୧୪ ମାର୍ଚ୍ଚ ,୨୦୨୩ (ଓଡ଼ିଶା ତାଜାନ୍ୟୁଜ ) ଭୁବନେଶ୍ୱର :- ଓଡ଼ିଶା ସାମୁଦ୍ରିୟ ପରିଷଦର ପ୍ରଥମ ବୈଠକ ମୁଖ୍ୟ ଶାସନ ସଚିବ ଶ୍ରୀ ପ୍ରଦୀପ ଜେନାଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଛି । ରାଜ୍ୟରେ ଥିବା ଛୋଟଛୋଟ ବନ୍ଦର ଗୁଡ଼ିକର କାର୍ଯ୍ୟକାରିତା, ନିୟନ୍ତ୍ରଣ ଓ ପରିଚାଳନା ନିମନ୍ତେ ଏହି ବୋର୍ଡ ଗତ ବର୍ଷ ପ୍ରତିଷ୍ଠା କରାଯାଇଛି । ଉକ୍ତ ପରିଷଦର ନୀୟମ ଅନୁଯାୟୀ ବରିଷ୍ଠ ପଦାଧିକାରୀଙ୍କ ପଦବୀ ତୁରନ୍ତ ପୂରଣ ନିମନ୍ତେ ମୁଖ୍ୟ ଶାସନ ସଚିବ ପରାମର୍ଶ ଦେଇଛନ୍ତି । ବିଭିନ୍ନ ସେବାରେ ଥିବା ଦକ୍ଷ ଅଧିକାରୀମାନଙ୍କୁ ପ୍ରତ୍ୟେକ୍ଷ କିମ୍ବା ଡେପୁଟେସନ ମାଧ୍ୟମରେ ନିଯୁକ୍ତି କରି ପ୍ରଶାସନିକ କାର୍ଯ୍ୟକୁ ତ୍ୱରାନିତ କରିବା ଉପରେ ସେ ଗୁରୁତ୍ୱଆରୋପ କରିଛନ୍ତି । 
ଓଡ଼ିଶାର ବେଳାଭୂମି ଏବଂ ଛୋଟଛୋଟ ବନ୍ଦର ମାଧ୍ୟମରେ ଆନ୍ତଃରାଜ୍ୟ ମାଲ୍ ପରିବହନ, ଆମଦାନୀ ଓ ରପ୍ତାନୀ ତଥା ବାଣିଜ୍ୟ ବ୍ୟବସାୟ ନିୟନ୍ତ୍ରଣ ନିମନ୍ତେ କେନ୍ଦ୍ର ସରକାରଙ୍କ ପରାମର୍ଶ ଅନୁଯାୟୀ ଏହି ବୋର୍ଡ ଗଠନରେ ଓଡ଼ିଶା ହେଉଛି ଦେଶର ପଞ୍ଚମ ରାଜ୍ୟ । ଜଳପଥରେ ମାଲ ପରିବହନ ହେବା ଦ୍ୱାରା ସ୍ଥଳଭାଗରେ ଆନ୍ତଃରାଜ୍ୟ ପରିବହନ ଜନିତ ଭିଡ଼ ଅନେକାଂଶରେ ହ୍ରାସ ହୋଇପାରିବ । ଉକ୍ତ ବୈଠକରେ ପାରାଦ୍ୱୀପ ବନ୍ଦର କତ୍ତୃପକ୍ଷ ଅଧ୍ୟକ୍ଷ ଶ୍ରୀ ପି.ଏଲ.ହରନାଥ, ନୌବାହିନୀ କ୍ୟାପଟେନ ଦିବେଶ କୁମାର ସ୍ୱାଇଁ, ବିଭିନ୍ନ ବିଭାଗୀୟ ଅଧିକାରୀ, ଓଡ଼ିଶା ସାମୁଦ୍ରିୟ ପରିଷଦର ପ୍ରକଳ୍ପ କାର୍ଯ୍ୟକାରୀ ସଂସ୍ଥା ବ୍ଲାକ୍ ବ୍ରିକ୍ସ୍ କର୍ମକର୍ତ୍ତା ପ୍ରମୁଖ ଉପସ୍ଥିତ ଥିଲେ ।
