ଜଳ ସମ୍ପଦ ବିଭାଗରେ ଜଳ ଦିବସ ପାଳିତ ‘ଜଳ ଯୋଗାଯୋଗ ରଣନୀତି’ ପୁସ୍ତକ ପ୍ରକାଶନ ଓ୍ୱାଟର ଡକ୍ସ ଓ ପିନସିସର ଶୁଭାରମ୍ଭ
ଜୀବନ ଜୀବିକା ପାଇଁ ସମସ୍ତଙ୍କ ନିମନ୍ତେ ଜଳର ଆବଶ୍ୟକତା ଲକ୍ଷ୍ୟ ପୂରଣ ନିମନ୍ତେ ଜଳସଂପଦ ବିଭାଗର ସମସ୍ତ ପ୍ରୟାସ ଜାରି ରହିବ ବୋଲି ମନ୍ତ୍ରୀ ଶ୍ରୀମତୀ ସାହୁ ପ୍ରକାଶ କରିଥିଲେ । ଏହି ଅବସରରେ ମନ୍ତ୍ରୀ ଶ୍ରୀମତୀ ସାହୁ ବିଭାଗ ଦ୍ୱାରା ପ୍ରକାଶିତ ‘ଜଳ ଯୋଗାଯୋଗ ରଣନୀତି’ ପୁସ୍ତକ ‘ଊର୍ମି’ର ଶୁଭ ଇନ୍ମୋଚନ କରିବା ସହିତ ବିଭାଗରେ ଇଂଜିନିୟର ମାନଙ୍କର ଅବସ୍ଥିତି ଓ କାର୍ଯ୍ୟବଳୀ ସଂପର୍କିତ ଏବଂ ବିଭିନ୍ନ ତଥ୍ୟକୁ ସମନ୍ୱିତ କରିବା ପାଇଁ ଓ୍ୱେବ୍ ସକ୍ଷମଯୁକ୍ତ ବ୍ୟବସ୍ଥା ଯଥାକ୍ରମେ ‘ଓ୍ୱାଟର ଡକ୍ସ’ ଓ ‘ପିନସିସ’ ଭଳି ସୂଚନା ଓ ପ୍ରଯୁକ୍ତି ବିଦ୍ୟା ଭିତ୍ତିକ ଡାଟାବେସର ଶୁଭାରମ୍ଭ କରିଥିଲେ । 
ସାଧାରଣ ଜୀବନରେ ପିଇବା ପାଣି ହେଉ, ସାଧାରଣ ବ୍ୟବହାର ହେଉ କିମ୍ବା ଚାଷୀମାନଙ୍କର ଆବଶ୍ୟକତା ପୂରଣ ପାଇଁ ହେଉ, ଜଳର ଆବଶ୍ୟକତା ପୂରଣ ପାଇଁ ବିଭିନ୍ନ ସହଭାଗୀ ଅନୁଷ୍ଠାନ ଓ ସରକାରୀ ବିଭାଗର ସହଯୋଗ ଓ ସାମୁହିକ ପ୍ରୟାସ ଏ ଦିଗରେ ସଫଳତା ଆଣିଦେବ ବୋଲି ମନ୍ତ୍ରୀ ଶ୍ରୀମତୀ ସାହୁ କହିଥିଲେ । ଉନ୍ନୟନ କମିଶନର ତଥା ଅତିରିକ୍ତ ମୁଖ୍ୟ ଶାସନ ସଚିବ ଶ୍ରୀମତୀ ଗର୍ଗ ଯୋଗଦେଇ କହିଲେ ଯେ, ଜଳ ସଂପଦର ସୁରକ୍ଷା ଓ ସୁପରିଚାଳନା କ୍ଷେତ୍ରରେ ରୂପାନ୍ତରଣ ଆମର ଲକ୍ଷ୍ୟ ରହିଛି । 
ସମସ୍ତଙ୍କୁ ଟ୍ୟାପ ଯୋଗେ ବିଶୁଦ୍ଧ ପାନୀୟ ଜଳ ଯୋଗାଇଦେବା ଆମର ପ୍ରାଥମିକତା ରହିଥିବା ବେଳେ ବହି ଯାଉଥିବା ଜଳ ଉତ୍ସର ସଂରକ୍ଷଣ, ଖରାଦିନରେ ଜଳର ଆବଶ୍ୟକତା ପୂରଣ ପାଇଁ ଜଳ ମିଳୁଥିବା ସମୟରେ ଏହାର ସଂରକ୍ଷଣ ପାଇଁ ସବୁ ସ୍ତରରେ ଉଦ୍ୟମ କରିବାର ଆବଶ୍ୟକତା ରହିଛି । ସେହିପରି ମହିଳା ଓ ଶିଶୁ ବିକାଶ ବିଭାଗ କମିଶନର ତଥା ଶାସନ ସଚିବ ଶ୍ରୀମତୀ ଶୁଭା ଶର୍ମା ଯୋଗଦେଇ ବିଦ୍ୟାଳୟରେ ଶିଶୁମାନଙ୍କୁ ପାଠ ପଢାଇବା ସହିତ ଜଳର ଉତ୍ତମ ବ୍ୟବହାର ସଂପର୍କରେ ଶିଖାଇବାର ଆବଶ୍ୟକତା ସମ୍ପର୍କରେ ମତ ରଖିଥିଲେ । 
