ଅଲୋଡା ସଞ୍ଜୟ ଆଲୋଡ଼ନର କେନ୍ଦ୍ର ବିନ୍ଦୁ ପାଲଟିଯାଇଛନ୍ତି ।
ଦୁଇ ବର୍ଷ ହେବ ଅଲୋଡ଼ା ସଞ୍ଜୟ ଏବେ କାହିଁକି ଲୋଡ଼ା …?
ତେବେ ସଞ୍ଜୟ ଙ୍କ ପ୍ରବେଶ ରେ ସଙ୍ଗଠକ ମାନଙ୍କୁ ହେବନି ତ ଅଡୁଆ ?
ଦଳରେ ବିଦ୍ରୋହର ଆଶଙ୍କା କରୁଛି କି ବିଜେଡି …? ସାଧାରଣ ନିର୍ବାଚନ ପୂର୍ବରୁ ଅକଳ ସ୍ଥିତିର ବାସ୍ନା ବାରୁଛି କି ଦଳ …? କାରଣ ଏବେଠୁ ଆରମ୍ଭ ହେଲାଣି ଅଲୋଡ଼ା ନେତାଙ୍କ ମାନଭଞ୍ଜନ । ଆଉ ଏହି ପର୍ବରେ ସର୍ବ ପ୍ରଥମ ଚର୍ଚ୍ଚାରେ ଅଛନ୍ତି ସଂଜୟ ଦାସବର୍ମା । ଦଳ ଭିତରେ ଦୀର୍ଘ ଦିନ ଧରି କୋଣଠେସା ହୋଇ ରହିଥିବା ସଂଜୟଙ୍କୁ ନିକଟରେ ନବୀନ ନିବାସରୁ ଡାକରା ଆସିବା ଏବଂ ସେ ନବୀନ ନିବାସ ଯାଇ ଶୀର୍ଷ ନେତୃତ୍ୱ ଓ ବର୍ତ୍ତମାନ ଅଫିସର ଥାଇ ଦଳୀୟ ଆଫାୟାର୍ସ ବୁଝୁଥିବା ବ୍ୟକ୍ତିଙ୍କୁ ଭେଟି ଆଲୋଚନା କରିବାକୁ ନେଇ ସୃଷ୍ଟି ହୋଇଛି ବିରାଟ ଚର୍ଚ୍ଚା ।
ତେବେ ସଞ୍ଜୟଙ୍କ ସହ କଣ ଆଲୋଚନା ହେଲା… ? କାହିଁକି ନା ଗୋଟିଏ ସମୟରେ ବିଜେଡିରେ ସଞ୍ଜୟ ବେଶ ପାୱାରଫୁଲ ଥିଲେ । ସଙ୍ଗଠନରେ ଭଲ କାଟତି ଥିଲା । ହେଲେ ପକ୍ଷ ଛେଦନ ପରି ଆଗ ତାଙ୍କଠୁ ଜିଲ୍ଲା ପର୍ଯ୍ୟବେକ୍ଷକ ଦାୟିତ୍ୱ କଢ଼ାଗଲା । ତାପରେ ଯୋଜନା ବୋର୍ଡ ଉପାଧ୍ୟକ୍ଷ ପଦରୁ ବି ହଟାଗଲା । ସେହିପରି ଦଳ ହେଡକ୍ୱାର୍ଟରର ସାଧାରଣ ସଂପାଦକ ଦାୟିତ୍ୱରେ ଥିଲେବି ନା ପୁରୀ ବିଜେଡି ପ୍ରତିଷ୍ଠା ଦିବସରେ ଗୁରୁତ୍ୱ ମିଳିଲା, ନା ଶଙ୍ଖଭବନ ଲୋକାର୍ପଣ ଉତ୍ସବରେ ଗୁରୁତ୍ୱ ମିଳିଲା ।
କେବଳ ସେତିକି ନୁହେଁ, ଧାମନଗର, ପଦ୍ମପୁର, ଝାରସୁଗୁଡା ଉପନିର୍ବାଚନ ଟିମରେ ତାଙ୍କ ପାଇଁ ଜାଗା ନଥିଲା । ଏସବୁ ଅବହେଳାକୁ ନେଇ ଥରେ ନିଜ ନିର୍ବାଚନ ମଣ୍ଡଳିରେ ବି ଗର୍ଜିଥିଲେ ସଂଜୟ । ଆଗରୁ ଅନେକ ଉଦାହରଣ ଅଛି ଦଳ ବିରୋଧରେ ଯିଏ ଯେତେବେଳେ କିଛି କହିଛନ୍ତି ସେମାନଙ୍କୁ ବିତାଡିତ କରାଯାଇଛି । ପ୍ୟାରୀ ବାବୁଙ୍କ ଠାରୁ ଆରମ୍ଭ କରି ଅନେକଙ୍କୁ ଦଳ ଧୁଳିସାତ କରିଦେଇଛି । ଅନେକ ଥର ଅନେକ ଦଳୀୟ ବିଧାୟକ ଅବା ମନ୍ତ୍ରୀ ଯଦି ନିର୍ବାଚନରେ ପରାଜୟ ବରଣ କରିଛନ୍ତି ସେମାନଙ୍କ ଜାଗାରେ ଅନ୍ୟ ମାନଙ୍କୁ ଟିକେଟ ଦିଆଯାଇଛି ।
