ସୌମ୍ୟରଞ୍ଜନ ଗ୍ରହଣ କରିପାରି ନଥିବା ତାଙ୍କ ମତରୁ ସ୍ପଷ୍ଟ ହେଉଛି । ମୁଖ୍ୟମନ୍ତ୍ରୀଙ୍କୁ ସେ ବିରୋଧୀଙ୍କ ଭଳି ଉଠିଥିବା ପ୍ରଶ୍ନର ଯବାବ ମାଗିଛନ୍ତି ।
ଓଡ଼ିଆ-ଅଣଓଡ଼ିଆ ପ୍ରସଙ୍ଗ ଉପରେ ସୌମ୍ୟରଞ୍ଜନ ତାଙ୍କ ମତ ରଖିଛନ୍ତି :-
ସୌମ୍ୟରଞ୍ଜନ ଅପରାଜିତାଙ୍କୁ ଗ୍ରହଣ କରିଥିବା ବେଳେ ପାଣ୍ଡିଆନ୍ଙ୍କୁ ଗ୍ରହଣ କରିପାରି ନାହାଁନ୍ତି । ଜ୍ୱାଇଁ ଦୁଇଦିନିଆ ଅତିଥି କହି କଟାକ୍ଷ କରିଛନ୍ତି ।
୨୬ ଜୁନ୍ ,୨୦୨୩ ( ଓଡ଼ିଶା ତାଜା ନ୍ୟୁଜ୍ ) ଭୁବନେଶ୍ୱର :- ପ୍ରତ୍ୟେକ୍ଷରେ ହେଉ କିମ୍ବା ପରୋକ୍ଷରେ ହେଉ ବର୍ତ୍ତମାନ ଯେଉଁ ପ୍ରସଙ୍ଗକୁ ନେଇ ରାଜ୍ୟ ରାଜନୀତିରେ ହଟଚମଟ ସୃଷ୍ଟି ହେଉଛି ସେଥିରେ ବିରୋଧୀଙ୍କ ସହ ସ୍ୱର ମେଳାଉଛନ୍ତି ବିଜେଡି ନେତା ବିଧାୟକ ସୌମ୍ୟରଞ୍ଜନ ପଟ୍ଟନାୟକ । ବିରୋଧୀଙ୍କୁ ବିଜେଡି ପକ୍ଷରୁ ଯେଉଁ ଯବାବ ଦିଆଯାଇଛି ବୋଧହୁଏ ତାହାକୁ ସୌମ୍ୟରଞ୍ଜନ ଗ୍ରହଣ କରିପାରି ନଥିବା ତାଙ୍କ ମତରୁ ସ୍ପଷ୍ଟ ହେଉଛି । ମୁଖ୍ୟମନ୍ତ୍ରୀଙ୍କୁ ସେ ବିରୋଧୀଙ୍କ ଭଳି ଉଠିଥିବା ପ୍ରଶ୍ନର ଯବାବ ମାଗିଛନ୍ତି । ମୁଖ୍ୟମନ୍ତ୍ରୀ ନୀରବ ନରହି ସ୍ପଷ୍ଟୀକରଣ ଦେବାକୁ ସେ ଦାବି ରଖିଛନ୍ତି ।
ସୌମ୍ୟରଞ୍ଜନ ଦଳର କାର୍ଯ୍ୟ ୟଧାରାକୁ ନେଇ ଯେତେବେଳେ ଅସନ୍ତୁଷ୍ଟ ହୁଅନ୍ତି ସେତେବେଳେ ସିଧାସଳଖ ପ୍ରଶ୍ନ ନକରି ତାଙ୍କ ମାଲିକାନା ତଥା ସମ୍ପାଦନାରେ ଚାଲିଥିବା ଖବର କାଗଜରେ ‘ଆମଘର ହାଲ୍ଚାଲ୍’ ସ୍ତମ୍ଭରେ ଲେଖିବା ଦେଖାଯାଇ ଆସିଛି । ୫-ଟି ସଚିବ ଭି.କେ ପାଣ୍ଡିଆନଙ୍କ ବିଭିନ୍ନ ଜିଲ୍ଲାକୁ ଗସ୍ତକରି କାର୍ଯ୍ୟକ୍ରମ ସମୀକ୍ଷା କରିବା ସହ ଜନସାଧାରଣଙ୍କୁ ଉଦ୍ବୋଧନ ଦେଉଥିବା ଦେଖାଦେଇଛି । ତାଙ୍କ କାର୍ଯ୍ୟକ୍ରମରେ ବହୁ ଜନସମାଗମ ହେବାର ଦେଖାଯାଉଛି । ଏହି ଘଟଣାକୁ ବିରୋଧୀ ସହଜରେ ହଜମ କରିପାରୁ ନାହାଁନ୍ତି । ଏଥିନେଇ ନାନା ପ୍ରଶ୍ନ ଉଠାଉଛନ୍ତି । ନିକଟରେ ବିଜେପି ନେତ୍ରୀ ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀ ଏକ ସାମ୍ବାଦିକ ସମ୍ମିଳନୀ କରି ୫-ଟି ସଚିବଙ୍କ ଏହି ଗସ୍ତ ଉପରେ କିଛି ପ୍ରଶ୍ନ ଉଠାଇଥିଲେ ଓ ମୁଖ୍ୟମନ୍ତ୍ରୀଙ୍କୁ ଏହାର ଉତ୍ତର ମାଗିଥିଲେ ।
