମହାନ୍ତି, ଆର୍ଯ୍ୟପଲ୍ଲୀ ସରକାରୀ ୟୁପି ସ୍କୁଲ୍ର ସହକାରୀ ଶିକ୍ଷକ ମନୋଜ କୁମାର ତ୍ରିପାଠୀ, ଯଜ୍ଞଶାଳ ସରକାରୀ ପ୍ରାଥମିକ ବିଦ୍ୟାଳୟର ସହକାରୀ ଶିକ୍ଷକ ବିଷ୍ଣୁ ନାରାୟଣ ନନ୍ଦ, ଚାମଖଣ୍ଡି ସରକାରୀ ଉଚ୍ଚ ବିଦ୍ୟାଳୟର ସହକାରୀ ଶିକ୍ଷକ ସ୍ଥିତ ପ୍ରଜ୍ଞା ହୋତା, ଅନନ୍ତନଗର ସ୍ଥିତ ବ୍ରହ୍ମପୁର ଶାରିରୀକ ଏକାଡେମିର ପ୍ରତିଷ୍ଠାତା ହାବିଲଦାର ସିମାଚଳ ବାରିକ,
ଶେରଗଡ଼ର ପେସ୍ ସ୍କିଲ ଟ୍ରେନିଂ ସେଂଟରର ସେଂଟର ମୁଖ୍ୟ ଅନିତା କୁମାରୀ ପାଣିଗ୍ରାହୀ, ପୋଡାପଦର ସରକାରୀ ୟୁଜି ହାଇସ୍କୁଲର ଟିଜିଟି ସରିତା କୁମାରୀ ଚୌଧୁରୀ, ଆଥଲେଟିକ୍ କୋଚ୍ (ଦୌଡ଼କୁଦ ପ୍ରଶିକ୍ଷକ) ଏ ଶଙ୍କର୍ଣ୍ଣ ପାତ୍ର, କରାପଲ୍ଲୀ ନାଉଳି ୟୁପିଏସ୍ର ସହକାରୀ ଶିକ୍ଷକ କୁରେଶ କୁମାର ମିଶ୍ର, ଏସ୍ଏଫ୍ଡିସିର ପ୍ରିନ୍ସିପାଲ୍ (ଅଧ୍ୟକ୍ଷ) ଡକ୍ଟର ରଶ୍ମୀତା ମିଶ୍ର ଓ ଓଡ଼ିଶୀ ନୃତୀୟାନ ଶିବରାମ । ଏହି ଅବସରରେ ଟାଟା ଷ୍ଟିଲ୍ ଫାଉଣ୍ଡେସନର ଗୋପାଳପୁର ୟୁନିଟ୍ ମୁଖ୍ୟ ରକି ମାର୍ଟିନ୍, ଫାଉଣ୍ଡେସନର ଅନ୍ୟାନ୍ୟ ବରିଷ୍ଠ ଅଧିକାରୀ ଓ ଏହି ଅଂଚଳର ଶିକ୍ଷକ ଶିକ୍ଷୟିତ୍ରୀ ଓ ବିଶିଷ୍ଟ ବ୍ୟକ୍ତିମାନେ ଉପସ୍ଥିତ ଥିଲେ ।
