ମନ୍ତ୍ରୀ ମଣ୍ଡଳରୁ ରୋହିତଙ୍କୁ ଚେୟାର ରୁ ଗଡାଇଲେ ନବୀନ

ଅତନୁଙ୍କୁ ଉଚ୍ଚଶିକ୍ଷା ବିଭାଗର ଅତିରିକ୍ତ ଦାୟିତ୍ୱ

୯ଜୁନ୍ ,୨୦୨୩ ( ଓଡ଼ିଶା ତାଜା ନ୍ୟୁଜ୍ ) ଭୁବନେଶ୍ୱର :- ଉଚ୍ଚଶିକ୍ଷା ମନ୍ତ୍ରୀ ରୋହିତ ପୂଜାରୀ ମନ୍ତ୍ରିମଣ୍ଡଳରୁ ବାଦ୍ ପଡ଼ିଛନ୍ତି । ମନ୍ତ୍ରିମଣ୍ଡଳରୁ ତାଙ୍କୁ ବାଦ୍ ଦେବା ପାଇଁ ରାଜ୍ୟପାଳ ପ୍ରଫେସର ଗଣେଶୀ ଲାଲ୍ ଙ୍କୁ ମୁଖ୍ୟମନ୍ତ୍ରୀ ସୁପାରିଶ କରିଛନ୍ତି । ନିକଟରେ ବିଭାଗୱାରୀ ବାର୍ଷିକ ସମୀକ୍ଷା ବେଳେ ଉଚ୍ଚଶିକ୍ଷା ବିଭାଗର ପ୍ରଦର୍ଶନ ଦୁର୍ବଳ ଥିଲା । ଯେଉଁଥିପାଇଁ ମୁଖ୍ୟମନ୍ତ୍ରୀ ଏହି କାର୍ଯ୍ୟନୁଷ୍ଠାନ ନେଇଥିବା କୁହାଯାଉଛି । ମୁଖ୍ୟମନ୍ତ୍ରୀ ଏହି ବିଭାଗର ଦାୟିତ୍ୱ ଅତନୁ ସବ୍ୟସାଚୀ ନାୟକଙ୍କୁ ଦେଇଛନ୍ତି ।

ଖାଦ୍ୟ ଯୋଗାଣ ଓ ସମବାୟ ମନ୍ତ୍ରୀ ଅତନୁ ଉଚ୍ଚଶିକ୍ଷା ବିଭାଗର ଅତିରିକ୍ତ ଦାୟିତ୍ୱ ସମ୍ଭାଳିବେ । ରେଢ଼ାଖୋଲ ଆସନରୁ ଦ୍ୱିତୀୟ ଥର ନିର୍ବାଚିତ ରୋହିତ ପୂଜାରୀଙ୍କୁ ଗତବର୍ଷ ଜୁନ୍ ୫ ତାରିଖରେ ମୁଖ୍ୟମନ୍ତ୍ରୀ ତାଙ୍କ ମନ୍ତ୍ରିମଣ୍ଡଳରେ ସାମିଲ କରିଥିଲେ । ତାଙ୍କୁ ଉଚ୍ଚଶିକ୍ଷା ଭଳି ଗୁରୁତ୍ୱପୂର୍ଣ୍ଣ ବିଭାଗର ରାଷ୍ଟ୍ରମନ୍ତ୍ରୀ ଭାବେ ସ୍ୱାଧୀନ ଦାୟିତ୍ୱ ଦେଇଥିଲେ ।

ତେବେ ବିଭାଗ ସମ୍ଭାଳିବାରେ ତାଙ୍କର ଦକ୍ଷତାକୁ ନେଇ ସବୁବେଳେ ଆଲୋଚନା ହେଉଥିଲା । ନିକଟରେ ମୁଖ୍ୟମନ୍ତ୍ରୀ ସବୁ ବିଭାଗରର ବାର୍ଷିକ ସମୀକ୍ଷା କରିଥିଲେ । ଏହି ସମୀକ୍ଷାବେଳେ ଉଚ୍ଚଶିକ୍ଷା ବିଭାଗର ପ୍ରଦର୍ଶନ ଦୁର୍ବଳ ଥିବା ଜଣାପଡ଼ିଥିଲା । ସେବେଠାରୁ ମୁଖ୍ୟମନ୍ତ୍ରୀ ତାଙ୍କ ଉପରେ ଖୁସି ନ ଥିଲେ । କେବଳ ମନ୍ତ୍ରୀ ଭାବେ ଦୁର୍ବଳ ପ୍ରଦର୍ଶନ ନୁହେଁ, ସାଂଗଠନିକ ସ୍ତରରେ ମଧ୍ୟ କିଛି ବିବାଦୀୟ କାର୍ଯ୍ୟ ତାଙ୍କୁ ମହଙ୍ଗା ପଡ଼ିଲା ବୋଲି ଚର୍ଚ୍ଚା ହେଉଛି ।