୪ ଅଗଷ୍ଟ ,୨୦୨୩ ( ଓଡ଼ିଶା ତାଜା ନ୍ୟୁଜ୍ ) ହିଞ୍ଜିଳିକାଟୁ :-> ବ୍ରହ୍ମପୁର ବନାଞ୍ଚଳ, ତଥା ହିଞ୍ଜିଳିକାଟୁ ବନ ବିଭାଗର କଣ୍ଟେଇକୋଳି ଗ୍ରାମ ନିକଟରୁ ବନବିଭାଗ ଭିଜିଲାନ୍ସ ଟିମ ଅତର୍କିତ ଚଢାଉ କରି ୨ଟି ପିକଅପ ଭ୍ୟାନରୁ ୧୫୫ଟି ମୂଲ୍ୟବାନ ଚୋରା ଶାଗୁଆନ କାଠ ପଟା ଜବତ କରିଛି । ଜବତ କାଠ ପଟାର ଆନୁମାନିକ ମୂଲ୍ୟ ପ୍ରାୟ ୧ଲକ୍ଷ ୫୦ ହଜାର ଟଙ୍କାରୁ ଉର୍ଦ୍ଧ୍ବ ହେବ ବୋଲି ବିଭାଗ ପକ୍ଷରୁ ଜଣାପଡିଛି । ବ୍ରହ୍ମପୁର ବନବିଭାଗ ଭିଜିଲାନ୍ସ ନିକଟରେ ଚୋରା କାଠ ଚାଲାଣ ନେଇ କୌଣସି ସୂତ୍ରରୁ ଖବର ମିଳିଥିଲା।ଭିଜିଲାନ୍ସ ଆରକ୍ଷୀ ଅଧିକ୍ଷକ ଗଣେଶ ଚନ୍ଦ୍ର ପ୍ରଧାନଙ୍କ ନିର୍ଦ୍ଦେଶରେ ଶୁକ୍ରବାର ସକାଳେ ଭିଜିଲାନ୍ସ ଓ ମୋବାଇଲ୍ ଟିମ୍ ମିଳିତ ଭାବେ ଚଢାଉ କରି ୨ଟି ପିକଅପ ଭ୍ୟାନ (ଏପି୩୦ଓ୍ବାଇ ୪୭୫୪ ଓ ଓଆର ୦୭ଜେ ୭୦୬୬) ରେ ଚୋରା ଚାଲାଣ ହେଉଥିବା ମୂଲ୍ୟବାନ ଶାଗୁଆନ କାଠ ପଟା ଗାଡ଼ିକୁ ହିଞ୍ଜିଳି ଥାନା କଣ୍ଟେଇକୋଳି ଗ୍ରାମ ଗୌଡ଼ ସାହି ନିକଟରୁ ଜବତ କରିବାରେ ସକ୍ଷମ ହୋଇଥିଲେ । କିନ୍ତୁ କୌଶଳ କ୍ରମେ ଉଭୟ ଗାଡି ଚାଳକ ଘଟଣା ସ୍ଥଳରୁ ଚମ୍ପଟ ମାରିଥିଲେ ।
ଜବତ ଗାଡ଼ି ଓ ଶାଗୁଆନ କାଠ ପଟା ସବୁକୁ ହିଞ୍ଜିଳିକାଟୁ ବନପାଳଙ୍କ କାର୍ଯ୍ୟାଳୟରେ ରଖାଯାଇଛି । ଜବତ ଶାଗୁଆନ କାଠ ପଟା କେଉଁସ୍ଥାନରୁ ଆସି କେଉଁଠିକୁ ଚାଲାଣ କରାଯାଉଥିଲା ତାହା ସଠିକ୍ ଜଣାପଡିନାହିଁ । ଚଢ଼ାଉରେ ବ୍ରହ୍ମପୁର ବନବିଭାଗ ଭିଜିଲାନ୍ସ ବନପାଳ ଏନ୍ ବାଲାଜୀ ରେଡ୍ଡୀ, ଫରେଷ୍ଟଗାର୍ଡ ଉମା ଚରଣ ପାତ୍ର, ବିନାୟକ ରଞ୍ଜନ କର, ମୋବାଇଲ୍ ଟିମ୍ ଫରେଷ୍ଟଗାର୍ଡ ଶାନ୍ତି ବେହେରା ଅଂଶ ଗ୍ରହଣ କରିଥିଲେ । ସ୍ଥାନୀୟ ହିଞ୍ଜିଳି ଥାନାର ଏଏସଆଇ ବିନୟ ଶବର ଓ ଏଏସଆଇ ମନୋଜ ସେନାପତି, କନଷ୍ଟେବଳ ସରୋଜ ରଣସିଂହ ଓ ଦଣ୍ଡପାଣି ମଲ୍ଲିକ ପ୍ରମୁଖ ସାମିଲ ହୋଇଥିଲେ। ପ୍ରକାଶ ଥାଉକି, ଗଞ୍ଜାମ ଜିଲ୍ଲାର ସୋରଡ଼ା, ଗାଙ୍ଗପୁର ଅଞ୍ଚଳରୁ ପ୍ରତ୍ୟହ ବହୁ ଘରୋଇ ଯାତ୍ରୀବାହୀ ବସ୍ ଯୋଗେ ହିଞ୍ଜିଳିକାଟୁ ସହର ଦେଇ ବାଉଁଶ,କାଠପଟା,ଘରୋଇ ଉପକରଣ ଓଔଷଧୀୟ ବୃକ୍ଷର ବକଳ, ଛାଲି ,ଚେର ଆଦି ଜଙ୍ଗଲଜାତ ଦ୍ରବ୍ୟ ଖୁଲମ ଖୁଲା ଚୋରା ଚାଲାଣ ହେଉଛି । ସ୍ଥାନୀୟ ବନପାଳ ଓ ବନରକ୍ଷୀ ଏସବୁ ଜଙ୍ଗଲଜାତ ଦ୍ରବ୍ୟ ଚୋରା ଚାଲାଣ ହେଉଥିବା ଅବଗତ ଥିଲେ ମଧ୍ୟ ନିଦାବିଷ୍ଣୁ ସାଜି ନିରବତା ଅବଲମ୍ବନ କରୁଥିବା ଜଣାପଡିଛି।
ଅନ୍ୟପକ୍ଷରେ ସ୍ଥାନୀୟ ଅଞ୍ଚଳରେ ହାତଗଣତି କିଛି କାଠ ବେପାରୀଙ୍କୁ ବିକ୍ରି ପାଇଁ ବିଭାଗୀୟ ଲାଇସେନ୍ସ ମିଳିଛି।କିନ୍ତୁ ହିଞ୍ଜିଳିକାଟୁ ବନ ବିଭାଗ ଅଧୀନରେ ଥିବା ବିଭିନ୍ନ ଗାଁ ଗଣ୍ଡାରେ ଛତୁ ଫୁଟିଲା ପରି କାଠ ସରଞ୍ଜାମ ଓ କାଠ ବ୍ୟବସାୟ ଚାଲୁ ରହିଛି। ହିଞ୍ଜିଳିକାଟୁ ଠାରେ ଥିବା ବନବିଭାଗର ଆବାସିକ ଓ କାର୍ଯ୍ୟାଳୟରେ ବହୁ ସମୟରେ ବନପାଳ ଅନୁପସ୍ଥିତ ରହୁଥିବା ଦେଖିବାକୁ ମିଳିଛି।ଏପରି ସ୍ଥଳେ ଚୋରା କାଠ ଚାଲାଣ ଏବେ କାଠ ମାଫିଆଙ୍କ ପାଇଁ କୁଟୀର ଶିଳ୍ପରେ ପରିଣତ ହୋଇଛି।ଏଠାରେ ନିୟୋଜିତ ଥିବା ବନପାଳଙ୍କ ଦେଖା ଦର୍ଶନ ମିଳୁ ନ ଥିଲା ବେଳେ କାର୍ଯ୍ୟାଳୟଟି କେବଳ ନାଁ କୁ ଅଛି ବୋଲି ଲୋକଙ୍କ ମଧ୍ୟରେ ଆଲୋଚନା ହେଉଛି।ଦୀର୍ଘ ସମୟ ଧରି ଅନୁପସ୍ଥିତ ରହିବା ସହ ଚଢ଼ାଉ ନ ହେବା ଫଳରେ କାଠ ମାଫିଆ ଗୋଷ୍ଠୀ ଦିନକୁ ଦିନ ସକ୍ରିୟ ହେବାରେ ଲାଗିଛନ୍ତି।ସ୍ଥାନୀୟ ବନ ବିଭାଗ ଅଞ୍ଚଳ ଦେଇ ବିଭିନ୍ନ ସ୍ଥାନରୁ ଚୋରା କାଠ ଆମଦାନୀ ଓ ରପ୍ତାନି ଏବେ କାଠ ମାଫିଆଙ୍କ ପାଇଁ ଅପୂର୍ବ ସୁଯୋଗ ସୃଷ୍ଟି କରିଛି।ଏଣୁ ବନପାଳ ଓ ବନରକ୍ଷୀଙ୍କ ନିଷ୍କ୍ରିୟତା,ଅପାରଗତା ଓ ଅନୁପସ୍ଥିତିର ସୁଯୋଗ ନେଇ ବିଭିନ୍ନ ଯାନ ବାହନରେ ବେଧଡକ ଚୋରା କାଠ ଚାଲାଣ ହେଉଥିବା ବେଳେ ସ୍ପଷ୍ଟ ଦିବାଲୋକରେ ହିଞ୍ଜିଳିକାଟୁ ଅଞ୍ଚଳ ଦେଇ ୨ଟି ପିକଅପ ଭ୍ୟାନ ଯୋଗେ ମୂଲ୍ୟବାନ ଶାଗୁଆନ କାଠ ପଟା ଚୋରା ଚାଲାଣ ବିଭାଗର ଦକ୍ଷତା ପ୍ରତି ପ୍ରଶ୍ନବାଚୀ ସୃଷ୍ଟି କରିଛି।