ଏହାପରେ ବିଜେପି ରାଜ୍ୟ ସଭାପତି ଓ କଂଗ୍ରେସ ରାଜ୍ୟ ସଭାପତି ବି ସମାନ ଢ଼ଙ୍ଗରେ ପ୍ରଶ୍ନ କରିଥିଲେ । ଯାହାକୁ ନେଇ ଏବେ ରାଜ୍ୟ ରାଜନୀତିରେ ହଟଚମଟ ସୃଷ୍ଟି ହେଉଛି । ସୌମ୍ୟରଞ୍ଜନ ମଧ୍ୟ ବିରୋଧୀଙ୍କ ସହ ସ୍ୱର ମିଳାଇଛନ୍ତି କହିଲେ ଅତ୍ୟୁକ୍ତି ହେବ ନାହିଁ । ହେଲେ ସେ ଭିନ୍ନ ଢ଼ଙ୍ଗରେ ପ୍ରଶ୍ନ ଉଠାଇଛନ୍ତି । ଅପରାଜିତା ଷଡ଼ଙ୍ଗୀଙ୍କୁ ପ୍ରଶଂସା କରିବା ସହ ସମାଲୋଚନା ବି କରିଛନ୍ତି । ୫-ଟି ସଚିବଙ୍କୁ ମଧ୍ୟ ସାବାସି ଦେବା ସହ କଟାକ୍ଷ କରିବାକୁ ପଛାଇ ନାହାଁନ୍ତି । ଏହା ହେଉଛି ସୌମ୍ୟଙ୍କ ଶୈଳୀ ବୋଲି ରାଜନୀତିକ ନେତାମାନେ କୁହନ୍ତି । ସେହି ଢ଼ଙ୍ଗରେ ମୁଖ୍ୟମନ୍ତ୍ରୀଙ୍କୁ ବି ପ୍ରଶଂସା କରିଛନ୍ତି ଆଉ ପ୍ରଶ୍ନ ବି ରଖିଛନ୍ତି ।
ସୌମ୍ୟରଞ୍ଜନଙ୍କ ଲେଖାରୁ ତାଙ୍କ ମନ କଥା ସ୍ପଷ୍ଟ ବାରି ହୋଇପଡ଼ୁଛି । ବୋଧ ହୁଏ ସେ ୫-ଟି ସଚିବଙ୍କ ଏଭଳି ଗସ୍ତ କାର୍ଯ୍ୟକ୍ରମକୁ ସେ ସହଜରେ ଗ୍ରହଣ କରିପାରୁ ନାହାଁନ୍ତି । ଦଳର ଅନ୍ୟ ନେତାମାନେ କେହି ଏ ନେଇ ପ୍ରଶ୍ନ ଉଠାଉ ନଥିବାରୁ ଧରି ନେବାକୁ ହେବ ସେମାନେ ଏହାକୁ ଗ୍ରହଣ କରୁଛନ୍ତି । କେବଳ ସୌମ୍ୟରଞ୍ଜନ ଦଳ ଭିତରେ ଏକ ମାତ୍ର ନେତା ଯେ ‘ମାଧ୍ୟମ ଦେଇ’ ପ୍ରଶ୍ନ ଉଠାଇଛନ୍ତି । ମୁଖ୍ୟମନ୍ତ୍ରୀଙ୍କୁ ଖାଲି ସମାଲୋଚନା କଲେ କାଳେ କେହି ପ୍ରଶ୍ନ କରିବ ସେଥିପାଇଁ ପ୍ରଧାନମନ୍ତ୍ରୀଙ୍କୁ ବି ସେ ସମାଲୋଚନା କରିଛନ୍ତି । ମୁଖ୍ୟମନ୍ତ୍ରୀ ଯେପରି ସାମ୍ବାଦିକ ସମ୍ମିଳନୀ କରି କିଛି ପ୍ରଶ୍ନର ଉତ୍ତର ଦିଅନ୍ତି ନାହିଁ ପ୍ରଧାନମନ୍ତ୍ରୀ ଏଥିରୁ ବାଦ୍ ଯାଇନାହାଁନ୍ତି ବୋଲି ସେ ଦର୍ଶାଇଛନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୯ ବର୍ଷ ଶାସନରେ ଥରେ ହେଲେ ସାମ୍ବାଦିକ ସମ୍ମିଳନୀ କରି ପ୍ରଶ୍ନର ଉତ୍ତର ରଖିନାହାଁନ୍ତି ।
