୧ ଜୁଲାଇ ,୨୦୨୩ ( ଓଡ଼ିଶା ତାଜା ନ୍ୟୁଜ୍ ) ହିଞ୍ଜିଳିକାଟୁ :- ମଦ ଲାଭାଂଶକୁ ନେଇ ହିଞ୍ଜିଳି ଥାନା ଶାସନଆମ୍ବଗାଁ ପଞ୍ଚାୟତରେ ଶନିବାର ସକାଳେ ଅପ୍ରିତିକର ପରିସ୍ଥିତି ସୃଷ୍ଟି ହୋଇଛି । ରାଜନୈତିକ ପତିଆରା ବୃଦ୍ଧି ଉଦ୍ଦେଶ୍ୟରେ ସଂପୃକ୍ତ ପଞ୍ଚାୟତର ୨ ନିର୍ବାଚିତ ପ୍ରତିନିଧିଙ୍କ ମଧ୍ୟରେ ଶୀତଳଯୁଦ୍ଧ ଆରମ୍ଭ ହୋଇ ହାଟରେପଡି ଦାଣ୍ଡରେ ଗଡୁଥିବା ଜଣାପଡିଛି । ସଂପୃକ୍ତ ପଞ୍ଚାୟତର ସରପଞ୍ଚଙ୍କ ସପକ୍ଷ ଓ ପ୍ରତିପକ୍ଷ ନିର୍ବାଚିତ ସଭ୍ୟାଙ୍କ ପ୍ରତିନିଧି ଗୋଷ୍ଠୀ ମଧ୍ୟରେ ଏଭଳି ଅପ୍ରିତିକର ଘଟଣା ଦୀର୍ଘ ୬ମାସ ଧରି ଚାଲିଥିବା ପରିବେଶ ଓ ପରିସ୍ଥିତିରୁ ଜଣାପଡିଛି ।
ଦେଶୀ ମହୁଲି ମଦ ଗୁତାଦାର ଓ ସଂପୃକ୍ତ ପଞ୍ଚାୟତର ୨ ଗୋଷ୍ଠୀଙ୍କ ମଧ୍ୟରେ ଦେଣନେଣକୁ ନେଇ ଏଭଳି ଉତ୍ତେଜନାମୂଳକ ପରିସ୍ଥିତି ସୃଷ୍ଟି ହେଉଥିବା ବେଳେ ମନରେଗା ଯୋଜନାରେ ନିୟୋଜିତ ରହିଥିବାକିଛି ମହିଳା ଶ୍ରମିକଙ୍କୁ ମୋହରା କରାଯାଇ ଆନ୍ଦୋଳନକୁ ତୀବ୍ର କରାଯାଇଥିବା ଜଣାପଡିଛି । ଏପରିକି ପ୍ରାୟ ୩୦ ଜଣ ମହିଳା ଶ୍ରମିକ ଟାୟାର ଜାଳି ଓ ପ୍ଳାକାର୍ଡ ଧରି ରାଳବ- ଶାସନଆମ୍ବଗାଁ ମୁଖ୍ୟ ରାସ୍ତାକୁ ଅବରୋଧ କରିଥିଲେ । ପଞ୍ଚାୟତରେ ଦେଶୀ ମଦ ବିକ୍ରି ବନ୍ଦ କରିବା ପାଇଁ ଆନ୍ଦୋଳନ ପଛରେ ଜନ ପ୍ରତିନିଧିଙ୍କ ପ୍ରତିନିଧି ଓ ହାତଗଣତି ଗୋଡାଣିଆ ପଚ୍ଛଦ ପଟରେ ରହି ଆନ୍ଦୋଳନକୁ ନିୟନ୍ତ୍ରଣ କରୁଥିବା ଚର୍ଚ୍ଚାଜୋର ଧରିଛି । ଖବର ପାଇ ହିଞ୍ଜିଳି ପୁଲିସ ଓ ଅବକାରୀ ଥାନା କର୍ମଚାରୀ ଘଟଣା ସ୍ଥଳରେ ପହଞ୍ଚି ବୁଝାସୁଝା କରିବା ପରେ ଆନ୍ଦୋଳନ ହଟିଥିଲା ।
ସୂଚନା ମୁତାବକ, ଦୁର୍ବନ୍ଧ ଗ୍ରାମ ଦେଶୀ ମହୁଲି ମଦ ଭାଟିର ମଦ ବିକ୍ରି ସକାଶେ ଏହା ଅଧିନରେ ଥିବା ବିଭିନ୍ନ ଗ୍ରାମରେ ଶାଖା ଦୋକାନ ଖୋଲାଯାଇଅଛି । ପୂର୍ବରୁ ଶାସନଆମ୍ବଗାଁରେ ଥିବା ଶାଖାଦୋକାନ ସୁରୁଖୁରୁରେ ଚାଲିଥିବା ବେଳେ ପଞ୍ଚାୟନ ନିର୍ବାଚନ ପର ଠାରୁ ବିବାଦ ଦେଖାଦେଇଛି । ଗ୍ରାମର ଜଣେ ପୁରୁଣା ମଦ ବ୍ୟବସାୟୀ ଓ କିଛି ବ୍ୟକ୍ତି ଶାଖା ଦୋକାନକୁ ନେଇ ଆପତ୍ତି ଅଭିଯୋଗ ଉଠାଇଥିଲେ । ଗତ ଜାନୁୟାରୀ ୨୪ ତାରିଖରେ ଶାଖା ଦୋକାନକୁ ଭାଙ୍ଗିରୁଜି ନିଆଁ ଲଗାଇ ଦେଇଥିଲେ ।
ଗତ ସୋମବାର ଦିନ ସଂପୃକ୍ତ ସ୍ଥାନରେ ଶାଖାଦୋକାନ ଖୋଲିବା ପାଇଁ ସ୍ଥାନୀୟ ଅବକାରୀ ବିଭାଗ ଠାରାୁ ଅନୁମତି ଆଣିଥିଲେ । ପଞ୍ଚାୟତରେ ପୁଣି ଥରେ ମଦ ଦୋକାନ ବନ୍ଦ କରିବାକୁ କେନ୍ଦ୍ର କରି ସରପଞ୍ଚଙ୍କ ବିପକ୍ଷ ଗୋଷ୍ଠୀ ଏଭଳି ଉଦ୍ୟମ କରିଥିବା ଜଣାପଡିଛି ।ଏପରିକି ପ୍ରଶାସନର ଅଗୋଚରରେ ଆନ୍ଦୋଳନକାରୀ ମାନେ ଆଇନକୁ ହାତକୁ ନେଇ ଟାୟାର ଜାଳି ରାସ୍ତା ଅବରୋଧ କରିଥିବା ବେଳେ ସାଧାରଣ ଲୋକେ ନାହିଁ ନ ଥିବା ଅସୁବିଧାର ସମ୍ମୁଖୀନ ହୋଇଥିବା ଜଣାପଡିଛି ।