ଏପରି ସ୍ଥଳେ ଅନେକ ଭେଟରାନ ଲିଡର ତଥା ବରିଷ୍ଠ ନେତା ମନ୍ତ୍ରୀ ମାନଙ୍କୁ ଦଳ ଡଷ୍ଟବିନକୁ ଫିଙ୍ଗିଲା ପରି ଫିଙ୍ଗି ଦେଲା ସେମାନେ ଉବୁଟୁବୁ ହୋଇ ଆଉ ଉଠିବାକୁ ରାହା ପାଉନାହାନ୍ତି । ଯେଉଁମାନେ କି ସାରା ଓଡ଼ିଶାରେ ବେଶ ଚର୍ଚିତ ଥିଲେ । ସିଏ ରଘୁନାଥ ମହାନ୍ତି କିମ୍ବା ପ୍ରଫୁଲ୍ଲ ଘଡେ଼ଇ ଅବା ଦାମୋଦର ରାଉତ ଏମିତିରେ ଦିଲୀପ ରାୟ ମଧ୍ୟ ବାଦ୍ ପଡ଼ିନଥିଲେ । ଏତେଦିନର କୋଣ ଠେସା ପରେ ସଞ୍ଜୟ ଙ୍କ ସହ ବିଜେଡି ପ୍ରମୁଖ ଙ୍କ ସଲାସୁତୁରା କୁ ନେଇ ଦଳୀୟ ନେତା ଚିନ୍ତା ରେ … ତେଣୁ ସେଇ ସଂଜୟଙ୍କୁ ଏବେ ପୁଣି ମନେଇବାର କାରଣ କଣ… ? କୁହାଯାଉଛି ନବୀନ ନିବାସରୁ ସଂଜୟଙ୍କୁ ସାଧାରଣ ନିର୍ବାଚନ ଟିକେଟ ଅଫର ମିଳିଥିଲେ ବି ସେ ସେଥିରେ ଖୁସି ନାହାନ୍ତି ।
ବରଂ ତାଙ୍କୁ କାହିଁକି ଅବହେଳା କରାଯାଉଛି ତାର ଉତ୍ତର ଜାଣିବାକୁ ଚାହିଁଛନ୍ତି । ହେଲେ ଏ ସଂପର୍କରେ ସଂଜୟ ନିଜେ ମୁହଁ ଖୋଲି ନଥିଲା ବେଳେ ବିଜେଡି ବରିଷ୍ଠ ନେତାଙ୍କୁ ଡାକି ଆଲୋଚନା କଲେ ଭୁଲ କଣ ବୋଲି ପ୍ରଶ୍ନ କରିଛି । ବିଜେଡିରେ ଏବେ ସଂଗଠନ ସଂପାଦକ ପ୍ରଣବ ପ୍ରକାଶ ଦାସ, ସାଂସଦ ପିନାକୀ ମିଶ୍ର, ମନ୍ତ୍ରୀ ସମୀର ଦାସ, ବିଧାୟକ ଉମା ସାମନ୍ତରାୟଙ୍କ ସହ ସଂଜୟଙ୍କର ସଂପର୍କ ଭଲ ନାହିଁ । ବିଶ୍ଵାସ କରାଯାଏ କି ଦଳ ଭିତରୁ ଆଡ଼େଇ ଦେବା ବେଳେ ପୁରୀର ଛାମୁଆ ନେତାମାନେ ମଧ୍ୟ ବୈକଟ କରିଦେଲେ । ଭାବିଥିଲେ ବୈକଟ କରି କରି ସଞ୍ଜୟ ବାଦ୍ ପଡିଯିବେ ମାତ୍ର ନବୀନଙ୍କ କାର୍ଯ୍ୟାଳୟ ଏହାକୁ ବରଦାସ୍ତ କରି ପାରିଲା ନାହିଁ । ଏହା ଭିତରେ ପ୍ରଣବଙ୍କ ପ୍ରଣାଳୀ କାମ କରୁନାହିଁ । ସଞ୍ଜୟ ଦାସବର୍ମାଙ୍କ ସ୍ଥାନ ଆଉ କେହି ନେଇ ପାରୁନାହାଁନ୍ତି କି… ?
