୨୦ମଇ ,୨୦୨୩ (ଓଡ଼ିଶା ତାଜାନ୍ୟୁଜ ) ବାଣପୁର :- ମୃତ୍ୟୁ ହେବାର ଦୀର୍ଘ ଛଅମାସ ପରେ ଗ୍ରାମକୁ ଫେରିଛି ଜଣେ ଓଡିଆ ଶ୍ରମିକଙ୍କ ମୃତଦେହ । ଆର୍ଥୀକ ସମ୍ବଳ ଅଭାବରୁ ପୁରୀ ସ୍ୱର୍ଗଦ୍ୱାରରେ ଶୁକ୍ରବାର ସନ୍ଧ୍ୟାରେ ପରିବାର ପକ୍ଷରୁ ଶେଷ ହୋଇଛି ଅନ୍ତିମ ସଂସ୍କାର । ଏପରି ଏକ ଅଭାବନୀୟ ଘଟଣା ଦେଖିବାକୁ ମିଳିଛି ବାଣପୁର ଥାନା କୁମାରାଙ୍ଗ ବୀରକେଶପୁର ଗ୍ରାମରେ । ପରିବାର ପ୍ରତିପୋଷଣ ପାଇଁ ଗ୍ରାମର ଗୋପୀନାଥ ବିଶ୍ୱାଳଙ୍କ ପୁଅ ବାବୁଲି ବିଶ୍ୱାଳ (୪୭) ଦୀର୍ଘ ଦଶ ବର୍ଷ ହେବ ଓମାନ୍ ଦେଶର ଅଲ ଅଦ୍ରକ ଟ୍ରେଡିଙ୍ଗ ଏଣ୍ଡ କଣ୍ଟ୍ରାକ୍ଟିଂ କମ୍ପାନୀରେ ସହାୟକ ଭାବେ କାର୍ଯ୍ୟରତ ଥିଲେ ।
ଗତ ବର୍ଷ ନଭେମ୍ବର ୯ ତାରିଖରେ ବାବୁଲି ମୋବାଇଲ ଯୋଗେ ପରିବାର ସହ କଥା ହୋଇଥିଲେ । ବକେୟା ଦରମା ସମ୍ପର୍କରେ କମ୍ପାନୀର ମାନବ ସମ୍ବଳ ଅଧିକାରିଙ୍କ ସହ ଯୁକ୍ତିତର୍କ ହୋଇଥିବା ବିଷୟ ବାବୁଲି କହିଥିଲେ । ତେବେ ଦଶ ତାରିଖରେ ବାବୁଲି ଦଉଡି ଦେଇ ଆତ୍ମହତ୍ୟା କରିଥିବା ବିଷୟ କମ୍ପାନୀ ପକ୍ଷରୁ ପରିବାରକୁ ସୂଚନା ଦିଆଯାଇଥିଲା । ତୁରନ୍ତ ମୃତଦେହ ନେଇ ଯିବାକୁ କମ୍ପାନୀ କର୍ତ୍ତୃପକ୍ଷ କହିବା ସହ ନଚେତ ମୃତଦେହ ପୋତି ଦେବାକୁ ଧମକ ଦେଇଥିଲେ । ତେବେ ବାବୁଲିଙ୍କ ମୃତ୍ୟୁ ଖବରରେ ସ୍ତବ୍ଧ ହୋଇପଡିଥିଲା ପରିବାର ।
ଓମାନ ଓଡିଆ ସମାଜର କର୍ମକର୍ତ୍ତା ବଦ୍ରି ନାରାୟଣ ସୁବୁଦ୍ଧି ଏବଂ ପ୍ରଶାନ୍ତ ମହାପାତ୍ରଙ୍କ ସହଯୋଗରେ ଓମାନରେ ଏ’ନେଇ ଏକ ମକଦ୍ଦମା ରୁଜୁ ହେବା ସହ ବାବୁଲିଙ୍କ ଶବ ବ୍ୟବଚ୍ଛେଦ କରାଯାଇ ବିମାନ ସାହାର୍ଯ୍ୟରେ ଦିଲ୍ଳୀ ଏବଂ ଦିଲ୍ଳୀରୁ କୋଲକତା ପଠା ଯାଇଥିଲା । କୋଲକତାରୁ ଆମ୍ବୁଲାନ୍ସ ଯୋଗେ ଶୁକ୍ରବାର ସନ୍ଧ୍ୟାରେ ପୁରୀରେ ମୃତଦେହ ପହଞ୍ôଚବା ପରେ ସ୍ୱର୍ଗଦ୍ୱାରରେ ତାଙ୍କର ଅନ୍ତିମ ସଂସ୍କାର କରାଯାଇଛି । ଏକମାତ୍ର ପୁଅ କିଶାନ ମୁଖାଗ୍ନି ଦେଇଥିଲେ ।
ତେବେ ରୋଜଗାରିୟା ସଦସ୍ୟକୁ ହରାଇ ହତାଶ ହୋଇପଡିଛି ୬ ଜଣିଆ ପରିବାର । ବାବୁଲିଙ୍କ ସ୍ୱଳ୍ପ ରୋଜଗାରରେ କୈାଣସି ମତେ ଚଳି ଯାଉଥିବା ବେଳେ ଅନାଥ ହୋଇପଡିଛନ୍ତି ବାବୁଲିଙ୍କ ବୃଦ୍ଧ ପିତାଙ୍କ ସମେତ ପତ୍ନୀ ଏବଂ ତିନି ଝିଅ ଓ ପୁଅ । ମୃତ୍ୟୁର ସଠିକ୍ କାରଣ ସମ୍ପର୍କରେ ତଦନ୍ତ କରିବା ସହ ବକେୟା ଦରମା ଏବଂ ବୀମା ରାଶୀ ପାଇବା ପାଇଁ ମୁଖ୍ୟମନ୍ତ୍ରୀ ଏବଂ ଜିଲା ପ୍ରଶାସନକୁ ଅନୁରୋଧ କରିଛନ୍ତି ପତ୍ନୀ ସଂଯୁକ୍ତା ।
