୨୨ ମଇ,୨୦୨୩ (ଓଡ଼ିଶା ତାଜାନ୍ୟୁଜ) ମାଲକାନଗିରି :- ଓଡ଼ିଶା ପବ୍ଲିକ୍ ସର୍ଭିସ୍ କମିଶନ ଦ୍ଵାରା ପରିଚାଳିତ ଓଡ଼ିଶା ଶିକ୍ଷା ସେବା ପରୀକ୍ଷାରେ ଆଦିବାସୀ ଅଧ୍ୟୁଷିତ ମାଲକାନଗିରି ଜିଲ୍ଲାରୁ ୨ଜଣ ଶିକ୍ଷକ ପାଇଛନ୍ତି ଓଇଏସ୍ । ସେ ଦୁଇଜଣ ହେଲେ ମାଲକାନଗିରି ବ୍ଲକ ଏମଭି ୭ ଗ୍ରାମର ସୁମିତ ବିଶ୍ୱାସ ଓ ପଡିଆ ବ୍ଲକ ନିଲିଗୁଡା ପଞ୍ଚାୟତ ଉସକାଲବାଗ ଗ୍ରାମର ଆଦିବାସୀ ଯୁବକ ସୁକାନ୍ତ କାର୍ତାମି । ସେମାନଙ୍କର ଏହି ଅଭୂତପୂର୍ବ ସଫଳତା ଜିଲ୍ଲା ପାଇଁ ଗୌରବ ଆଣି ଦେଇଛି । ମାଲକାନଗିରି ଜିଲ୍ଲା ତମସା ପଞ୍ଚାୟତ ଏମଭି ୭ ଗ୍ରାମର ସ୍ୱର୍ଗତ ରେବତୀ ବିଶ୍ୱାସ ଓ ମାତା ମଞ୍ଜୁବିଶ୍ଵାସଙ୍କ ସୁପୁତ୍ର ହେଉଛନ୍ତି ସୁମିତ ବିଶ୍ୱାସ ।
ଓଡ଼ିଶା ଶିକ୍ଷା ସେବା ପରୀକ୍ଷାରେ ସୁମିତ ୧୦୧ ରାଙ୍କ ରଖି ସଫଳତାର ସହିତ ଓଇଏସ ପାଇଛନ୍ତି । ସେ ବର୍ତ୍ତମାନ ପୋଟେରୁ ପୁଲିମେଟଲା ଏମପିଭି ୬ ହାଇସ୍କୁଲରେ ସହକାରୀ ଶିକ୍ଷକ ଭାବେ କାର୍ଯ୍ୟରତ ଅଛନ୍ତି । ତାଙ୍କ ବାପାଙ୍କ ମୃତ୍ୟୁ ପରେ ସେ ମାମୁଁ ସାଧନ ସରକାରଙ୍କ ଘରେ ରହି ପାଠ ପଢିଥିଲେ । ତାଙ୍କ ସଫଳତା ପଛରେ ମାମୁଁ ସାଧନ ,ମାଇଁ ରିନା ସରକାର ଓ ପତ୍ନୀ ସଂଗୀତା ସରକାରଙ୍କ ପ୍ରଚ୍ଛନ୍ନ ହାତ ରହିଛି । ଏହା ବ୍ୟତୀତ ବିଦ୍ୟାଳୟର ଶିକ୍ଷକ ସାଙ୍ଗ ସାଥିଙ୍କ ପ୍ରେରଣା ଯୋଗୁ ସେ ଓଇଏସ ପାଇ ପାରିଛନ୍ତି ବୋଲି ସୁମିତ କହିଛନ୍ତି ।
ଠିକ୍ ସେହିପରି ମାଲକାନଗିରି ଜିଲ୍ଲା ପଡିଆ ବ୍ଲକସ୍ଥ ନିଲିଗୁଡା ପଞ୍ଚାୟତ ଦୁର୍ଗମ ଅପହଞ୍ଚ ମାଓ ପ୍ରବଣ ଉସକାଲବାଗ ଗ୍ରାମର କୋୟା ଆଦିବାସୀ ସମ୍ପ୍ରଦାୟର ଆଇତା କାର୍ତାମିଙ୍କ ସୁପୁତ୍ର ସୁକାନ୍ତ କାର୍ତାମି । ସେ ଓଡ଼ିଶା ଶିକ୍ଷା ସେବା ପରୀକ୍ଷାରେ ୧୩୬ ରାଙ୍କ ରଖି ସଫଳତାର ସହିତ ଓଇଏସ ପାଇଛନ୍ତି । ସେ ବର୍ତ୍ତମାନ ମାଲକାନଗିରି ବ୍ଲକ ପାଙ୍ଗମ ସରକାରୀ ଏସଏସଡି ବାଳିକା ଉଚ୍ଚବିଦ୍ୟାଳୟରେ ବିଜ୍ଞାନ ଶିକ୍ଷକ ଭାବେ କାର୍ଯ୍ୟରତ ଅଛନ୍ତି । ସୁମିତ ଓ ଶୁକାନ୍ତ ଦୁହେଁ ନିମ୍ନ ମଧ୍ୟବିତ୍ତ ଚାଷୀ ପରିବାରରୁ ଆସିଥିବାରୁ ଏହି ସଫଳତାରେ ସ୍ଥାନୀୟ ଅଞ୍ଚଳରେ ଖୁସିର ଲହରୀ ଖେଳିଯାଇଛି । ସୁମିତ ଓ ଶୁକାନ୍ତ ଓଇଏସ ପାଇ ଜିଲ୍ଲା ପାଇଁ ଗର୍ବ ଓ ଗୌରବ ଆଣିଛନ୍ତି ।
