୧୮ଅଗଷ୍ଟ ୨୦୨୩ (ଓଡ଼ିଶା ତାଜା ନ୍ୟୁଜ ) ହିଞ୍ଜିଳିକାଟୁ :-> ରାସ୍ତା ପାର୍ଶ୍ଵରେ ବସି ବିକ୍ରି କରୁଥିବା ଆମିଷ ବ୍ୟବସାୟୀଙ୍କ ବ୍ୟାବସାୟିକ ଆନୁଷଙ୍ଗିକ ସୁବିଧା ଓ ଟ୍ରାଫିକ ବ୍ୟବସ୍ଥା ନିୟନ୍ତ୍ରଣ କରିବା ଉଦ୍ଦେଶ୍ୟ ନେଇ ହିଞ୍ଜିଳିକାଟୁ ପୌରପରିଷଦ ତରଫରୁ ନିର୍ମାଣ କରାଯାଇଥିଲା ଅତ୍ୟାଧୁନିକ ମାଛ,ମାଂସ ବଜାର।କିନ୍ତୁ ବାସ୍ତବରେ ପୌରପରିଷଦର ଉଦ୍ଦେଶ୍ୟ ଓ ଲକ୍ଷ୍ୟ ସାଧନ ହୋଇ ନଥିବା ପରି ମନେ ହେଉଛି।ମାଛ, ମାଂସ ବ୍ୟବସାୟ କରିବା ପାଇଁ ପିଣ୍ଡି ନିର୍ମାଣ ସହ ସମସ୍ତ ସୁବିଧା ସୁଯୋଗ ଉପଲବ୍ଧ ରହିଛି।କିନ୍ତୁ ବେପାରୀ ପିଣ୍ଡିରେ ବସିବା ବଦଳରେ ପୂର୍ବଭଳି ବିକ୍ରି ପାଇଁ ରାସ୍ତାକଡକୁ ଆପଣେଇଛି।ଫଳରେ ରାସ୍ତା କଡ଼ ଜାମ ହେବା ସହ ଅପରିଷ୍କାର ଯୋଗୁଁ ମୁଖ୍ୟ ରାସ୍ତାରେ ଏକ ଅସ୍ୱାସ୍ଥ୍ୟକର ପରିବେଶ ସୃଷ୍ଟି ହୋଇ ଆମିଷ ଗନ୍ଧରେ ନାକ ଫାଟି ପଡୁଛି।
ଆମିଷ ବେପାରୀଙ୍କ ପାଇଁ ପୌର ପରିଷଦ ପକ୍ଷରୁ ଗତ ସାଲ ୨୦୨୧ଫେବୃଆରୀ୧୧ଟାରିଖ ରେ ୧ କୋଟି ୨୬ଲକ୍ଷ୮୨ ହଜାର ଟଙ୍କା ବ୍ୟୟ ବରାଦ କରାଯାଇ ଅତ୍ୟାଧୁନିକ ଆମିଷ ବଜାର ନିର୍ମିତ ହୋଇଥିଲା।ମାନ୍ୟବର ମୁଖ୍ୟମନ୍ତ୍ରୀ ଅଭାଷୀ ମାଧ୍ୟମରେ ଏହାକୁ ଉଦଘାଟନ କରିଥିଲେ।ବିଜୁ ପଟ୍ଟନାୟକ ଛକ ନିକଟରେ ବସୁଥିବା ସମସ୍ତ ମାଛ ବ୍ୟବସାୟୀଙ୍କୁ ପୌର ପରିଷଦ ପକ୍ଷରୁ ନିର୍ମିତ କୋଠାରେ ପିଣ୍ଡି ବଣ୍ଟନ କରାଯାଇଥିଲା କିନ୍ତୁ କିଛି ବେପାରୀ ନିଜ ପିଣ୍ଡିରେ ମାଛ ବ୍ୟବସାୟ କରୁଥିବା ବେଳେ ଆଉ କିଛି ବ୍ୟବସାୟୀ ସହରକୁ ଅତିକ୍ରମ କରିଥିବା ୫୯ନଂ ଜାତୀୟ ରାଜପଥ ଚଣା ପଡିଆ ସମ୍ମୁଖ,ମିନି ଷ୍ଟାଡିୟମ ନିକଟ,ଗୀତା ମନ୍ଦିର ରାସ୍ତାରେ ନିଜ ନିଜ ବ୍ୟବସାୟ ଚଳାଇ ଥିବା ଦେଖାଯାଇଛି। ଫଳରେ ସମ୍ପୃକ୍ତ ଅଞ୍ଚଳର ପରିବେଶ ଦୂଷିତ ହେବା ସହ ଟ୍ରାଫିକ ସମସ୍ୟା ମଧ୍ୟ ଉତ୍କଟ ହେବାରେ ଲାଗିଛି।