ଆଜିର ଲେଖାରେ ସୌମ୍ୟରଞ୍ଜନ ମନପକାଇ ଦେଇଛନ୍ତି ଅମଲାତନ୍ତ୍ର ଶାସନକୁ କବଳିତ କରିବା ନେଇ ସେ ବହୁ ଆଗରୁ କହି ଆସିଛନ୍ତି । କେହି ଏଥିନେଇ ସ୍ୱର ଉଠାଉ ନଥିଲେ । ଏବେ ପାଣ୍ଡିଆନ୍ଙ୍କ ଗସ୍ତ ପରେ ହୋହଲ୍ଲା କରୁଛନ୍ତି । ଅଣ ଓଡ଼ିଆ ଅଫିସର୍ଙ୍କୁ କ୍ଷମତା ଉପଭୋଗ କରିବାର ସୁଯୋଗ ଦିଆଯାଇଥିବାରୁ ସେମାନେ ଏହି କାର୍ଯ୍ୟ କରୁଛନ୍ତି । ଏଥିରେ ପାଣ୍ଡିଆନଙ୍କୁ ଦୋଷ ଦେବାର ଠିକ୍ ନୁହେଁ ବୋଲି ସୌମ୍ୟ ଯୁକ୍ତି ଦର୍ଶାଇଛନ୍ତି । ଓଡ଼ିଆ-ଅଣଓଡ଼ିଆ ପ୍ରସଙ୍ଗ ଉପରେ ସୌମ୍ୟରଞ୍ଜନ ତାଙ୍କ ମତ ରଖିଛନ୍ତି । ଅପରାଜିତା ଷଡ଼ଙ୍ଗୀ ଓ ଭି.କେ ପାଣ୍ଡିଆନ୍ ଉଭୟ ହେଉଛନ୍ତି ଅଣଓଡ଼ିଆ ହେଲେ ଓଡ଼ିଶା ସହ ଜଡ଼ିତ । ଅପରାଜିତା ବୋହୂ ଓ ପାଣ୍ଡିଆନ୍ ଜ୍ୱାଇଁ । ସୌମ୍ୟରଞ୍ଜନ ଅପରାଜିତାଙ୍କୁ ଗ୍ରହଣ କରିଥିବା ବେଳେ ପାଣ୍ଡିଆନ୍ଙ୍କୁ ଗ୍ରହଣ କରିପାରି ନାହାଁନ୍ତି । ଜ୍ୱାଇଁ ଦୁଇଦିନିଆ ଅତିଥି କହି କଟାକ୍ଷ କରିଛନ୍ତି ।
ଅପରାଜିତାଙ୍କ ପ୍ରଶ୍ନ ପରେ ରାଜନୈତିକ ମହଲରେ ସ୍ୱର ଉଠିବାରୁ ବିଜେଡି ବିଧାୟକ ପ୍ରଫୁଲ୍ଲ ସାମଲ ଏହାର ଜବାବ ଦେଇଥିଲେ । ମୁଖ୍ୟମନ୍ତ୍ରୀ ସବୁ ଜାଗାକୁ ଯାଇପାରୁ ନଥିବାରୁ ତାଙ୍କ ସଚିବ ଭ.କେ ପାଣ୍ଡିଆନଙ୍କୁ ବିଭିନ୍ନ ଜିଲ୍ଲାକୁ ଯାଇ କାର୍ଯ୍ୟକ୍ରମ ତଦାରଖ କରିବାକୁ ନିର୍ଦ୍ଦେଶ ଦେଇଛନ୍ତି ବୋଲି କହିଥିଲେ । କିନ୍ତୁ ସୌମ୍ୟରଞ୍ଜନ ଏଥିରେ ସହମତ ହୋଇନାହାଁନ୍ତି । ଏହାକୁ ନେଇ ସେ ପାଲଟା ପ୍ରଶ୍ନ ବି ରଖିଛନ୍ତି । ସୌମ୍ୟରଞ୍ଜନ ଲେଖିଛନ୍ତି ‘ଶାସନ ବ୍ୟବସ୍ଥାର ଗୋଟିଏ ମୌଳିକ ହେଲା ଆଦିଷ୍ଟ କ୍ଷମତା ବା ଅଧିକାର ପୁଣି ଆଉ ଥରେ କାହାକୁ ହସ୍ତାନ୍ତର କରାଯାଇ ପାରିବ ନାହିଁ ।’ ଏଣୁ ପାଣ୍ଡିଆନ୍ଙ୍କ ଗସ୍ତକୁ ସେ ସିଧାସଳଖ ନାପସନ୍ଦ କରିଛନ୍ତି । ଏପରିକି ନ୍ୟାୟ ସଙ୍ଗତ ସମିଚନ ନୁହେଁ ବୋଲି କହିଛନ୍ତି ।
