୧୭ ଜୁନ୍ ,୨୦୨୩ ( ଓଡ଼ିଶା ତାଜା ନ୍ୟୁଜ୍ ) ଭୁବନେଶ୍ୱର :- ୟୁନିଟ୍-୧ ହାଟରେ ଦୋକାନଗୁଡ଼ିକୁ ବ୍ୟକ୍ତିଗତ ମାଲିକାନାକୁ ନ ଦେବା ପାଇଁ ସର୍ତ୍ତ ରହିଥିଲେ ମଧ୍ୟ ବିଏମ୍ସିର ବାବୁମାନେ ୫୦୭ ଦୋକାନକୁ ଦୋକାନୀଙ୍କ ନାମରେ କରି ଦେଇଛନ୍ତି । ତା’ ସହିତ ‘ଲାଇସେନ୍ସ ହୋଲ୍ଡର’ ଶବ୍ଦକୁ ହଟାଇ ‘ଆଲଟି’ ଶବ୍ଦ ବ୍ୟବହାର କରି ସବୁ ଦୋଷକୁ ପୋଛି ଦେବା ପାଇଁ ଉଦ୍ୟମ କରିଛନ୍ତି। ଏହାକୁ ନେଇ ମାମଲା ଲୋକାୟୁକ୍ତରେ ପହଞ୍ଚିଥିବା ବେଳେ ପୁଣି ଥରେ ଏହି ହାଟ ଚର୍ଚ୍ଚାକୁ ଆସିଛି । ମାର୍କେଟ୍ ଦାୟିତ୍ୱରେ ରହି ଆସିଥିବା ଅଧିକାରୀମାନଙ୍କର ଅପାରଗତା ହେଉ ବା ମୋଟା ଅଙ୍କର ହାତଗୁଞ୍ଜା ଯୋଗୁଁ ବିଏମ୍ସି ବର୍ଷକୁ ୨୪ ଲକ୍ଷ ହିସାବରେ ଅଢ଼େଇ ବର୍ଷ ଭିତରେ ୬୦ ଲକ୍ଷ କ୍ଷତି ସହିଲାଣି। ଗୋଟିଏ ପଟେ ଏହି ଲୋକପ୍ରିୟ ମାର୍କେଟ୍ର ନବକଳେବର ଯୋଜନା ବିଏମ୍ସିର ନାଲିଫିତା ତଳେ ରହିଥିବା ବେଳେ ଗୋଟିଏ ପରେ ଗୋଟିଏ ଅଭିଯୋଗ ବିଏମ୍ସିକୁ ବଦନାମ କରୁଛି। କମିସନରଙ୍କୁ ଏ ନେଇ ଅଭିଯୋଗ ହେବା ପରେ ତନାଘନା ଆରମ୍ଭ ହୋଇଛି ।
ବିଏମ୍ସିରେ ଦୋକାନ ପାଇଁ ଯେମିତି ଭଡ଼ା ଧାର୍ୟ୍ୟ ହୁଏ, ଅଣ୍ଡରଗ୍ରାଉଣ୍ଡ ପାଇଁ ମଧ୍ୟ ସେଭଳି ଭଡ଼ା ଧାର୍ୟ୍ୟ ହୁଏ। କିନ୍ତୁ ଏହି ମାର୍କେଟ୍ କ୍ଷେତ୍ରରେ ତାହାକୁ ଉପେକ୍ଷା କରାଯାଇଛି । ବରିଷ୍ଠ ଅଧିକାରୀଙ୍କୁ ନେଇ ତିନିଟି ଟିମ୍ ଏହାର ଅନୁଧ୍ୟାନ କରିଥିଲେ ମଧ୍ୟ ଏହି ଅଣ୍ଡରଗ୍ରାଉଣ୍ଡକୁ କିଭଳି ଦେଖିପାରିଲେ ନାହିଁ? ନା ଦେଖି ଆଖି ବୁଜିଦେଲେ? ଅଭିଯୋଗ ମୁତାବକ, ଗୋଟିଏ ଅଣ୍ଡରଗ୍ରାଉଣ୍ଡର ଆନୁମାନିକ ଭଡ଼ା ୧ ହଜାର ଟଙ୍କା । ଏଭଳି ବର୍ଷକୁ ୧୨ ହଜାର ଟଙ୍କା ହିସାବରେ ୨ଶହ ଦୋକାନ ପାଇଁ ଭଡ଼ା ୨୪ ଲକ୍ଷ ଟଙ୍କା । ଅଢ଼େଇବର୍ଷ ତଳେ ମ୍ୟୁଟେସନ ଓ ଭଡ଼ା ଧାର୍ୟ୍ୟ ହୋଇଛି । ଏଣୁ ଏହି ଅଢ଼େଇ ବର୍ଷ ମଧ୍ୟରେ ବିଏମ୍ସିର ୬୦ ଲକ୍ଷ ଟଙ୍କା କ୍ଷତି ହୋଇ ସାରିଲାଣି । ଏଥିପାଇଁ କିଏ ଦାୟୀ ସେ ନେଇ ପ୍ରଶ୍ନ ଉଠିଛି । ଏ ସମ୍ପର୍କରେ ଜଣେ ବରିଷ୍ଠ ଅଧିକାରୀ କହିଛନ୍ତି, ଅଭିଯୋଗ ଆସିବା ପରେ ଏହାକୁ ଅନୁଧ୍ୟାନ କରାଯାଉଛି । ଅନ୍ୟପଟେ ୟୁନିଟ୍-୧ ମାର୍କେଟ୍ର ନବକଳେବର ପାଇଁ ପ୍ଲାନ୍ ଅନୁମୋଦନ ପାଇଁ ପଠାଯାଇଛି। ଅନୁମୋଦନ ହୋଇଗଲେ ତୁରନ୍ତ କାମ ଆରମ୍ଭ ହେବ। କମ୍ପ୍ଲେକ୍ସ ହେବା ପରେ ଏହି ଅଭିଯୋଗ ରହିବ ନାହିଁ ବୋଲି ସେ କହିଛନ୍ତି ।