ଏଭଳି ଏକ ଅସ୍ୱାସ୍ଥ୍ୟକର ପରିବେଶ ମଧ୍ୟରେ ବ୍ୟବସାୟୀ ମାନେ ବ୍ୟବସାୟ ଚଳାଇ ଥିବା ବେଳେ ଗ୍ରାହକଙ୍କ ପ୍ରବଳ ଗହଳି ଲାଗି ରହୁଛି। ଏହାଦ୍ୱାରା ୫୯ନଂ ଜାତୀୟ ରାଜପଥରେ ଯାତାୟାତ ହେଉଥିବା ହାଲୁକା ଓ ଭାରୀଯାନ ଗୁଡିକର ଦୃତ ଗତିରେ ଗାଡି ଚାଳନା ଫଳରେ ଗ୍ରାହକ ଓ ପଥଚାରୀଙ୍କ ଧନ ଜୀବନ ପ୍ରଭାବିତ ହେବା ଆଶଙ୍କା ଦେଖାଦେଇଛି।ସହରକୁ ସବୁଜ, ସୁନ୍ଦର ଓ ସ୍ୱଚ୍ଛତା ସହ ପରିମଳ ବ୍ୟବସ୍ଥାକୁ ଗୁରୁତ୍ୱ ଦିଆଯାଇଛି।କିନ୍ତୁ ରାସ୍ତାପାର୍ଶ୍ଵ ଓ ଅତ୍ୟାଧୁନିକ ମାଛ, ମାଂସ ବ୍ୟବସାୟୀଙ୍କ କାର୍ଯ୍ୟକଳାପ ପ୍ରତି ପ୍ରଶାସନ ପକ୍ଷରୁ କୌଣସି ତଦାରଖ ହେଉ ନ ଥିବା ପରିବେଶ ଓ ପରିସ୍ଥିତିରୁ ଜଣାପଡିଛି।ନିୟମ ଅନୁଯାୟୀ ସ୍ଥାନୀୟ ପ୍ରାଣୀ ଚିକିତ୍ସାଳୟର ବିଭାଗୀୟ ଅଧିକାରୀ ମାଛ ଓ ମାଂସ ସ୍ୱାସ୍ଥ୍ୟ ପକ୍ଷେ କେତେ ଉପଯୋଗୀ ତାର ମାନ ଯାଞ୍ଚ କରିବା କଥା।କିନ୍ତୁ ବିକ୍ରି ହେଉଥିବା ଆମିଷ ଦ୍ରବ୍ୟର ମାନ ଯାଞ୍ଚ ହେଉ ନ ଥିବା ଗ୍ରାହକଙ୍କ ଠାରୁ ଶୁଣିବାକୁ ମିଳୁଛି।ଏପରି ସ୍ଥଳେ ଆମିଷ ବ୍ରବ୍ୟର ଦୈନିକ ଦରରେ ଫରକ ଭିନ୍ନ ଭିନ୍ନ ସ୍ଥାନରେ ରହୁଥିବା ବେଳେ ଗୁଣବତ୍ତାକୁ ମଧ୍ୟ ପରଖିବାରେ ଗ୍ରାହକ ଚାପ ଓ ଦ୍ଵନ୍ଦରେ ରହୁଥିବା ଜଣାପଡିଛି।
ଯଦିଓ ଜଣେ ସାଧାରଣ ଲୋକଙ୍କ ପାଇଁ ଏକ ସୁସ୍ଥ ଓ ସୁରକ୍ଷିତ ଜୀବନ ଯାପନର ପ୍ରୟୋଜନ ରହିଛି ତେବେ ମନୁଷ୍ୟକୃତ ପ୍ରତିକୂଳ ପରିସ୍ଥିତି ସୃଷ୍ଟି ଉପରେ ନିୟନ୍ତ୍ରଣ କରିବା ଦାୟିତ୍ୱ କାହା ଉପରେ ନ୍ୟସ୍ତ ରହିଛି ତାହା ସାଧାରଣରେ ମତ ପ୍ରକାଶ ପାଇଛି।ଅନ୍ୟ ଏକ ଉଲ୍ଲେଖଯୋଗ୍ୟ ପ୍ରସଙ୍ଗ ହେଲା ଗତ କିଛି ଦିନ ଧରି ଆଧୁନିକ ଆମିଷ ବଜାର ପରିସର ମଦ୍ୟପ ଓ ନିଶା ସେବନର ଆଡ୍ଡା ସ୍ଥଳୀ ପାଲଟିଛି।ସଞ୍ଜ ନଇଁଗଲେ ସମ୍ପୃକ୍ତ ସ୍ଥାନ ପାଲଟି ଯାଏ ମୁକ୍ତାକାଶ ବାର।ବିଳମ୍ବିତ ରାତି ଯାଏଁ ନିଶାଶକ୍ତଙ୍କ ଉପସ୍ଥିତି ଡାକ୍ତରଖାନାକୁ ଯିବା ଆସିବା କରୁଥିବା ରୋଗୀ ଓ ସମ୍ପର୍କୀୟଙ୍କ ମନରେ ଭୟର ବାତାବରଣ ସୃଷ୍ଟି ହୁଏ ବୋଲି ଆଭାସ ମିଳିଛି। ଏଣୁ ଦିଗରେ ପୌର ପରିଷଦ ଓ ପୋଲିସ ପ୍ରଶାସନ ପକ୍ଷରୁ ଅନୁକୂଳ ପଦକ୍ଷେପ ଓ କାର୍ଯ୍ୟାନୁଷ୍ଠାନ ଗ୍ରହଣ କରିବାର ଆବଶ୍ୟକତା ରହିଛି ବୋଲି ସଚେତନ ନାଗରିକ ମହଲରେ ଦାବି ଉଠିଛି।