ମୁଖ୍ୟମନ୍ତ୍ରୀ ଯଦି ବା ନିର୍ଦ୍ଦେଶ ଦେଇଥିବେ ତେବେ ସେ ଏପରି କରିପାରିବେ ନାହିଁ ବୋଲି ସୌମ୍ୟରଞ୍ଜନ କହିବାକୁ ଚାହିଁଛନ୍ତି । ଏହି କଥାରେ ସେ ବିଜେପି ନେତାମାନଙ୍କୁ ମଧ୍ୟ ଆହ୍ୱାନ ଦେଇଛନ୍ତି । ସେମାନେ ଚାହିଁଲେ ପାଣ୍ଡିଆନ୍ଙ୍କୁ ଏହି ଗସ୍ତକୁ ବନ୍ଦ କରିପାରିବେ । ଅପରାଜିତା ଯେଉଁ ସର୍ବଭାରତୀୟ ସେବାର ଅଧିକାରୀଙ୍କ ପକ୍ଷରେ ଏପରି କାର୍ଯ୍ୟକରିବା ଆଇନ୍ର ଖୋଲା ଉଲ୍ଲଘଂନ ବୋଲି କହିଛନ୍ତି, ଏଥିରେ ସୌମ୍ୟରଞ୍ଜନ ବିଜେପି ନେତାମାନଙ୍କୁ କହିଛନ୍ତି କେନ୍ଦ୍ର ସରକାର ହେଉଛନ୍ତି ସର୍ବଭାରତୀୟ ଅଧିକାରୀମାନଙ୍କ ନିୟନ୍ତ୍ରଣ କର୍ତ୍ତା । ଏଣୁ କେନ୍ଦ୍ର ସରକାରଙ୍କ ଉପରେ ଚାପ ପକାଇ ସେମାନେ ବନ୍ଦ କରିପାରିବେ ।
୫-ଟି ସଚିବଙ୍କ କ୍ଷମତା ଉପଭୋଗ ନେଇ ସାଧାରଣରେ ଯେଉଁ ଆଲୋଚନା ହେଉଛି ସେ ସମ୍ପର୍କରେ ମୁଖ୍ୟମନ୍ତ୍ରୀ ଜାଣୁଛନ୍ତି କି ନାହିଁ ଏ ନେଇ ସୌମ୍ୟରଞ୍ଜନ ସନ୍ଦେହରେ ରହିଛନ୍ତି । କିନ୍ତୁ ସାଧାରଣରେ ଅନେକ ପ୍ରଶ୍ନ ଉଠୁଥିବାରୁ ମୁଖ୍ୟମନ୍ତ୍ରୀଙ୍କୁ ସମଗ୍ର ଦେଶରେ ଜଣେ ଆଦର୍ଶବାଦ୍ ନେତା ଭାବେ ଗ୍ରହଣ କରାଯାଉଥିବାରୁ ସେ ନୀରବ ରହିବା ଉଚିତ୍ ନୁହେଁ ବୋଲି ସୌମ୍ୟରଞ୍ଜନ କହିଛନ୍ତି । ଜଣେ ଉତ୍ତମ ଓ ସ୍ୱଚ୍ଛ ରାଜନେତା ଭାବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନୀରବ ନରହି ତାଙ୍କ ସଚିବଙ୍କୁ ନେଇ ଯେଉଁ ପ୍ରଶ୍ନ ଉଠିଛି ତାହାର ଉତ୍ତର ଦେବାକୁ ସୌମ୍ୟରଞ୍ଜନ କହି ବଲ୍ଟିକୁ ମୁଖ୍ୟମନ୍ତ୍ରୀଙ୍କୁ ଆଡ଼କୁ ଗଡ଼ାଇ ଦେଇଛନ୍ତି । ବିଜେଡିର ଜଣେ ଟାଣୁଆ ବିଧାୟକ ଭାବେ ସେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଭେଟି ଏହା ଉପରେ ଆଲୋଚନା କରି ନେତାଙ୍କୁ ପରାମର୍ଶ ଦେବା ବଦଳରେ ଏପରି ଲେଖିବା ପଛରେ ଉଦ୍ଦେଶ୍ୟ କ’ଣ ବୋଲି ପ୍ରଶ୍ନ ଉଠୁଛି ।
